Փաստ ինֆո

Դատարանում այսօր սկսվեց սպանության և ապօրինի զենք ու ռազմամթերք ձեռք բերելու, կրելու ու պահելու վերաբերյալ  գործով դատաքննությունը:

Գործով ամբաստանյալը 39-ամյա Գագիկ Ղանդիլյանն է:  Սպանության դրդապատճառն, ըստ մեղադրական եզրակացության,  հետևյալն է՝  2015թ. հուլիսի 6-ին ժամը 13:00-ի սահմաններում Երևան քաղաքի Նոր Արեշ թաղամասում տեսել է  տան մոտ նստած տուժող Վ.Ասոյանին, հիշել, որ նա շուրջ երեք տարի առաջ հեռախոսազրույցում իրեն հայհոյել է, գնացել է,  լիցքավորել ապօրինի կերպով ձեռք բերված  «ԱԿ» տեսակի ինքնաձիգը: Ապա այն պահելով տուժողի ուղղությամբ՝ կրակոցներ է արձակել, որի հետևանքով ստացած վնասվածքներից տուժողը մահացել է, իսկ ամբաստանյալը մեքենայով փախուստի է դիմել:

Տուժող կողմը գտնում է, որ, մասնավորապես,  սպանության մասով ամբաստանյալի արարքը ճիշտ չէ որակված: Տուժողի իրավահաջորդի ներկայացուցիչ, փաստաբան Սեդա Սաֆարյանը դիմել է դատարանին՝ խնդրելով գործը վերադարձնել մեղադրողին: Դատարանը միջնորդությունը մերժել է, քանի որ մինչ այդ դատարանն  արդեն իսկ մինչդատական վարույթում խախտումներ չէր հայտնաբերել և դատական քննություն նշանակելու որոշում էր կայացրել, ուստի արարքի որակմանը դատարանը կանդրադառնա արդեն  դատական ակտում:

Ամբաստանյալ Գագիկ Ղանդիլյանն իրեն մեղավոր ճանաչեց մեղադրանքում ու հայտնեց, որ երկուսուկես մլն դրամի քաղհայցի վերաբերյալ իր դիրքորոշումը կհայտնի լրացուցիչ:

Ամբաստանյալը ունի թերի բարձրագույն կրթություն, Ճարտարագիտական համալսարանի քիմիական ֆակուլտետի երրորդ կուրսից դադարեցրել է ուսումը, 12, 11 և 7 տարեկան երեք անչափահաս  երեխաների հայր է,  վատառողջ է՝ երիկամի վիրահատություն է տարել, ինչպես նաև, իր արտահայտությամբ, հոգեկան է, գլխացավեր ունի, բանտում բուժում է ստացել: Աշխատել է Ռուսաստանում:

Ի պատասխան տուժող կողմի ներկայացուցչի հարցերի,  ամբաստանյալը չկարողացավ հայտնել, թե վերջին հինգ տարվա ընթացքում երբ է մեկնել Ռուսաստան  ու  երբ վերադարձել, պատճառաբանելով, որ չի հիշում: Միայն ասաց, որ անցյալ տարվա գարնանն է վերադարձել  Հայաստան: Չի հիշում նաև, թե իրեն ինչու էին կանչել ոստիկանություն՝ փոքր է եղել:

Դատարանի սահմանած ապացույցների հետազոտման կարգի համաձայն, նախ կհարցաքննվեն գործով 4 վկաները, տուժողի իրավահաջորդը, կհետազոտվեն գործի գրավոր նյութերը, վերջում ցանկության դեպքում ցուցմունքներ կտա ամբաստանյալը:

Դատական նիստը հետաձգվեց, քանի որ պարզվեց, որ թեև ամբաստանյալը ստացել է մեղադրական եզրակացությունը,  սակայն կարդացել ու գցել է, ուստի պաշտպանական կողմը միջնորդեց հետաձգել դատական նիստը՝ իրենց հնարավորություն տալով  ծանոթանալ մեղադրական եզրակացությանը, ինչպես նաև դատակոչված վկաների ցանկին: