Փաստ ինֆո

Մենք ցանկացանք Ազգային ժողովի մեծամասնական ընտրակարգով ընտրվող 41 տեղերից հրաժարվել ոչ այն պատճառով, որ այդ համակարգը վատն է:  ԱՄՆ Ներկայացուցիչների պալատում 435-ն էլ մեծամասնականով են ընտրվում, շատ էլ լավ աշխատող համակարգ է:

Այս մասին Ազգային ժողովի նիստում՝ Ընտրական օրենսգրքի նախագծի քննարկման ժամանակ, ասաց ԱԺ պատգամավոր, նախկին արտգործնախարար Վարդան Օսկանյանը՝ ընդգծելով, որ «բայց մեր անկախության 25 տարին ցույց տվեց, որ դա մեզ համար չի աշխատում, դա շահարկվում է»: «Հատկապես իշխող ուժի կողմից, երբ ունի լծակներ, ունի փող, կարողանում են այդ 41-ից անընդհատ հետևողականորեն առնվազն 35-36-ն իրենք ստանան, մնացածը տրվում է այլ կուսակցությունների, այն էլ՝ պայմանավորվածության շրջանակներում»,- ասաց նա:

Ըստ նրա՝ այս խնդիրը լուծելու փոխարեն հայտնվում ենք մի իրավիճակում, երբ, անկախ նրանից, համամասնական ենք կոչում, թե՝ մեծամասնական, ներկայացված նախագծով ճիշտ հակառակն է արվում.  «Եթե նախկինում մեկ հոգի էր փող բաժանում, օգտագործում էր լծակները՝ իրեն ձայն բերելու, հիմա մի քիչ ավելի մեծ ընտրատարածքում ոչ թե մի հոգի, այլ՝ 5 հոգի, 6 հոգի, 10 հոգի նույնն է անելու՝ իր ռեյտինգը բարձրացնելու»:

Վ.Օսկանյանի համոզմամբ՝ եթե նախկինում մարդուն կոնկրետ ընտրատարածքում մեծամասնական ընտրակարգով ընտրում էին, սակայն համակրում այլ կուսակցության, որին ձայն էին տալիս համամասնական ընտրակարգով, ապա ԸՕ նախագծով առաջարկվող համամասնական ընտրակարգով ընտրություն կատարելիս «եթե դու այդ մարդուն ես ընտրում, որովհետև փող ես վերցրել, կամ համոզված ես, որ նա լավն է, դու ստիպված ես նաև արդեն ձայն տալ կուսակցությանը, որին նա մաս է  կազմում»:

«Այսինքն՝ այս բոլորից օգտվելու է այն քաղաքական ուժը, որն ունի միջոցներ»,-ընդգծեց Վ.Օսկանյանը: Անդրադառնալով ԱԺ-ի կազմավորման կարգին, կոալիցիաների ձևավորման հարցում առաջարկվող սահմանափակումներին, Վ.Օսկանյանը համոզմունք հայտնեց, որ «այլ երկրում, այլ պայմաններում միգուցե շատ լավ օրենք է, աշխատող օրենք կարող է լինել, բայց, մեր՝ 25 տարվա անցած ճանապարհը հաշվի առնելով», այս օրենքը չի լուծում մատնանշված խնդիրները: «Ես միանում եմ բոլոր այն մարդկանց, ովքեր կոչ են անում, որ իշխող մեծամասնությունն իսկապես վերագնահատի երկրում առկա իրավիճակը և գնա կոմպրոմիսների, որպեսզի մենք կարողանանք ընդունել այնպիսի օրենք, որ ոչ ոք ընտրությունների ընթացքում և դրանից հետո չկարողանա բողոք հնչեցնել, թե օրենքը լավը չէր, և դրա արդյունքում մենք ստացանք վատ ընտրություն»,-ասաց Վ.Օսկանյանը:

Աղբյուր` Փաստինֆո