Փաստ ինֆո

Ինչպես արդեն հայտնել ենք, այսօր, ժամը 8-ից Հրազդանում քաղաքապետի ընտրության քվեարկություն է ընթանում: Հրազդանի քաղաքապետի պաշտոնի համար պայքարում է 3 թեկնածու՝ գործող քաղաքապետ,  ՀՀԿ անդամ Արամ Դանիելյանը, «Քաղաքացիական պայմանագիր» կուսակցության վարչության անդամ, 1996-1999թ.թ-ին Հրազդանի քաղաքապետ, ԱԺ նախկին պատգամավոր Սասուն Միքայելյանը և «Հայկական վերածնունդ» կուսակցության անդամ, ԱԺ փորձագետ Արթուր Միսակյանը: Բոլոր 3-ն էլ առաջադրվել են համապատասխան կուսակցությունների կողմից:

«Քաղաքացիական պայմանագիր» կուսակցության մամուլի խոսնակ Ալեն Սիմոնյանը լրագրողների հետ զրույցում անդրադարձել է Արամ Դանիլյանի շտաբի պետի այն հայտարարությանը, թե Սասուն Միքայելյանն ու նրա վարորդը ծեծել են Դանիելյանի վստահված անձին:

«Ա1+-ի» հաղորդմամբ՝ Ա.Սիմոնյանը հայտնել է, թե թիվ 14 դպրոցում տեղակայված 25/09 ընտրատեղամասի մոտ Սասուն Միքայելյանը նկատել է, որ նշված անձը կաշառք է բաժանում, մոտեցել է ու հարցրել՝ ինչո՞ւ է ընտրակաշառք բաժանում. «Այդ անձը, ընտրակաշառքը, գումարը, սեղմելով գրպանի մեջ, հայհոյել է Սասուն Միքայելյանին ու ասել, որ լավ եմ անում: Այնուհետեւ դիմել է փախուստի, որից հետո Սասուն Միքայելյանի նման անձնավորությունը դժվար թե վազեր նրա հետեւից: Արամ Դանիելյանի տարածած հայտարարության վերաբերյալ մի հետաքրքրիր բան կարող եմ արձանագրել՝ երբ նրա շտաբի պետերից մեկը հարձակվեց ինձ վրա, ես այդ ամենը տեսաձայնագրել էի ու զանգահարել եմ ոստիկանություն: Իսկ այսօր տվյալ անձը, որը իբր տուժել է Սասուն Միքայելյանից, ինչ-որ տեղ նստած է, անգամ բժշկի չի դիմել: Դա այն սերիայից է, որ ինչ ուզում են, հայտարարում են գոյություն չունեցող փաստի մասին, որ տպավորություն ստեղծեն, եւ, ինչու չէ, նաեւ արդարացնեն նախկինում իրենց արած գործողությունները: Նաեւ այդպիսով փորձում են, ըստ իրենց, հավասարության նշան դնել իրենց ու ՔՊ միջեւ»:

Ալեն Սիմոնյանը եւս մեկ անգամ հստակեցրեց՝ Սասուն Միքայելյանը որեւէ կոնտակտ չի ունեցել այդ անձնավորության հետ:

Նա նաեւ նշեց, որ կեսօրի դրությամբ չի կարող որեւէ ամփոփոխ տեղեկություն հայտնել, քանի որ բոլոր տեղեկությունները դեռեւս հավաքվում են:

Մանրամասները՝ Armtimes.com-ի տեսանյութում