Փաստ ինֆո

ԱՄՆ նախագահը շատ հզոր, ուժեղ հայտարարություն է արել: Նա դեպքերը որակել է որպես 20-րդ դարի վատթարագույն վայրագություններից մեկը: ԱՄՆ նախագահը հավատարիմ է մնում այն հանձնառությանը, ինչին ձգտում ենք մենք բոլորս՝ դեպքերի լիարժեք, ամբողջական և արդարացի ճանաչմանը: Ծիծեռնակաբերդի հուշահամալիրում հայտարարել է ՀՀ-ում  ԱՄՆ-ի  արտակարգ եւ լիազոր դեսպան Ռիչարդ Միլսը:

Դեսպանն այսօր  Ծիծառնակաբերդում հարգեց Ցեղասպանության զոհերի հիշատակը` նշելով, որ իր համար պատիվ է ներկայացնել Միացյալ Նահանգների կառավարությանը և ժողովրդին, երբ հարգանքի տուրք է մատուցվում այն դեպքերի հիշատակին, որն, ԱՄՆ նախագահի խոսքերով, 20-րդ դարի վատթարագույն ողբերգություններից էր:

«100 տարի առաջ միլիոնավոր հայեր մահվան երթերով, կոտորածների ու տեղահանություններին զոհ գնացին: Մենք այսօր հիշատակի տուրք ենք մատուցում նրանց և ներդրում ունենում, որպեսզի նման դեպքեր երբևէ չկրկնվեն»,- պատասխանելով լրագրողների հարցերին ասել է դեսպանը:

Ի պատասխան այն հարցին, որ ԱՄՆ նախագահ Բարաք Օբաման չկատարեց իր խոստումը և դարձյալ «ցեղասպանություն» բառը չօգտագործեց` դեսպանը պատասխանեց. «Կարծում եմ՝ երեկ նախագահը շատ հզոր, ուժեղ հայտարարություն է արել: Նա դեպքերը որակեց որպես 20-րդ դարի վատթարագույն վայրագություններից մեկը: ԱՄՆ նախագահը հավատարիմ է մնում այն հանձնառությանը, ինչին ձգտում ենք մենք բոլորս՝ դեպքերի լիարժեք, ամբողջական և արդարացի ճանաչմանը: ԱՄՆ նախագահը շարունակում է հավատարիմ մնալ աշխատելու այն ուղղությամբ, որպեսզի լիարժեք և ամբողջական կերպով ճանաչվեն դեպքերը»: