Փաստ ինֆո

Աղմկահարույց ՝  նոր բանդայի գործի շրջանակում՝ Փաստաբանների պալատին ուղղված դատարանի դիմումի հիման վրա կարգապահական վարույթ է հարուցվել գործով պաշտպաններ, փաստաբաններ Լիպարիտ Սիմոնյանի ու Արմեն Ֆերոյանի նկատմամբ:

Ինչպես   «Փաստինֆո»-ի լրագրողին հայտնեց Փաստաբանների պալատի Խորհրդի անդամ, փաստաբան Լիպարիտ Սիմոնյանը, ինքն  առարկություններ է ներկայացրել վարույթի առնչությամբ՝  փաստաբանը շեշտում է  իր և իր գործընկերոջ կողմից  Կանոնագրքի 4.1 ենթակետի պահանջների խախտում թույլ չի տրվել:

Փաստաբանը պարզաբանեց, որ իր պաշտպանյալ Ռաֆայել Հարոյանը և Արմեն Ֆերոյանի պաշտպանյալ Հայկ Կոջոյանը 29.10.2015թ. Դատավոր Ա.Վարդանյանի  կողմից դատական նիստերի դահլիճից  10 ժամ ժամանակով հեռացվել էին անօրինական և առանց հիմնավոր պատճառների, ամբաստանյալները դատական նիստի կարգը չէին խախտել: Պարզապես  նրանք   իրենց թույլ էին տվել պահանջելու՝ կատարել օբյեկտիվ և բազմակողմանի քննություն:

05.11.2015թ-ի դատական նիստի ժամանակ փաստաբանները միջնորդել էին` մինչև դատական սանկցիայի կիրառման ժամկետի լրանալը վերականգնել ամբաստանյալների մասնակցությունը դատական նիստին /միջնորդության հիմնավորումներում նշված է նաև կիրառված սանկցիայի անհիմն լինելու վերաբերյալ փաստարկներ/, սակայն Դատարանը անհիմն մերժել է ներկայացված միջնորդությունը:  Ըստ Լ.Սիմոնյանի,  տվյալ դեպքում Դատարանը կիրառել է երկակի ստանդարտներ, մինչ այդ 10 ժամով դատական նիստերի դահլիճից հեռացված մեկ այլ ամբաստանյալի` Է.Ալիխանյանի պաշտպանի նույնաբովանդակ միջնորդությունը բավարարվել  է,  և ամբաստանյալը սանկցիան կիրառվելուց րոպեներ անց վերադարձվել  է նիստերի դահլիճ,  իսկ Ռաֆայել Հարոյանի և Հայկ Կոջոյանի մասով  միջնորդությունը մերժվել է:

Ըստ Լ.Սիմոնյանի, իր և Ա.Ֆերոյանի կողմից  դատական նիստերի դահլիճը լքելը բխել է իրենց  պաշտպանյալների շահերից, այլապես դահլիճում մնալու դեպքում իրենք  ակամայից կդառնային  իրենց  պաշտպանյալների դեմ իրականացվող ոչ օբյեկտիվ դատավարության մասնակիցներ և իրենց  ներկայությամբ ցույց կտրվեր արդար դատաքննության իմիտացիա:  «Բացի այդ,  ես որևէ կերպ չեմ պատկերացնում իմ ներկայությունը դատական նիստերի դահլիճում առանց այն անձի,  ում շահերը ներկայացնում եմ որպես պաշտպան»,- նշեց փաստաբանը՝  հավելելով, որ  թե՛ իր,  թե՛ Արմեն Ֆերոյանի կողմից բազմիցս  դատավոր Ա.Վարդանյանին ներկայացվել են ինքնաբացարկի միջնորդություններ, առարկություններ:   «Հարկ եմ համարում շեշտել, որ դրան հաջորդող նիստի ժամանակ Դատարանը առանց որևէ օրինական հիմքերի դատական նիստերի  դահլիճից հեռացրեց ևս մեկ ամբաստանյալի` Կարեն Վարդանյանին, իսկ հաջորդող նիստերին՝ բավարարելով պաշտպանական կողմի նույնաբովանդակ միջնորդությունը,  երեք ամբաստանյալներին, առանց սանկցիայով սահմանված ժամկետի լրանալու,  վերադարձրեց դատական նիստերի դահլիճ»,- ասաց փաստաբանը՝  նշելով, որ եթե իր պաշտպանյալը չգտնվի դատական նիստերի դահլիճում /հեռացվի/, ապա ինքը կրկին կլքի դատական նիստերի դահլիճը:

Լիպարիտ Սիմոնյանը գտնում է, որ դատարանի 2015թ.  նոյեմբերի 5-ի որոշման մեջ  դատարանը վերը նշված որոշումը  կայացնելիս հաշվի է առել նաև այն, որ 7 օրվա հաճախականությամբ դատական նիստերը նշանակելու, սակայն 1 տարի 7 ամիս քննվող, 9 ամբաստանյալների վերաբերյալ տվյալ գործով նշանակված 50 դատական նիստերից 27-ը չեն կայացել, այդ կերպ գործի քննությունն արհեստականորեն ձգձգվել է գլխավորապես պաշտպանների, եզակի դեպքերում` ամբաստանյալների դատական նիստերին չներկայանալու հիմքով կամ այդ կապակցությամբ նրանց դիմումները կամ հարուցված միջնորդությունները լուծելու հետևանքովե  պատճառաբանության իսկությունը և իրենց առնչվելը պարզելու համար  դատարանից պետք է  պահանջվեն  հետևյալ ապացույցները` արդյո՞ք պաշտպաններ` Լ.Սիմոնյանի և Ա.Ֆերոյանի նկատմամբ դատական սանկցիայի կիրառումը պայմանավորված էր նաև նախորդ դատական նիստերին  նրանց բացակայությունների   և հարուցած միջնորդությունների   պատճառով,   թե՞ ոչ, արդյո՞ք պաշտպաններ Լ.Սիմոնյանի և Ա.Ֆերոյանի նկատմամբ դատական սանկցիայի կիրառումը պայմանավորված էր մասնակցող բոլոր պաշտպանների /թվով 9-12/ կողմից դատական նիստերի բացակայությունների և հարուցած միջնորդությունների պատճառով, թե՞ ոչ: Եթե այո, ապա դատարանից պետք է պահանջվեն ապացույցներ` պաշտպաններ Լ.Սիմոնյանի և Ա.Ֆերոյանի կողմից դատական նիստերից բացակայելու օրերի վերաբերյալ:

Դատարանի հիշյալ  որոշման  մեջ նշված է նաև, որ  «հաշվի առնելով քննվող գործի առանձնահատկությունները, այդ թվում` ամբաստանյալների և նրանց պաշտպանների բազմաթվությունը, գլխավորապես պաշտպանների բացակայությամբ պայմանավորված նիստերի հետաձգման բազմաթիվ դեպքերը` Դատարանն արձանագրում է, որ պաշտպաններ Լ.Սիմոնյանի և Ա.Ֆերոյանի նկատմամբ ՀՀ քրեական դատավարության օրենսգրքի 314.1 հոդվածով նախատեսված առավել մեղմ դատական սանկցիայի` նախազգուշացման կիրառումը գործնականում չէր ապահովի Դատարանի  հետագա գործունեության բնականոն ընթացքը, որով և պայմանավորված է հատկապես սույն դատական սանկցիայի ընտրությունը և ՀՀ Փաստաբանների պալատ դիմելու անհրաժեշտությունը»:  Փաստաբանը գտնում է նաև, որ պետք է պարզվի, թե դատարանը պաշտպաններ    Լ.Սիմոնյանի և Ա.Ֆերոյանի նկատմամբ առավել խիստ սանկցիան կիրառել է ամբաստանյալների և նրանց պաշտպանների բացակայության բազմաթվության պատճառո՞վ, թե՞ դատական նիստերի դահլիճը առանց նիստը նախագահողի թույլտվության լքելու պատճառով:

Եթե   բացակայությունների պատճառով, ապա պետք է պահանջվեին այդ բազմաթիվ բացակայությունները հիմնավորող ապացույցները և այդ դեպքում ակնհայտ կլիներ, որ այդպիսիք առկա չեն:

Իսկ եթե ոչ,  Լ.Սիմոնյանի և Ա.Ֆերոյանի, այլ մասնակցող մյուս 7-10 պաշտպանների և թվով 9 ամբաստանյալների բազմակի բացակայության պատճառով, ապա ակնհայտ է, որ իրենց՝  Լ.Սիմոնյանի և Ա.Ֆերոյանի, նկատմամբ կարգապահական վարույթը ենթակա է կարճման, քանի որ սույն կարգապահական գործ հարուցելու համար հիմք հանդիսացած դատավոր Ա.Վարդանյանի որոշումը, դատական սանկցիայի տեսակի /խստության/ առումով  կիրառվել է ոչ թե Լ.Սիմոնյանի և Ա.Ֆերոյանի գործողությունների, այլ մյուս պաշտպանների և ամբաստանյալների բացակայությունների պատճառով:

«Իմ և Ա.Ֆերոյանի բախտը որոշ չափով բերել է, որ մեղադրողի կողմից դատական նիստերին չներկայանալու հանգամանքը նույնպես չի դրվել մեր նկատմամբ սանկցիայի կիրառման հիմքում», - նշեց փաստաբանը՝  հավելելով, որ իրենց կողմից մատնանշած  ապացույցները դատարանից պահանջվելուց հետո, Խորհրդի նիստի քննությանը կներկայացվեն  նաև  այլ հիմնավորումներ և ապացույցներ: