Փաստ ինֆո

2016 թվականի ապրիլի 17-ին կայանալիք Հրազդանի քաղաքապետի ընտրութունների գործընթացը լուսաբանելու ընթացքում լրագրողի գործունեությանը խոչընդոտելու փաստով ՀՀ քննչական կոմիտեում քրեական գործ է հարուցվել ՀՀ քրեական օրենսգրքի 149-րդ հոդվածի 1-ին մասով և ուղարկվել ՀՔԾ՝ նախաքննություն կատարելու համար: Այս մասին «Փաստինֆո»-ին հայտնեցին ՀՀ քննչական կոմիտեից:

«Քաղաքացիական պայմանագրի» վարչությունը նախօրեին հայտարարել էր, որ Հրազդանի քաղաքապետի թեկնածու Արամ Դանիելյանի նախընտրական շտաբում բռնություններ են գործադրվել։  ՔՊ-ն Հրազդանի քաղաքապետի ընտրություններում պաշտպանում է Սասուն Միքայելյանի թեկնածությունը, եւ ըստ հնչեցրած հայտարարությունների՝ ընտրակաշառքի ահազանգերից մեկի հետքերով գնացել են թեկնածու Դանիելյանի ընտրական շտաբ, որտեղ ենթարկվել են հարձակման:

Կուսակցության մամուլի խոսնակ, «Արարատնյուզ» կայքի գլխավոր խմբագիր Ալեն Սիմոնյանը  «Ազատություն» ռադիոկայանի հետ զրույցում  հատմել է, որ  «երկաթյա ձողով փորձեց հարվածել, կոչ էր անում ներկաներին մեզ և իմ մեքենան ջարդուխուրդ անեն: Հետագայում, երբ հասկացա, որ իրավիճակը սրվում է, որոշեցի, որ ավելի ճիշտ է գնալ: Դուրս գալու ընթացքում հարվածեց ձեռքիս, որպեսզի տեսախցիկը վնասի»:

Դեպքի վերաբերյալ Ա.Սիմոնյանը հաղորդում էր ներկայացրել ոստիկանություն, որն էլ այն ուղարկել է ՀՀ քննչական կոմիտե։ «Կոտայքի մարզային քննչական վարչությունում ստացվել է Ա.Սիմոնյանի հաղորդումը, ձեռնարկել անհրաժեշտ անհետաձգելի գործողություններ մատնանշված հանգամանքները պարզելու ուղղությամբ։ Նկատի ունենալով, որ նախապատրաստված նյութերը պարունակում են  հանցագործության հատկանիշներ՝ այսօր հարուցվել է քրեական գործ՝ ՀՀ քրեական օրենսգրքի 149-րդ հոդվածի հատկանիշներով եւ ուղարկվել ըստ քննչական ենթակայության՝ ՀՔԾ»,-հայտնեց ՀՀ քննչական կոմիտեի նախագահի խորհրդական Սոնա Տռուզյանը: