Փաստ ինֆո

Արցախն անպայման պետք է բանակցային կողմ դառնա և ոչ թե ինչ-֊ինչ հարցեր համաձայնեցնելուց  հետո, այլ բանակցությունների վերսկսման հենց սկզբից: «Արմենպրես»-ի փոխանցմամբ, այս մասին լրագրողների հետ զրույցում հայտարարել է ՀՅԴ Բյուրոյի անդամ Կիրո Մանոյանը:

ՀՅԴ գործիչը ՌԴ ԱԳ նախարար Սերգեյ Լավրովի Երևան կատարած այցի շրջանակում  կարևորել է, որ Լավրովը հստակ շեշտել է՝ 1994թ. կնքված զինադադարի եռակողմ համաձայնագիրն անժամկետ է և շարունակում է ուժի մեջ մնալ:

«Ադրբեջանը փորձում էր ներկայացնել, որ հենց Հայաստանն է ապրիլի սկզբին սկսել պատերազմը և չեղյալ է համարել 1994թ. կնքված զինադադարը, իսկ իրենց համար զինադադարի ռեժիմն այն բանավոր համաձայնությունն է, որը կայացել է ապրիլի 5֊-ին Մոսկվայում Հայաստանի և Ադրբեջանի զինված ուժերի գլխավոր շտաբի պետերի մասնակցությամբ: Տարբերությունն այստեղ այն է, որ 1994թ. կնքված զինադադարի համաձայնագիրը եռակողմ է, այսինքն՝ այդ համաձայնագիրը ստորագրել է նաև Արցախը, իսկ զինադադարի վերջին բանավոր համաձայնությունը ձեռք է բերվել Հայաստանի և Ադրբեջանի միջև: Այս առումով Սերգեյ Լավրովի հայտարարությունը շատ կարևոր է»,֊- պարզաբանել է Մանոյանը:

Կիրո Մանոյանը նշել է նաև, որ ՌԴ ԱԳ նախարարի այցը ցույց տվեց, որ իրականությանը չեն համապատասխանում ռուսական լրատվամիջոցների հրապարակումները, թե Սերգեյ Լավրովը հակամարտության կարգավորման նոր փաստաթուղթ է ներկայացնելու հայկական կողմին:

«Ռուսաստանի արտգործնախարարի այցը ցույց տվեց, որ այդ հրապարակումները իրականության հետ կապ չունեն: Ես չգիտեմ, թե ինչի համար էին նման հրապարակումները: Միգուցե, հայկական կողմի վրա ճնշում գործադրելու փորձեր էին դրանք կամ ինչ-֊որ մեկը ցանկանում էր ցույց տալ ադրբեջանցիներին, որ փորձում են ճնշել Հայաստանին, սակայն մենք համոզվեցինք, որ իրականում նոր փաստաթուղթ չկա»,-  ընդգծել է Կիրո Մանոյանը: