Փաստ ինֆո

Ռուսաստանը հետամուտ է լինելու, որպեսզի Թուրքիան պահպանի լրագրողների պրոֆեսիոնալ գործունեության ազատությունն ապահովող նորմերը: Ըստ ՏԱՍՍ-ի, ԵԱՀԿ-ում ՌԴ մշտական ներկայացուցիչ Ալեքսանդր Լուկաշևիչը հայտարարել է  այս մասին «Ռոսիա 24» հեռուստաալիքի եթերում՝  խոսելով «Իսլամական պետություն» ահաբեկչական խմբավորման զինյալներին թուրքական իշխանությունների կողմից զենքի մատակարարումների հոդվածի համար թուրքական «Ջումհուրիեթ»  թուրքական թերթի աշխատակիցներ Ջան Դյունդարի ու Էրդեմ Գյուլի կալանավորման մասին:

Լուկաշևիչը հիշեցրել է, որ ԶԼՄ-ների ազատության հարցերով ԵԱՀԿ ներկայացուցիչ Դունյա Միյատովիչը մտահոգություն է հայտնել լրագրողներին հետապնդելու առնչությամբ: «Լրագրողների պրոֆեսիոնալ գործունեության ազատության իրավունքը ոչ ոք չի վերացրել, և դրա համար պետք է պայքարենք ոչ միայն մենք, այլև խոշոր ու ազդեցիկ պետությունների մի ամբողջ շարք՝ ներառյալ ԱՄՆ-ն»,- ասել է նա:

«(ԵԱՀԿ հանդեպ քաղաքական պարտավորությունները) չկատարելու համար, բնականաբար, պատասխանատվություն է առաջ գալիս: Այս կոնկրետ դեպքում միջազգային հանրության և մասնագիտացված կազմակերպությունների ու ինստիտուտների ճնշման տակ կարող է վերանայվել որոշումը: Հնարավոր են այլ տարբերակներ»,- ընդգծել է Լուկաշևիչը:

ԵԱՀԿ-ում ՌԴ մշտական ներկայացուցիչը նշել է, որ Թուրքիայում լրագրողներին ճնշելու թեման առաջին պլան է մղվում և՛ ԱՄՆ-ի, և՛ Եվրամիության կողմից: «ԵԱՀԿ-ում արձագանքը, նույնիսկ Թուրքիայի այնպիսի մոտիկ դաշնակիցների կողմից, ինչպիսին են ԱՄՆ-ն ու Եվրամիությունը, ցույց է տալիս, որ այդ թեման անհանգստացնում է շատ-շատերին»,- ասել է նա:

«Մենք մշտապես հիշեցնում ենք թուրքական կողմին նրա պարտավորությունների մասին՝ ԵԱՀԿ-ի, և այլ, այդ թվում՝  նույն այդ Եվրոպայի խորհրդի կոնվենցիոն նորմերի առջև: Թեման շարունակվում է: Այն դեռևս չի ստացել որևէ համարժեք պատասխան թուրքական ներկայացուցիչների կողմից, ովքեր հղում են կատարում նման գործողությունների իրավաչափությանը ներքին օրենսդրության տեսանկյունից, բայց այնուամենայնիվ մենք գիտենք, որ միջազգային պարտավորությունները վեր են պետության կողմից ստանձնվող ներքին իրավունքից»,- եզրափակել է Լուկաշևիչը:

2015թ. հունիսին «Ջումհուրիեթ» թերթը հայտնել է, որ Թուրքիայի նախագահ Ռեջեփ Թաիփ Էրդողանը դատի է տվել թերթի գլխավոր խմբագիր Ջան Դյունդարին իբր Սիրիա զենք տեղափոխող ազգային հետախուզական ծառայության բեռնատարների սկանդալային զննության մասին նրա հրապարակման հետ կապված: Դյունդարը և թերթի Անկարայի բյուրոյի ղեկավար Գյուլը անցյալ տարվա նոյեմբերին կալանավորվել էին: Ստամբուլի դատախազությունը մեղադրական եզրակացություն էր նախապատրաստել և մեղադրյալների համար պահանջել ցմահ բանտային ժամկետներ: Նրանց մեղսագրվում է պետական դավաճանության, պետական գաղտնիքի բացահայտման, լրտեսական գործունեության, պետական իշխանության մարմինների մասին սուտ տեղեկություններ տարածելու ու զրպարտության մեղադրանքներ:      

Մինչդեռ այս տարվա փետրվարի 25-ին Սահմանադրական դատարանը որոշել է, որ լրագրողների կալանավորումը նրանց իրավունքների ու ազատությունների խախտում էր: Այդպիսով ՍԴ-ն՝ որպես բարձրագույն դատական ատյան, հանրության կարծիքով, լրագրողների ազատ արձակվելու համար ճանապարհ է բացել: ՍԴ-ն իր որոշումն համապատասխան դատական ատյաններին է ուղղել՝ պահանջելով «ուղղել թույլ տրված խախտումը»: