Փաստ ինֆո

Ադրբեջանական վերջին ագրեսիայի ընթացքում տեղի ունեցած  բոլոր սարսափելի հանցագործությունները կատարվել են ահաբեկչական ոճը որդեգրած ադրբեջանական զինված ուժերի կողմից և ուղղված են Լեռնային Ղարաբաղի խաղաղ բնակիչների և զինվորականների դեմ: Այս մասին, ըստ ՀՀ ԱԺ-ի պաշտոնական կայքէջի, հայտարարել է ԵԽԽՎ-ում ՀՀ ԱԺ պատվիրակության անդամ Նաիրա Կարապետյանը՝ ելույթ ունենալով ապրիլի 21-ի ԵԽԽՎ նիստում:

Պատգամավորն ընդգծել է, որ  ԶԼՄ-ներում են հայտնվել իրենց տներում հատուկ ուժայինների կողմից  ծեր մարդկանց սպանություններն ու խոշտանգումներն, ինչպես նաև զինվորականների խոշտանգումները պատկերող սարսափելի լուսանկարներն ու  տեսագրությունները, դպրոցի բակում երեխա է սպանվել, նշել է նա:
«Լեռնային Ղարաբաղի իշխանություններն ունեն հավաստի փաստեր, որ ադրբեջանական ուժերը, կիրառելով ԻՊ-ի և Ալ Նուսրայի նախկին փորձը, իրականացրել են այս սարսափելի գործողությունները, իսկ դաժանության նմանությունները հաստատում են այս պնդումները»,- հավելել է ԱԺ պատգամավորը:

Ն.Կարապետյանն իր գործընկերների և Խորհրդարանական վեհաժողովի համապատասխան կառույցների ուշադրությունը հրավիրել  է հումանիտար իրավունքի կոպիտ խախտումների վրա, որոնք հավասարազոր են պատերազմական հանցագործությունների:

Պատգամավորն ընդգծել է, որ հանցագործության անպատժելիությունը  ծնում է նոր հանցագործություն: Եվրոպայի մի հատվածում կատարված դժբախտության անտեսումը կարող է հանգեցնել այլ բռնությունների, հետևաբար հարկավոր են համատեղ և հստակ գործողություններ՝ այն մեկընդմիշտ արմատախիլ անելու համար:

Նաիրա Կարապետյանը զուգահեռներ է անցկացրել ազերիների գործողությունների և ահաբեկչական սարսափելի, բարբարոսական և անմարդկային այն արարքների միջև, որոնք իրականացվել են «Իսլամական պետության», Ան-Նուսրայի և այլ ահաբեկչական խմբավորումների կողմից, որոնք «վերջին տարիներին սարսափի մեջ են պահում մեզ բոլորիս»:

Այդ խմբավորումները մարտահրավեր են նետել ողջ քաղաքակիրթ աշխարհին, «մեր կողմից դավանած արժեքներին և սկզբունքներին, դրանով առաջացնելով խոր զայրույթ՝  մենք պարտավոր ենք արձագանքել»:

Ն.Կարապետյանն ընդգծել է, որ այն, ինչը կարծես թե հեռու էր թվում Եվրոպայից, այսօր բախում է այս մայրցամաքի մայրաքաղաքների՝ Փարիզի, Բրյուսելի դռները: Անգամ մինչև այս ահաբեկչությունների իրականացումը Եվրոպայում, տվյալ բնագավառի շատ փորձագետներ բազմիցս զգուշացնում էին, որ ԻՊ-ին միացած կամավորները, անցնելով հոգևոր և ռազմական նախապատրաստում Մերձավոր Արևելքում, ձգտելու են արյունահեղության և բռնության տարածման:

«Նախազգուշացումներն անտեսվեցին, և ահա վերջերս այս ամենի հետ բախվեցին Փարիզն ու Բրյուսելը, և սա միանշանակ այն ոճն է, ինչի հետ ապրիլի սկզբին բախվեցին Հայաստանն ու Լեռնային Ղարաբաղը»,- նշել է ՀՀ ԱԺ պատգամավորը:

Պատգամավորը հավելել է. «Ողջ Եվրոպան ցնցված էր այն սարսափելի տեսարաններից, որոնց մենք ականատես եղանք. խաղաղ բնակիչներ, որոնք սպանվեցին համերգների, թատերական ներկայացումների ընթացքում, մարդիկ, ովքեր պարզապես ճամփորդում էին: Ո՞րն էր նրանց մեղքը, ո՞րն էր մեր բոլորի մեղքը, ինչպե՞ս մենք կարող էինք պաշտպանել մեր խաղաղ բնակիչներին»: