Փաստ ինֆո

Հայաստանում պաշտոնական այցով գտնվող Վրաստանի ԱԳ նախարար Միխեիլ Ջանելիձեի՝   Հայաստանի ԱԳ նախարար Էդվարդ Նալբանդյանի հետ հանդիպմանը քննարկվել է երկու երկրների ղեկավարների միջև ձեռք բերված պայմանավորվածությունների իրականացման ընթացքը, հայ-վրացական օրակարգի բազմաթիվ հարցեր:

Իր վրացի գործընկերոջ հետ համատեղ մամուլի ասուլիսին ՀՀ արտաքին քաղաքական գերատեսչության ղեկավարը նշել է, որ երկու  երկրների միջև առկա են գրեթե բոլոր ոլորտներն ընդգրկող ութ տասնյակից ավելի համաձայնագրեր: Այդ իրավապայմանագրային հարուստ դաշտը, երկուստեք շահագրգռվածությունը և պատրաստակամությունը լավ հիմք են` երկկողմ հարաբերությունները զարգացնելու համար: «Պայմանավորվեցինք նաև առավել ակտիվացնել երկու արտգործնախարարությունների միջև խորհրդատվությունները»,- նշել է ՀՀ ԱԳ նախարարը:

Արտգործնախարարները մտքեր են փոխանակել միջկառավարական հանձնաժողովի աշխատանքների շուրջ, քննարկվել են տրանսպորտային ենթակառուցվածքների զարգացման, էներգետիկ, առևտրատնտեսական, ֆինանսական, կրթական, զբոսաշրջության ոլորտներում համագործակցության հետ կապված հարցեր, խոսվել է նաև ակտիվ միջխորհրդարանական համագործակցության մասին։

«Մենք շարունակում ենք համագործակցությունը Վրաստանի հետ՝ հայկական մշակութային ժառանգության պահպանման առումով։ Հայաստանի Հանրապետության Նախագահի, Ամենայն Հայոց կաթողիկոսի՝ Վրաստանի ղեկավարների հետ միասին ներկայությունը Թբիլիսիի հայկական Սուրբ Գևորգ եկեղեցու վերաօծման արարողությանը դրա վառ վկայությունն է»,- ընդգծել է Է.Նալբանդյանը։

ՀՀ ԱԳ նախարարն իր գործընկերոջ տեղեկացրել է ղարաբաղյան հիմնախնդրի կարգավորման գործընթացի վերջին զարգացումների մասին։ «Այս առումով կարևոր է Վրաստանի աջակցությունը միջնորդության միջազգային մանդատ ունեցող միակ ձևաչափին՝ Մինսկի խմբի համանախագահների ջանքերին՝ ուղղված հիմնահարցի բացառապես խաղաղ հանգուցալուծմանը»,- ասել է ՀՀ արտգործնախարարը։

Էդվարդ Նալբանդյանն ընդգծել է նաև՝ ասել, թե Հայաստանի և Վրաստանի հարաբերությունները բարիդրացիական են, նշանակում է շատ քիչ բան ասել։ Այն ամենը, ինչը բնորոշում է երկու ժողովուրդներին, սերտորեն շաղկապված են։ «Եվ դա պատահական չէ, քանի որ մենք կողք կողքի ապրում ենք հազարավոր տարիներ։ Սա փոխադարձ հարգանքի վրա հիմնված և ժամանակով ստուգված բարեկամություն է։ Այս հարաբերությունները շարունակում են ընդլայնվել ու խորանալ մեր երկու երկրների միջև՝ ունենալով նաև այնպիսի կապող օղակ, ինչպիսին է վիրահայությունը»,- հավելել է ՀՀ արտգործնախարարը՝ ընդգծելով, որ Հայաստանի և Վրաստանի միջև չկան խնդիրներ, կան հարցեր, որոնք համատեղ ջանքերով լուծվում են։