Փաստ ինֆո

ՀՀԿ փոխնախագահ Արմեն Աշոտյանի կարծիքով՝ Հրազդանում այսօր անցկացված տեղական ինքնակառավարման մարմինների ընտրությունները կողմնակալ են լուսաբանվել: Aravot.am-ի փոխանցմամբ` այս մասին Ա.Աշոտյանն ասել է Հրազդանի քաղաքապետի ՀՀԿ-ական թեկնածու Արամ Դանիելյանի կենտրոնական շտաբում լրագրողների հետ հանդիպման ժամանակ:

«Քարոզարշավի ողջ ընթացքում ակնհայտ էր մեզ համար, որ որոշ լրատվամիջոցների ու քաղաքական ուժերի դաշինք է ստեղծվել, որի նպատակը ոչ թե ընտրարշավի ու ընտրությունների անաչառ լուսաբանումն էր, այլ նպատակաուղղված, միակողմանի, կողմնակալ և խեղված իրականության ներկայացումը»,- այսպիսի տեսակետ արտահայտեց Ա. Աշոտյանը։

«Որոշ լրագրողներ գրեցին, որ տարբեր քաղաքներից մարդիկ են ժամանել Հրազդան,- շարունակեց նա,- ուզում եմ երկրորդել Նիկոլ Փաշինյանին և ասել՝ համաձայն եմ այն տեսակետին, որ խոսքը գնում է ընտրությունների մասին, որոնց մասնակցում են ընտրողները։ Դրսից եկած և ոչ մի մարդու հետ կապված քվեարկության ահազանգ չկա, որը կփաստեր, թե Երևանից, Արտաշատից կամ որևէ այլ տեղից ժամանած մարդիկ քվեարկել են հրազդանցիների փոխարեն: ՀՀ քաղաքացիներն ունեն ազատ տեղաշարժվելու իրավունք ու կարող են ցանկացած օր այցելել ցանկացած քաղաք, ցանկացած գյուղ՝ ցանկացած փոխադրամիջոցով՝ դա կլինի Գագիկ Ծառուկյանին վերագրվող ավտոբուս, թե անձնական օգտագործման մեքենա։ Փաստենք նաև, որ այս օրերին մեր մրցակիցների համար Հրազդան են ժամանել բազմաթիվ երևանցիներ, իջևանցիներ, գյումրեցիներ… Զարմանալի է, որ նույն լրատվամիջոցը մեղադրում է արտաշատցիներին Հրազդան գալու մեջ և աչք է փակում նրա վրա, որ մրցակից թեկնածուների համար ՀՀ այլ քաղաքներից այս օրերին ժամանել են տասնյակ, եթե չասեմ հարյուրից ավելի մարդիկ: Ակնհայտ է, որ հասարակությանը մոլորության մեջ գցելու անհաջող փորձ է արվում»։ Ա. Աշոտյանը հերքեց նաև ընտրակաշառք բաժանելու մասին տեղեկությունները. «Նիկոլ Փաշինյանն օրեր առաջ հայտարարեց, որ 200-400 հազար դոլար ընտրակաշառք է բաժանվել Հրազդանում: Մեզ մեղադրեցին նաև նրանում, որ մեր թեկնածուն 10 հազար դրամ է բաժանում ամեն մի ընտրաձայնի համար։ Մեր մրցակիցները, սակայն, չունեն ընտրակաշառքի բաժանման պահ արձանագրող գեթ մեկ իրեղեն ապացույց»,- նշեց Ա. Աշոտյանը:

Մանրամասները` սկզբնաղբյուր կայքում: