Փաստ ինֆո

Քիչ առաջ վերաքննիչ քրեական դատարանը՝ դատավոր Ռուզաննա Բարսեղյանի նախագահությամբ,  արդարացրեց իշխանության  ներկայացուցչի նկատմամբ բռնություն գործադրելու մեջ մեղադրվող 28-ամյա Նարեկին:

Վերաքննիչ դատարանը բավարարեց պաշտպանական կողմի բողոքը և բեկանեց առաջին ատյանի դատարանի դատավճիռը՝ արդարացնելով ՀՀ քրեական օրենսգրքի 316-րդ հոդվածի 1-ին մասով մեղադրվող Նարեկին՝ հանցագործությանը նրա մասնակցությունն ապացուցված չլինելու հիմքով:

Ինչպես «Փաստինֆո»-ն ավելի վաղ տեղեկացրել էր՝ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով Ա.Ալիխանյանի անվան ազգային գիտական լաբորատորիայի գիտաշխատող Նարեկը դատապարտվել էր 6 ամիս ժամկետով ազատազրկման, ինչպես  միջնորդել էր մեղադրող դատախազը՝ իր մեղադրական ճառում:

Վերաքննիչ բողոքով պաշտպանական կողմը պահանջել էր ամբողջությամբ բեկանել Կենտրոն և Նորք-Մարաշ վարչական շրջանների ընդհանուր իրավասության դատարանի` 06.08.2015թ. դատավճիռը և Նարեկին արդարացնել՝ ճանաչելով և հռչակելով նրա անմեղությունը:

Նարեկի պաշտպանությունն իրականացրել են Արա Զոհրաբյանը և հանրային պաշտպանի գրասենյակի փաստաբան Թամարա Բաղդասարյանը: Պաշտպանական կողմը գտնում էր, որ գործով ձեռք բերված ապացույցները չէին կարող հիմք հանդիսանալ՝ մեղադրական դատավճիռ կայացնելու համար և որ մեղադրանքի հիմքում դրվել է 2  ցուցմունք, տուժողի և վկա ոստիկանի ցուցմունքները, որոնք ըստ պաշտպանական կողմի՝ արժանահավատ չեն:

Ավելին, պաշտպանական կողմը զրկված է եղել տուժողին լսելու և նրան հարցեր տալու հնարավորությունից, քանի որ նախկին ոստիկանն այլևս համակարգում չի աշխատում և ինչպես առաջին ատյանի, այնպես էլ վերաքննիչ դատարանում նիստերին չի մասնակցել՝ հանրապետությունից բացակայելու պատճառաբանությամբ:

Ինչ վերաբերում է վկա- ոստիկանի ցուցմունքներին, ապա, ըստ պաշտպանական կողմի, դրանք արժանահավատ չեն կարող համարվել, քանի որ հակասություններ են ի հայտ եկել նրա նախաքննական եւ դատաքննական ցուցմունքներում։ Մասնավորապես՝  դատաքննության ընթացքում ոստիկանը հայտնել էր, որ Նարեկին բերման են ենթարկել թևերը ոլորած, ու ինքը տարել է նրան մինչև ոստիկանական ավտոմեքենա, իսկ  նախաքննական ցուցմունքում նշել էր, որ անձամբ է նրան բերման ենթարկել:

Ինչ վերաբերում է տուժող ոստիկանի ստացած վնասվածքին, ապա  պաշտպանական կողմը չի բացառել, որ ոստիկանը նստատեղի շրջանում այդ վնասվածքն ստացել է երկու մեքենաների մեջտեղում հայտնվելու պատճառով, քանի որ ոտքով հարվածելու դեպքում դժվար թե տաբատը ծակվեր ու նա մարմնական վնասվածք ստանար: Նշենք, որ ոստիկանի պատռված  տաբատը գործով իրեղեն ապացույց չի ճանաչվել:

Մեղադրող դատախազն էլ գտնում էր, որ Նարեկի մեղադրանքը հիմնավորված է, իսկ ապացույցների թվում մատնանշել է նաեւ դատաբժշկական փորձաքննության եզրակացությունը, համաձայն որի՝ տուժող Կարեն Սաղաթելյանի մարմնական վնասվածքները՝ ձախ հետույքային շրջանի քերծվածքի ձևով հասցվել են սահմանափակ մակերեսով բութ կոշտ առարկաներով՝ չի բացառվում ձեռքերով և ոտքերով:

Ոստիկանին հարվածելու մեջ մեղադրվող Նարեկն առաջադրված մեղադրանքում իրեն մեղավոր չի ճանաչել և պնդել է, որ ինքնաբուխ և խաղաղ հավաքի բոլոր չափանիշներին համապատասխանող ցույցը խոչընդոտվել, ապա կոպիտ կերպով ցրվել է ի սկզբանե լավ չկազմակերպված, ցուցարարների հետ աշխատանք տանելու անընդունակ և սեփական մասնագիտական թերի պատրաստվածությունից շփոթված ոստիկանական ուժերի կողմից:

Առաջին ատյանի դատարանում Նարեկը իր պաշտպանական ճառում հայտարարել էր, որ անկախ դատարանի կայացնելիք վճռից՝ ինքը շարունակելու է ապրել, պայքարել և աշխատել Հայաստանում կամ ի նպաստ ՀՀ-ի՝ իր կարողությունների, ունակությունների և հոգեկերտվածքի սահմաններում՝ չանտեսելով արդարության, անձնական և համընդհանուր բարեկեցության հարցերը հավելելով, որ  «Ես հպարտ եմ, որ Հայաստանի Հանրապետության քաղաքացի եմ և հավատում եմ նրա գալիք հաջողություններին»:

Գործը քննվել է Կենտրոն եւ Նորք մարաշ վարչական շրջանների քննչական բաժնում եւ  ըստ մեղադրանքի՝ Նարեկը 2014թ. հունիսի 23-ին, ժամը 14:00-ի սահմաններում Երևան քաղաքի Սարյան փողոցի 22 շենքի մոտ տեղի ունեցած բողոքի ակցիայի ընթացքում ծառայողական պարտականությունները կատարելու կապակցությամբ կյանքի կամ առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող, ՀՀ ոստիկանության Երևան քաղաքի վարչության ՊՊԾ գնդի երրորդ հատուկ գումարտակի ծառայող, ոստիկանության սերժանտ Կ. Սաղաթելյանի նկատմամբ՝ նրան պատճառելով առողջության թեթև վնասի հատկանիշներ չպարունակող մարմնական վնասվածքներ: Նարեկի նկատմամբ որպես խափանման միջոց ընտրվել էր չհեռանալու մասին ստորագրությունը: