Փաստ ինֆո

Ավան և Նոր-Նորք վարչական շրջանների ընդհանուր իրավասության դատարանը՝ դատավոր Դավիթ Հարությունյանի նախագահությամբ, այսօր մերժեց ազատամարտիկ Վարդան Թումանյանի առողջությանը դիտավորությամբ միջին ծանրության վնաս պատճառելու մեջ մեղադրվող «Ջունգլ» մականվամբ Գևորգ Սարգսյանի նկատմամբ խափանման միջոցը փոխելու և կալանք կիրառելու վերաբերյալ դատախազի միջնորդությունը:

Հիշեցնենք, որ նախորդ նիստում դատախազը միջնորդել էր Գևորգ Սարգսյանի նկատմամբ ընտրված՝ խափանման միջոց չհեռանալու մասին ստորագրությունը փոփոխել և կալանավորել նրան:

Մինչև դատարանի կողմից դատախազի միջնորդության մերժումը՝ Գևորգ Սարգսյանի պաշտպան Թամարա Բաղդասարյանը ներկայացված միջնորդության դեմ առարկություններով հանդես եկավ, նշելով, որ մեղադրողի միջնորդությունն անհիմն է և ենթակա մերժման:

Ըստ պաշտպանի` մեղադրողի համար նման միջնորդությամբ հանդես գալու հիմք է հանդիսացել այն, որ Գևորգ Սարգսյանը հայտարարել է, որ գտնվել է իր բնակության վայրից դուրս և այնտեղ ձերբակալվել է:

Պաշտպանը դատարանի ուշադրությունը հրավիրեց այն հանգամանքի վրա, որ, ինչպես մեղադրողն է նշել, Սարգսյանը գտնվել է իր բնակության վայրից դուրս՝ այլ ոչ թե փոխել է իր բնակության վայրը, որի մասին պետք է տեղյակ պահեր վարույթն իրականացնող մարմնին:

Ավելին, պաշտպանը նաև նշեց, որ իր պաշտպանյալին պարզաբանվել է իր իրավունքները և պարտականությունները՝ առ այն, որ նա Հայաստանի Հանրապետության տարածքը լքելու իրավունք չունի առանց դատարանի թույլտվության, ինչը և չի արել, սակայն ունի ՀՀ տարածքում ազատ տեղաշարժի իրավունք:

Ինչ վերաբերում է մեղադրողի կողմից մատնանշվող այն հանգամանքին, որ Սարգսյանը դրսևորել է  ոչ պատշաճ վարքագիծ՝  պաշտպանը հակադարձելով նշեց, որ իր պաշտպանյալը չի խուսափել գործի քննությունից, որևէ կերպ չի խոչընդոտել, որևէ ազդեցություն չի ունեցել դատավարության մասնակիցների վրա:

Բացի նշվածները՝  Սարգսյանը օրենքով չթույլատրված արարք չի կատարել:

Ուստիև պաշտպանը միջնորդեց մերժել մեղադրողի միջնորդությունը:

Ըստ մեղադրանքի՝ Սարգիս Ղուկասյանը և Գևորգ Սարգսյանը Վիկտոր Հովսեփյանի հետ ծեծի են ենթարկել Վարդան Թումանյանին՝ դիտավորությամբ նրա առողջությանը պատճառելով միջին ծանրության վնաս՝ ատողջության տևական քայքայումով:

Սարգիս Ղուկասյանին, Գևորգ Սարգսյանին և Վիկտոր Հովսեփյանին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով՝ մի խումբ անձանց կամ կազմակերպված խմբի կողմից դիտավորությամբ առողջությանը միջին ծանրության վնաս պատճառելը: Նրանց նկատմամբ որպես խափանման միջոց է ընտրվել չհեռանալու մասին ստորագրությունը: