Փաստ ինֆո

Ազգային ժողովի Պետական-իրավական հարցերի մշտական հանձնաժողովն Ընտրական նոր օրենսգրքի նախագծի չորս ժամ տևած քննարկումների ավարտին դրական եզրակացություն տվեց այն առաջին ընթերցմամբ ԱԺ ընթացիկ նստաշրջանի և ապրիլի 25-ից մեկնարկող քառօրյա նիստերի օրակարգերում ընդգրկելու համար:

Դեմ քվեարկեցին ընդդիմության ներկայացուցիչները՝ հանձնաժողովի փոխնախագահ, «Օրինաց երկիր» խմբակցության անդամ Հովհաննես Մարգարյանը, «Հայ ազգային կոնգրես» խմբակցության անդամ Գագիկ Ջհանգիրյանը, «Ժառանգություն» խմբակցության ներկայացուցիչ Զարուհի Փոստանջյանը, անկախ պատգամավոր Էդմոն Մարուքյանը:

Ընդդիմախոսներն ընդգծեցին, որ դեմ են, որպեսզի նախագիծն այս տեսքով ընդգրկվի ԱԺ լիագումար նիստերի օրակարգում՝ շարունակելով պնդել ընդդիմության առաջարկները, որոնց, ըստ նրանց, իշխանությունը հրաժարվել է լուծում տալ: Խոսքը, մասնավորապես, վերաբերում է քվեարկությանը մասնակցած ընտրողների ցուցակների հրապարակմանը, բոլոր ընտրատեղամասերի տեսանկարահանմանը, առաջարկվող համամասնական ընտրակարգի վերանայմանը, քանի որ այն ավելի շուտ մեծամասնական ընտրակարգի տարրեր է պարունակում, ընտրողների մատների թանաքոտմանը:

«Ձեզ չթվա, թե այն, որ Ղարաբաղի հետ կապված և սահմանի լարվածության և մարտունակության հետ կապված, մեր՝ ձեզ աջակցելը վերաբերում է նաև այս գործընթացներին: Ամենևի՛ն: Մենք այստեղ լինելու ենք անզիջում, որովհետև այն միասնական կետերը, որ ներկայացրել ենք, ամենևին մեր կուսակցական քիմքի խնդիրներ չեն: Մենք ընդամենն ուզում ենք՝ ընտրական համակարգը բարելավվի և վստահությունը բարձրացվի: Դա որքան մեզ պետք է հուզի, այնքան էլ ձեզ պետք է հուզի»,-հայտարարեց ՀԱԿ խմբակցության քարտուղար Արամ Մանուկյանը՝ վստահեցնելով, որ իրենց նպատակին առավելագույնս հասնելու համար օգտագործելու են միջազգային կառույցներին,  քաղաքացիական հասարակությանը:

Հանձնաժողովի նախագահ, հանրապետական Հովհաննես Սահակյանը և հիմնական զեկուցող՝ ՀՀ կառավարության աշխատակազմի ղեկավար-նախարար Դավիթ Հարությունյանը կարևորեցին այսօրվա քննարկումները և վստահեցրին, որ նախագծի լրամշակման ուղղությամբ աշխատանքները կշարունակվեն:

«Մենք չենք ասում՝  ամեն ինչ լավ է, մենք ասում ենք՝ այս տարբերակն ենք գտել, եթե կլինի ողջամիտ տարբերակ, մենք պատրաստ ենք դա ընդունելու»,-ասաց Հ.Սահակյանը:

Դ.Հարությունյանն էլ իր հերթին՝ դիմելով ընդդիմությանը, նկատեց, որ վերջինս, երբ ասում է, որ իր առաջարկները, չեն ընդունվել, դա «խոսում է իսկապես ծայրահեղական մի քիչ մոտեցումների մասին»: «Քանի որ եթե դուք նայեք, դուք ձեր նախնական առաջարկություններից մի միլիմետր չշեղվեցիք: Մենք կատարեցինք վիթխարի քայլ հանդեպ ձեզ»,-ընդգծեց Դ.Հարությունյանը:

Անդրադառնալով, մասնավորապես, ընդդիմության՝ մատների թանաքոտման առաջարկին, նա նշեց դրա թերությունները և պնդեց, որ այդ գործիքը համարվում է հնացած: «Այդ գործիքը կիրառվում է այն երկրներում, որտեղ չկա ընտրողների միասնական ցուցակ, որտեղ չկա միասնական փաստաթուղթ, որտեղ ընտրական ցուցակը ձևավորվում է ներկայացած մարդկանցով հիմնականում: Իսկ այն երկրներում, որոնք ունեին ընտրական նորմալ ցուցակ, հակառակ արդյունքը տվեց»,-ասաց նա՝ հավելելով, որ թանաքոտման
խոխարեն իրենք առաջարկում են էլեկտրոնային գրանցման սարքերի միջոցով մատնահետքերը հավաքելու և համադրելու մեխանիզմ:

«Եթե ինչ-որ մեկը խուսափում է այս մեխանիզմներից, առաջարկելով նախնադարյան մատների թանաքոտման սկզբունքը, մնում է մատները կտրենք, ով եկավ ընտրություններին»,-ասաց Դ.Հարությունյանը: