Փաստ ինֆո

Հայաստանը Լեռնային Ղարաբաղի անվտանգության երաշխավորն  է և անելու է ամեն ինչ՝ ապահովելու համար Լեռնային Ղարաբաղի ժողովրդի անվտանգությունը, խնդիրը բացառապես պետք է ունենա խաղաղ կարգավորում Միսկի խմբի ընդունված համանախագահության ձևաչափի շրջանակներում՝ երեք հայտնի սկզբունքների հիման վրա:  Ինչպես լրագրողներին տեղեկացրել է իշխող կուսակցության՝ ՀՀԿ-ի,  խոսնակ Էդուարդ Շարմազանովը, այս մասին մեկ անգամ ևս վերահաստատվել է ղարաբաղա-ադրբեջանական շփման գծում ռազմական գործողությունների վերսկսումից ի վեր այսօր տեղի ունեցած ՀՀԿ-ի գործադիր մարմնի առաջին նիստում:

«Եվ մեր կարծիքը, մեր տեսակետը հստակ է. Լեռնային Ղարաբաղի ժողովուրդն պետք է ինքը լինի իր ճակատագրի դարբինը: Լեռնային Ղարաբաղը չի կարող ունենալ ավելի ցածր կարգավիճակ, քան փաստացի ունի այսօր: Այսինքն՝ Լեռնային Ղարաբաղն անկախ հանրապետություն է, և Հայաստանի Հանրապետությունն անելու է ամեն ինչ, որպեսզի բանակցությունների միջոցով հասնենք Լեռնային Ղարաբաղի Հանրապետության միջազգային ճանաչմանը»,- ասել է Է.Շարմազանովը: Նա հավելեց. «Եվս մեկ անգամ խոնարհվում ենք մեր հերոսների հիշատակի առջև: Փառք ու պատիվ մեր հերոսներին, փառք ու պատիվ մեր ազգին, մեր բոլոր քաղաքական ուժերին, մեր հասարակությանը, արցախահայությանը, Սփյուռքի մեր եղբայրներին ու քույրերին, լրատվամիջոցների ներկայացուցիչներին այն քաղաքացիական, ազգային միասնական կեցվածքի համար, որ դուք ցուցաբերեցիք, ցուցաբերում եք, և համոզված եմ, ցուցաբերելու եք նաև ապագայում»:

Ի պատասխան լրագրողներից մեկի հարցի՝ Է.Շարմազանովն ընդգծել է, որ զինադադարը շահեկան պետք է լինի բոլորի համար, մերժելի է խնդրի ռազմական լուծումը: «Մենք մշտապես մերժել ենք խնդրի ռազմական լուծումը»,- հայտարարել է ՀՀԿ խոսնակը՝ մեջբերելով ՀՀ նախագահ Սերժ Սարգսյանի, ԼՂՀ նախագահ Բակո Սահակյանի հայտարարություններն առ այն, որ Ղարաբաղի ժողովրդի պայքարը ուրիշների տարածքի գրավելու մեջ չէ, Ղարաբաղի ժողովրդի պայքարն իր սեփական ճակատագիրը սեփական ձեռքերով որոշելու մեջ է՝ ապրել անկախ, ազատ, ժողովրդավարական երկրում, իր երեխայի, իր ճակատագիրը որոշելու համար: Ղարաբաղի ժողովրդի պայքարն իր սեփական Հայրենիքում է:  «Մենք ուրիշի հողի, պետության վրա աչք չունենք»,- ասել է Է.Շարմազանովը: