Փաստ ինֆո

Առանց ԼՂՀ պաշտոնական մասնակցության որեւէ առաջարկություն, նախաձեռնություն չի կարող կյանքի կոչվել: Այս մասին այսօր Ստեփանակերտում հայտարարել է ԼՂՀ նախագահ Բակո Սահակյանը` կարծիք հայտնելով, որ վերջին իրադարձություններից հետո ԵԱՀԿ համանախագահողները պետք է վերանայեն իրենց դիրքորոշումը եւ վերականգնեն բանակցային գործընթացի լիարժեք ձեւաչափը:

Բ.Սահակյանը բարձր է գնահատել միջազգային հանրության եւ հատկապես ԵԱՀԿ Մինսկի խմբի համանախագահների միջնորդական ջանքերը հակամարտության կարգավորման գործում` նշելով, որ նաեւ այդ միջնորդական առաքելության շնորհիվ էր, որ մինչեւ ապրիլի 1-ի լույս 2-ի գիշերը պահպանվել էր հարաբերական անդորրը: Բայցեւ` փաստել, որ հանդիպումների ժամանակ մշտապես բարձրաձայնել է խանգարված ձեւաչափը վերականգնելու անհրաժեշտությունը:

«Խանգարված ձեւաչափի պայմաններում անհնար էր հասնել Ղարաբաղյան հակամարտության կարգավորման գործում վերջնական լուծման: Այսօր էլ մնում ենք մեր կարծիքին եւ պնդում ենք, որ ցանկացած նախաձեռնություն, առաջարկություն մինչեւ չիրականցվի ԼՂՀ  պաշտոնական մասնակցության, չի  կարող լիովին կյանքի կոչվել», - նշել է Բակո Սահակյանը` ընդգծելով. «1994 թ. Բուդապեշտյան գագաթնաժողովի որոշման համաձայն Արցախի հանրապետությունը հանդիսանում է հակամարտության կողմ եւ այդ որոշումը ցայսօր իրավական առումով մնում է ուժի մեջ»:

ԼՂՀ մայրաքաղաք Ստեփանակերտում տեղի ունեցած մամուլի ասուլիսի ժամանակ Նախագահ Սահակյանը, ողջունելով Մինսկի խմբի համանախագահների ջանքերը, կարծիք է հայտնել, որ նրանք պետք է վերանայեն իրենց որոշումը եւ վերականգնեն բանակցային գործընթացի իրական ձեւաչափը:

«Կարծում եմ՝  այս վերջին իրադարձությունները  հիմք կհանդիսանան, որ Մինսկի խմբի համանախագահողները շարունակեն իրենց ջանքերը, ինչը ողջունում ենք եւ վերանայեն իրենց դիրքորոշումը` վերականգնելով բանակցային գործընթացի լիարժեք ձեւաչափը», - շեշտել է Արցախի նախագահը:

Պատասխանելով լրագրողների հերցերին` Բ.Սահակյանը պարզաբանել է, որ բանակցային գործընթացում Արցախին լիարժեք որպես կողմ ներգրավելու պահանջն ամենեւին էլ կապված չէ Հայաստանի նկատմամբ անվստահության հետ, պարզապես տրամաբանությունն է այդպես հուշում, քանի որ հակամարտությունն ի սկզբանե եղել է Արցախի եւ Ադրբեջանի միջեւ: «Հայաստանը հանդիսանում է Արցախի անվտանգության երաշխավոր եւ բանակցային գործընթացին ուղղված մեր պահանջը կապված չէ Հայաստանի նկատմամբ մեր անվստահությունից Արցախի շահերը ներկայացնելու առումով: Մենք հանդես ենք գալիս տրամաբանության տեսանկյունից, քանի որ աշխարհում չկա որեւէ հակամարտություն, որտեղ լուծումները գտնում են առանց այդ հակամարտության հիմնական դերակատարի` հաշվի առնելով, որ սկզբնական փուլում չի եղել հակամարտություն Հայաստանի եւ Ադրբեջանի միջեւ, այլեւ Արցախի եւ Ադրբեջանի միջեւ, որտեղ վերջինիս հաջողվել է ներքաշել Հայաստանին», - ասել է ԼՂՀ Նախագահը: