Փաստ ինֆո

Երևանի Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանության պատվեր տալու մեղադրանքով Նարեկ Խաչատրյանի վերաբերյալ գործով այսօր հարցաքննվել է պաշտպանության  ներքո գտնվող երկու վկաներից մեկը:

Վկան, մեր տեղեկություններով, պնդել է իր նախաքննական ցուցմունքները՝ նշելով, որ դրանք ճիշտ են ու համապատասխանում են իրականությանը:

Ըստ արդեն ուժի մեջ մտած նույն սպանության վերաբերյալ մեկ այլ գործով դատավճռի, վկան  իր ցուցմունքում հայտնել էր,  որ 2006թ. սկսած ծանոթացել է Արսեն Առուշանյանի հետ (նա սպանությունը կատարելու մեղադրանքով դատապարտվել է ցմահ ազատազրկման):

2007թ. հունիս ամսին Արսեն Առուշանյանը զանգահարել է իրեն, հանդիպել են Ջրվեժ կոչվող թաղամասում և Արսեն Առուշանյանը խնդրել է իրեն տանել Արամուս գյուղ, որտեղ կանգնել են Արսեն Առուշանյանի կողմից մատնացույց արված տան մոտ (ըստ գործի տվյալների, Արամուսում է գտնվում սպանության պատվեր տալու համար դատապարտված Ստեփան Հակոբյանի ամառանոցը): Ա. Առուշանյանն, ըստ պաշտպանության ներքո գտնվող վկայի ցուցմունքի, իջել է մեքենայից, մոտեցել դարպասներին, սակայն տանը մարդ չի եղել, որից հետո վերադարձել են քաղաք: Ճանապարհին Արսեն Առուշանյանն անընդհատ զանգահարել է ինչ-որ մեկին, սակայն չի կարողացել կապ հաստատել:

Նույն օրը երեկոյան կրկին Արսեն Առուշանյանին տարել է Արամուս, սակայն այդ տան դուռը կրկին բացող չի եղել և ետ են վերադարձել:

Հաջորդ դատական նիստում նույնպես դռնփակ կհարցաքննվի երկրորդ վկան, ում նկատմամբ նույնպես կիրառվել է պաշտպանության միջոց:

Նշենք, որ դատաքննության փուլում գտնվող Նարեկ Խաչատրյանի վերաբերյալ գործը Ս.Զատիկյանի սպանության պատվերի վերաբերյալ արդեն երկրորդ գործն է՝  նույն մեղադրանքով Ստեփան Հակոբյանի նկատմամբ կայացված դատավճիռը օրինական ուժի մեջ է մտել:

Ըստ մեղադրական եզրակացության, Նարեկ Խաչատրյանը Ստեփան Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով դրդել՝պատվիրել են սպանել Սեդրակ Զատիկյանին: Սպանությունը կատարվել է 2006 թվականի հունիսի 22-ին՝ արձակված կրակոցներից սպանվել են Սեդրակ Զատիկյանը և պատահական անցորդ Կարինե Սարգսյանը: