Փաստ ինֆո

Գյումրիում Ավետիսյանների ընտանիքի անդամների դաժան սպանության գործով այսօրվա դատական նիստում շարունակվել է ամբաստանյալ, ռուսաստանյան ռազմաբազայի զինծառայող Վալերի Պերմյակովի նախաքննական ցուցմունքների հրապարակումը: Մասնավորապես, հրապարակվել են նրա՝ որպես մեղադրյալ տված ցուցմունքները:

Հարկ է նշել, որ թեև դատարանում Պերմյակովը հրաժարվել է ցուցմունք տալ, սակայն նախաքննության ընթացքում հայ և ռուս իրավապահները նրան հարցաքննել են տասնյոթ անգամ:

Ըստ «Շանթ» հեռուստաընկերության, ցուցմունքներում նա մեկ անգամ ևս ընդունել է իր մեղքը՝ ինքն է մտել Ավետիսյանների տուն ու սպանել ընտանիքի անդամներին, քանի որ վախեցել է, որ նրանք իրեն կհանձնեն Գյումրիում տեղակայված  ռուսաստանյան ռազմաբազայի հրամանատարությանը:

Պերմյակովը նշել է, որ Ավետիսյանների տան ճանապարհին տեսել է երկու անձանց, անգամ զրուցել նրան հետ, սակայն հետագայում հերքել է այս մասին իր իսկ ցուցմունքները:    

Նա մանրամասն հայտնել է, թե ինչպես է դասալքության դիմել, ինչ ուղղությամբ է շարժվել, ինչպես է Ավետիսյանների տուն հասել: Պերմյակովը  նաև դասալքության դրդապատճառն է հստակ նշել՝  չէր ուզում ծառայել, տնեցիներին էր կարոտել ու որոշել էր գնալ ու հասնել իր հայրենի քաղաքը, իսկ դրա համար քաղաքացիական հագուստ և գումար էր անհրաժեշտ: Պերմյակովը նշել էր, որ քաղաքին լավ ծանոթ չէր, շարժվել է իր համար անծանոթ ուղղությամբ, ճանապարհին ինչ-որ տղամարդու էհանդիպել, ում հետ անգամ զրուցել է: Պերմյակովը ևս մեկ մարդու մասին է հիշատակել, ում հետ շփվել է: Ըստ նրա, Ավետիսյանների տնից հափշտակած հեռախոսներից  մեկում գտել է  տաքսու վարորդի համարը, ով իրեն ուտելիք և հյութ է բերել:

Տուժող կողմի փաստաբանները «Շանթ»-ին հայտնել են, որ գործի տվյալներով հերքվում են այս ցուցմունքները, մասնավորապես,  Պերմյակովի մոտ եղած հեռախոսներից հեռախոսազանգ չի եղել, հեռախոսի մեջ նրա հիշատակած տաքսիստի հեռախոսահամար չկա և որևէ անձ նրան ուտելիք չի բերել:

Տուժողի իրավահաջորդի ներկայացուցիչ, փաստաբան Միհրան Պողոսյանը լրագրողի հետ զրույցում նշել է, որ քննիչի հարցին, թե նշում եք շարժառիթը եղել է գումար և հագուստ վերցնելը, սակայն այժմյան Ձեր հանգիստ կեցվածքը վկայում է ատելության կամ այլ շարժառիթի մասին, ինչին Պերմյակովը պատասխանել է՝ թքած ունեմ:

Տուժող կողմի փաստաբանները ոճրագործության շարժառիթը միանշանակ պարզված չեն համարում: Պերմյակովն էլ իր ցուցմունքներում նշել է, որ ի սկզբանե սպանելու նպատակ չի ունեցել:

Պերմյակովի ցուցմունքները դեռ համադրվելու են ՌԴ ռազմաբազայի տարածքում Ավետիսյանների տան նմանությամբ սարքված տարածքում կատարված փորձարարության արդյունքների հետ: Փորձարարության ժամանակ, որը տեսագրված է,  Պերմյակովը ներկայացրել է Ավետիսյանների տանն իր կատարած գործողությունները: