Փաստ ինֆո

Հերթական ընտանեկան դրամայի գործով  դատարանն ամբաստանյալ Արամայիս Օհանյանին մեղավոր է ճանաչել ՀՀ քրեական օրենսգրքի 112-րդ  հոդվածի 1-ին մասով՝ դիտավորությամբ առողջությանը ծանր վնաս պատճառելը, և 137-րդ  հոդվածի 1-ին մասով՝ սպանության սպառնալիքը, և դատապարտել ընդհանուր առմամբ  6 տարի 6 ամիս ժամկետով ազատազրկման: Այս մասին «Փաստինֆո»-ին հայտնեցին   ՀՀ դատական դեպարտամենտի Հասարակայնության հետ կապերի և արարողակարգի վարչությունից:

Մեղադրողն իր մեղադրական ճառում քրոջ  առողջությանը  կյանքին վտանգ սպառնացող ծանր վնաս պատճառելու և դա թաքցնելու նպատակով քրոջը սպանության սպառնալիքներ տալու մեջ մեղադրվող Արամայիսին միջնորդել էր դատապարտել հինգուկես տարվա ազատազրկման: 

Իր ճառում մեղադրողը  նշել էր, որ արարքը ճիշտ է  որակված ու հիմնավորված է:  Մեղադրողը պնդեց մեղադրանքն, ըստ որի Արամայիսը Երևանի առանձնատանն իր հետ նույն հարկի տակ բնակվող քրոջը մեղադրելով իր ամուսնալուծության պատճառ հանդիսանալու մեջ, 2015թ. օգոստոսի 07-ին ժամը 01:00-ի սահմաններում, ալկոհոլ օգտագործած վիճակում, ծեծի է ենթարկել նրան և դիտավորությամբ վերջինիս առողջությանը պատճառել կյանքին վտանգ սպառնացող ծանր վնաս:

Բացի այդ, Արամայիսը քրոջը  մարմնական վնասվածքներ պատճառելուց հետո, 2015թ. օգոստոսի 7-ից մինչև օգոստոսի 26-ն ընկած ժամանակահատվածում բազմաթիվ անգամ քրոջը սպառնացել է դեպքի հանգամանքները ոստիկանության աշխատակիցներին հայտնելու դեպքում նրան սպանել:  Քույրն էլ սպառնալիքն իրական համարելով` ոստիկանության աշխատակիցներին հայտնել է, որ իբրև տան նկուղում վայր ընկնելու հետևանքով է ստացել այդ վնասվածքները:

Մեղադրողը նշել էր, որ Արամայիսը իրարամերժ, մտացածին  ցուցմունքներ է  տվել, ինչով նպատակ է ունեցել խուսափել քրեական պատասխանատվությունից ու պատժից: Դատարանում  ամբաստանյալն իրեն մեղավոր չի ճանաչել, հայտնել է, որ երկու անգամ ապտակել է քրոջը, սպանության սպառնալիքներ էլ չի տվել:

Նախաքննության ժամանակ ամբաստանյալը հայտնել է, որ տարիներ առաջ «քույրը ներխուժել է իր անձնական կյանք», որի պատճառով ընտանիքը քայքայվել է, կինն ու երեխաներն էլ հեռացել են: Քրոջ հետ առերեսվելիս Արամայիսն ընդունել է մեղադրանքը:

Մեղադրողը որպես ծանրացնող հանգամանքներ նշել է ալկոհոլի ազդեցության տակ ծանր մարմնական վնաս պատճառելը, այդ հանցագործությունը թաքցնելու համար սպանության սպառնալիքներ տալը: 

Դատարանը տուժող կնոջը, ով դատարան էր ներկայացել հաշմանդամի սայլակով,  պարզաբանեց, որ, մասնավորապես, սպանության սպառնալիքի հոդվածով եղբայրը կարող է քրեական հետապնդման չենթարկվել, եթե ինքը չպնդի բողոքը ու հաշտվի եղբոր հետ, սակայն տուժողը չհրաժարվեց բողոքից ու հայտարարեց՝ թող պատժվի:

Ամբաստանյալն ի պատասխան հայտարարել է, որ քույրը վախենում է, որ քննիչը կարող է իր հետևից ընկնել: Ամբաստանյալը նորից պնդել է, որ «երկու չափալախ» է տվել, պատուհանից ցատկելու հետևանքով ոտքը կոտրած քրոջը տուն է բերել, կապել ոտքը: Ամբաստանյալն սպառնաց՝  «ես ինձ վնաս տալու եմ»: Տուժողը, սակայն, պնդեց, որ այն, ինչ որ գրված է, իրականություն է: