Փաստ ինֆո

Շատերն ասում են, որ Ցեղասպանության հանցագործության մասին խոսելը,  հանցագործության կանխարգելման,  այդ հանցագործության զոհերի իրավունքների պաշտպանության համար պայքարելը ոչ միայն  Հայաստանի իրավունքն է, այլև պարտավորությունը:

Երևանում արդեն երկրորդ անգամ «Ընդդեմ ցեղասպանության հանցագործության» գլոբալ ֆորումի նախօրեին այս մասին լրագրողներին հայտնել է ՀՀ Նախագահի աշխատակազմի ղեկավար Վիգեն Սարգսյանը՝ հիշեցնելով, որ հենց Հայաստանի առաջարկով է դեկտեմբերի 9-ը հռչակվել Ցեղասպանության կանխարգելման,  ցեղասպանության զոհերի իրավունքների  պաշտպանության միջազգային օր:

Ապրիլի 23-ին Երևանում կայանալու է «Ընդդեմ ցեղասպանության հանցագործության» երկրորդ գլոբալ ֆորումը,  որի ընթացքում բաց քննարկում է լինելու ոչ միայն Հայոց ցեղասպանության հարցի, այլև առհասարակ՝ Ցեղասպանության հանցագործության հարցերի շուրջ:

Այս տարվա  ֆորումի  թեման է լինելու, ըստ Վիգեն Սարգսյանի, փախստականների խնդիրները: Ֆորումի մասնակիցները կենտրոնացած են լինելու Ցեղասպանության կենդանի վերապրողների խնդիրների վրա, մարդիկ, ովքեր տեսել են արհավիրքն իրենց աչքերով, զգացել են այդ հանցագործությունն իրենց, իրենց ընտանիքների վրա: 

«Վստահ եմ, որ այս տարվա համաժողովն իր ներազդեցությամբ, ներուժով ոչ մի բանով չի զիջելու, շատ առումներով գերազանցելու է առաջին համաժողովին»,- նշել է Վ.Սարգսյանը՝ ընդգծելով, որ ֆորումը, ինչպես նաև ապրիլի 24-ին Երևանում անցկացվող «Ավրորա» մրցանակաբաշխությունը լուսաբանելու են արտասահմանյան 70-ից ավելի լրատվամիջոցներ:

100LIVES և «Ավրորա» նախաձեռնության գլխավոր տնօրեն Արման Ջիլավյանն իր հերթին նշել է, որ  միջոցառման ընթացքում առաջին անգամ կներկայացվի նոր նյութ՝ The Humanitarian Index-ը (Մարդասիրության ցուցանիշ): Դրանով փորձ կարվի աշխարհին ներկայացնել, թե հումանիտար ո՛ր թեմաներն են այսօր ավելի հետաքրքիր հասարակությանը, ո՛ր երկրներում ո՛ր թեմաներն են ավելի շատ հուզում, որքանո՛վ է հասարակությունը ճիշտ կամ սխալ  հասկանում և ընկալում  հումանիտար թեմաները:

«Այն փաստը, որ այս նյութը գալիս է Հայաստանից, «Ավրորա» մրցանակից, որը տրվում է Հայոց ցեղասպանությունը վերապրածների անունից, Հայոց ցեղասպանության թեման նորովի է բարձրացնում,  այն ստանում է միջազգային նոր հնչողություն»,- նշել է Ջիլավյանը:

Ապրիլի 23-ին 100 LIVES և «Ավրորա» մրցանակ նախաձեռնությունը  կազմակերպում  են  Aurora Dialogues  քննարկումներ՝ աշխարհի առաջատար գիտնականների, բարերարների, մեդիա փորձագետների և մարդասիրության ոլորտում հայտնի անձանց մասնակցությամբ: Այն մասնագիտական քննարկումների շարք է՝ նվիրված մարդասիրությանն առնչվող ամենահրատապ հիմնախնդիրներին ու մարտահրավերներին աշխարհում։

Կքննարկվեն մարդասիրական ոլորտի հիմնախնդիրների ներկա վիճակը, փախստականների համաշխարհային ճգնաժամը, մարդասիրության գործում կանանց դերը և հումանիտար ճգնաժամերի վրա աշխարհի ուշադրությունը հրավիրելու հարցում զանգվածային լրատվության հնարավորությունները։

Aurora Dialogues  քննարկումներն ուղիղ կհեռարձակվեն հայերեն, անգլերեն, ֆրանսերեն և ռուսերեն:

Իսկ «Ավրորա» մրցանակը շնորհվում է Հայոց ցեղասպանությունը վերապրածների անունից և ի երախտագիտություն նրանց, որոնք փրկության ձեռք մեկնեցին հայ ժողովրդին: Մրցանակին արժանանալու է այն հերոսը, որն օգնում է մարդկանց՝ անձնվիրաբար և բացառիկ ջանքերով:

Դափնեկիրն ստանալու է 100․000 ԱՄՆ դոլարի պարգև և նվիրատվության շղթան շարունակելու հնարավորություն. 1.000.000 ԱՄՆ դոլարի դրամաշնորհի ներկայացնելով իրեն ոգեշնչած մարդասիրական կազմակերպություններին։ «Ավրորա» մրցանակի Ընտրող հանձնաժողովի կազմում ընդգրկված են՝  Նոբելյան դափնեկիրներ Էլի Վիզելը, Օսկար Արյասը, Շիրին Էբադին և Լեյմա Գբովեն, Իռլանդիայի նախկին նախագահ Մերի Ռոբինսոնը, մարդու իրավունքների ակտիվիստ Հինա Ջիլանին, Ավստրալիայի նախկին արտգործնախարար և Միջազգային ճգնաժամային խմբի պատվավոր նախագահ Գարեթ Էվանսը, Նյու Յորքի Կարնեգի կորպորացիայի նախագահ Վարդան Գրեգորյանը և օսկարակիր դերասան ու բարերար Ջորջ Քլունին։