Փաստ ինֆո

Հարություն Քուշկյանն Արցախ է գնացել երկու տարի առաջ, իր առջև դնելով որոշակի ծրագրեր՝ զարգացնել Ղարաբաղի առողջապահության համակարգը, օգտագործել իր գիտելիքները, հնարավորություններն ու ներուժը: Ինքը գնացել է մի քանի մեծ ռազմավարական նշանակության ծրագրեր իրականացնելու ու այժմ վերադարձավ: Այս մասին «Փաստինֆո»-ի թղթակցին ասաց Հարություն  Քուշկյանի մամլո քարտուղար Շուշան Հունանյանը՝ ընդգծելով, որ Քուշկյանի՝ ԼՂՀ առողջապահության նախարարի պաշտոնից ազատվելու որևէ պատճառ այլ չկա:

Ի պատասխան մեր դիտարկմանը, թե մի փոքր անսպասելի էր նրա որոշումը, հատկապես, որ նախօրեին այցելել էր Արցախի ուռուցքաբանության դիսպանսերի նոր կառուցվող շենքը, Շ.Հունանյանը նշեց, թե անսպասելի չէր, «որովհետև ինքը, թեև ազատվել է ԼՂՀ առողջապահության նախարարի պաշտոնից, բայց, ինչպես ինքն է խոստացել, շարունակելու է, այսինքն՝ էլի հաճախ գնալու է Ղարաբաղ, հետևելու է այդ շինարարության ընթացքին, այսինքն՝ սեպտեմբերին, ինչպես և խոստացվել է, այդ կենտրոնը բացվելու է,  էլի Երևանի «Էրեբունի» և «Նաիրի» բժշկական կենտրոնների հետ կապը լինելու է»:

Շ.Հունանյանի պարզաբանմամբ՝ այս երկու տարիների ընթացքում վերոհիշյալ երկու բժշկական կենտրոնները համագործակցել են Ղարաբաղի բժիշկների հետ. «Մեր բժիշկները գնացել են Ղարաբաղ, նրանց բժիշկներն եկել են մեզ մոտ վերապատրաստման»:

«Ինքը վերադառնում է տուն. երկու տարի ապրել է հյուրանոցում: Հայաստանում ինքն ունի բազմաթիվ բիզնեսներ, իր հիվանդանոցները, իր սեփական գործը»,-հավելեց Շ.Հունանյանը:

Ինչպես արդեն հայտնել ենք, Արցախի Նախագահ Բակո Սահակյանն այսօր հրամանագիր է ստորագրել` Հարություն Քուշկյանին ԼՂՀ առողջապահության նախարարի պաշտոնից ազատելու մասին ` իր դիմումի համաձայն։