Փաստ ինֆո

Այսօր՝ ապրիլի 17-ին, ժամը 8-ից  Արագածոտնի, Արարատի, Արմավիրի, Գեղարքունիքի, Լոռու, Կոտայքի, Սյունիքի և Վայոց ձորի մարզերի 36 համայնքներում ընթանում են տեղական ինքնակառավարման մարմինների ընտրությունների քվեարկություններ:

30 համայնքներում ընտրում են համայնքի ղեկավար, 3-ում՝ ավագանու անդամներ, 3-ում՝ և՛ համայնք ղեկավար, և՛ ավագանու անդամ:

Հիշյալ համայնքների թվում են Թալին, Սպիտակը, Հրազդանը և Բյուրեղավանը, որտեղ քաղաքապետ են ընտրում:

Ընտրություններին ընդհանուր առմամբ մասնակցում է համայնքի ղեկավարի 60 և ավագանու անդամի 64 թեկնածու:
Դիտորդական առաքելություն իրականացնելու նպատակով սահմանված ժամկետում ՀՀ կենտրոնական ընտրական հանձնաժողովում հավատարմագրվել է 5 տեղական հասարակական կազմակերպության թվով 113 դիտորդ:

Հրազդանի քաղաքապետի պաշտոնի համար պայքարում է 3 թեկնածու՝ գործող քաղաքապետ,  ՀՀԿ անդամ Արամ Դանիելյանը, «Քաղաքացիական պայմանագիր» կուսակցության վարչության անդամ, 1996-1999թ.թ-ին Հրազդանի քաղաքապետ, ԱԺ նախկին պատգամավոր Սասուն Միքայելյանը և «Հայկական վերածնունդ» կուսակցության անդամ, ԱԺ փորձագետ Արթուր Միսակյանը: Բոլոր 3-ն էլ առաջադրվել են համապատասխան կուսակցությունների կողմից:

Թալինի քաղաքապետի պաշտոնի համար ևս պայքարում է 3 թեկնածու՝ գործող քաղաքապետ, ՀՀԿ անդամ Սարգիս Արամյանը, ՀՀ ԱԺ գործերի կառավարչության 1-ին կարգի մասնագետ, ՀՅԴ անդամ Տիգրան Հարությունյանը և  «Հայկական վերածնունդ» կուսակցության անդամ Գուրգեն Գրիգորյանը: Բոլոր 3-ն էլ առաջադրված են համապատասխան կուսակցությունների կողմից:

Սպիտակի քաղաքապետի պաշտոնի համար պայքարում է գործող քաղաքապետ Գագիկ Սահակյանը և Լոռու փոխմարզպետ Վանիկ Ասատրյանը:  Երկուսն էլ ինքնաառջադրված են և ՀՀԿ անդամներ:

Բյուրեղավանի քաղաքապետի ընտրությանը ևս քվեարկվում է  2 թեկնածու՝ գործող քաղաքապետ Հակոբ Բալասյանը և ոչ մի տեղ չաշխատող Էդիկ Պողոսյանը: Երկուսն էլ ինքնաառաջադրված անկուսակցականներ են: