Փաստ ինֆո

Մի շարք հասարարական կազմակերպություններ հանդես են եկել հայտարարությամբ՝ իրենց մտահոգությունը  հայտնելով պատերազմը վերսկսելու Ադրբեջանի  վարչակազմի փորձերի կապակցությամբ: Ինչպես հայտնում են Համալսարանական կրթությամբ կանանց ասոցիացիայից, հայտարարությունը  ներկայացվելու  է  Եվրոպայի անվտանգության և համագործակցության  կազմակերպությանը (ԵԱՀԿ), ԵԱՀԿ-ի Մինսկի խմբի համանախագահներին՝ ի դեմս Ռուսաստանի, ԱՄՆ-ի և Ֆրանսիայի ներկայացուցիչների,  Միավորված ազգերի կազմակերպության Անվտանգության խորհրդին, ՄԱԿ-Կանայք կառույցին և ի գիտություն՝ ՀՀ արտաքին գործերի նախարարությանը:

Հայտարարության մեջ ասված է.

«Մենք` Համալսարանական կրթությամբ կանանց ասոցիացիայի նախաձեռնությամբ և այլ հասարակական կազմակերպությունների մասնակցությամբ ապրիլի 2‐ին կայացած «Ընտրական օրենսդրությունը Հայաստանում ժողովրդավարական գործընթացների զարգացման համատեքստում» ֆորումի մասնակիցներս,

Արձագանքելով ապրիլի 1‐ի լույս 2‐ի գիշերը ղարաբաղա‐ադրբեջանական շփման գծի ողջ երկայնքով, նաև խաղաղ բնակավայրերի ուղղությամբ Ադրբեջանի կողմից տանկերի, հրետանու և օդուժի կիրառմամբ ձեռնարկված ակտիվ հարձակողական գործողությունների փաստին,

Դատապարտում ենք ադրբեջանական իշխանությունների՝ ռազմական գործողություններ սկսելու ագրեսիվ և հանցավոր որոշումը, որն արդեն իսկ հանգեցրել է զոհերի և վիրավորների, այդ թվում՝ ԼՂՀ խաղաղ բնակչության և, որ ավելի սարսափելի է, երեխաների շրջանում,

Մտահոգություն ենք հայտնում այդ գործողությունների անկանխատեսելի հետևանքների, ինչպես նաև այն միջազգային կառույցների դիրքորոշման կապակցությամբ, որոնք մինչև հիմա համարժեք չեն արձագանքել Ադրբեջանի կողմից արդեն մի քանի տարի շարունակվող հրադարարի ռեժիմի խախտման դեպքերին, այդ թվում Հայաստանի սահմանամերձ տարածքների ուղղությամբ, որոնք բազմաթիվ մարդկային կյանքեր են խլել նաև խաղաղ բնակչության շրջանում,

Հիմնվելով ՄԱԿ‐ի Անվտանգության խորհրդի «Կանայք, խաղաղությունն ու անվտանգությունը» թիվ 1325 բանաձևի և դրան հաջորդող առնվազն 7 նույնաբովանդակ բանաձևերի վրա, որոնք ուղղված են հակամարտությունների կանխարգելման և հաղթահարման գործում կանանց մասնակցության ընդլայնմանը,

Կոչ ենք անում ՄԱԿ‐ի և այլ միջազգային կառույցների ներկայացուցիչներին լսելի դարձնել Հայաստանի և Ղարաբաղի կանանց ձայնը և անհապաղ արձագանքել հակամարտության գոտում զինադադարի այս անգամ աննախադեպ կոպիտ խախտմանը՝ դրանով իսկ վերջ դնելով Ադրբեջանի վարչակազմի կողմից տարածաշրջանում լայնածավալ պատերազմական գործողություններ վերսկսելու անընդունելի փորձերին և Ղարաբաղյան հակամարտւթյունը բռնի ուժով լուծելու նպատակներին:

Հայաստանի, Լեռնային Ղարաբաղի մայրերն արդեն իսկ բարձր գին են վճարել 1991‐ին Ադրբեջանի կողմից սանձազերծված պատերազմի համար և համոզված են, որ հակառակ կողմում գտնվող Ադրբեջանի մայրերը նույնպես դեմ են պատերազմի վերսկսմանը, որի վտանգը խիստ մեծանում է միջազգային հանրության անտարբերության և դրանով իսկ Ադրբեջանի գործողությունների նկատմամբ անպատժելիության մթնոլորտի ստեղծման պարագայում:

Դիմում ենք նաև բարի կամքի տեր բոլոր մարդկանց, աշխարհի որ երկրում էլ նրանք գտնվեն, միանալ խաղաղության մեր կոչին՝ դատապարտելով Ադրբեջանի վարչակազմի՝ տարածաշրջանի ժողովուրդներին պատերազմի մեջ ներքաշելու փորձերը»:

Հայտարարությունն ստորագրել են «Համալսարանական կրթությամբ կանանց ասոցիացիա» ՀԿ` իր 30 մասնաճյուղերով, «Կանանց հանրապետական խորհուրդ», «ՊրոՄեդիա-Գենդեր», «Հայտուր», «Հոգևոր Հայաստան», «Համայնքների զարգացման և օրենսդրական բարեփոխումների կենտրոն», «Հասարակության զարգացման կանանց ասոցիացիա», «Աբովյանի ուսանողական խորհուրդ» և «Սոցիալական աջակցության համակարգչային կենտրոն» ՀԿ-ները:

«Փաստինֆո»-ն արդեն տեղեկացրել է, որ ապրիլի 1-ից 2-ի գիշերը ղարաբաղա-ադրբեջանական ուժերի շփման գծի ողջ երկայնքով հակառակորդի  ձեռնարկել է  ակտիվ հարձակողական գործողություններ՝  կիրառելով տանկեր, հրետանի և օդուժ:

ԼՂՀ ՊԲ ստորաբաժանումների ակտիվ գործողությունների արդյունքում շփման գծի ողջ երկայնքով հակառակորդը հետ է շպրտվել՝ տալով բազմաթիվ զոհեր: Հաստատված տվյալներով՝ ընդհանուր առմամբ, ապրիլի 1-ի լույս 2-ի գիշերը և օրվա ընթացքում տեղի ունեցած մարտական գործողությունների ընթացքում ադրբեջանական զինուժը տվել է 200-ից ավելի զոհ, ղարաբաղյան ուժերը  շարքից հանել են 4 տանկ,  2 անօդաչու թռչող սարք, 2 ուղղաթիռ:

Ադրբեջանական զինուժը գնդակոծում է նաեւ հայկական գյուղերը.  պրիլի 2-ին ժամը 08:30-ի սահմաններում  ՄՄ-21 («Գրադ») կայանքից իրականացված հրթիռահրետակոծության հետևանքով սպանվել է 2004թ. ծնված Վաղինակ Թաթուլի Գրիգորյանը, ևս երկու երեխա վիրավորվել են: Կորուստներ կան նաեւ զինված ուժերում. զոհվել է 18, վիրավորվել 35 զինծառայող:

Ապրիլի 3-ի վաղ առավոտյան` ժամը 06-ից հակառակորդը հրթիռահրետանային միջոցների և զրահատեխնիկայի կիրառմամբ շարունակել է ագրեսիվ ռազմական գործողությունների վարումը: