Փաստ ինֆո

«Արմենիա»  ՀԲԿ-ի վերակենդանացման և սուր թունավորումների բաժանմունքում միջադեպի գործով այսօրվա դատական նիստում ամբաստանյալ Հարություն Մկրտչյանն իրեն մեղավոր չճանաչեց  ՀՀ քրեական օրենսգրքի երեք հոդվածներով առաջադրված մեղադրանքում:

Ամբաստանյալը մեղադրվում է   ՀՀ քրեական օրենսգրքի 112-րդ հոդվածի 2-րդ մասի 2-րդ կետով՝ ծառայողական գործունեության հետ կապված անձի առողջությանը  դիտավորությամբ ծանր վնաս պատճառելը, 258-րդ հոդվածի 4-րդ մասով՝  որպես զենք օգտագործվող առարկաների գործադրմամբ կատարված խուլիգանություն,  և 316-րդ հոդվածի  2-րդ մասով՝  իշխանության ներկայացուցչի նկատմամբ կյանքի կամ առողջության համար վտանգավոր բռնություն գործադրելը: 

Ամբաստանյալը հայտարարեց, որ ինքը երկու-երեք շիշ գարեջուր է խմել, վատացել, շտապօգնությունը նրան անգիտակից վիճակում տեղափոխել է հիշյալ բժշկական կենտրոն: Երբ «կաթիլային» են միացրել, աչքերի  առջև սևացել է (իր հետ էլի են նման դեպքեր եղել, ինքը սրտի հետ կապված խնդիրներ ունի): Ինքը փորձել է ազատվել ներարկումից ու դուրս պրծնել բաժանմունքից: Ամբաստանյալը նշեց, որ ինքը ոչ ոքի չի խփել, պարզապես փորձել է հրելով դուրս գալ տարածքից, ինքը ֆիզիկապես ի վիճակի չի եղել կռիվ անելու,  ոչ էլ թթվածնի բալոն շպրտելու:  Ամբաստանյալն ընդգծեց նաև, որ ոստիկանին չի ծեծել ու նրան կոտրվածք չի պատճառել:

Հ.Մկրտչյանը նշեց, որ հակառակը՝ ինքն է  ծեծի ենթարկվել և՛ հիվանդանոցի բաժանմունքում, որտեղ 6-7 անվտանգության աշխատակից ու ոստիկան ծեծել են իրեն,  և՛ ոստիկանության բաժնում, որտեղ տասը հոգով իրեն ծեծել են, ապա  վնասվածքներով  իրեն տեղափոխել են  հիվանդանոց:

Ամբաստանյալը դժգոհություն հայտնեց նաև, որ իր նկատմամբ  դատաբժշկական փորձաքննությունն անց է կացվել դեպքից երկու ամիս անց՝ բժիշկներն իր վնասվածքները չեն տեսել: Հ.Մկրտչյանը հայտնեց նաև, որ ինքը կողոսկրերի կոտրվածքներ  է ստացել, սակայն  հետագայում իմացել է, որ ռենտգեն հետազոտության ժապավենը կորել է:

Ի պատասխան մեղադրողի հարցի՝ ամբաստանյալը հայտարարեց, որ վկաները սուտ են խոսել՝ բժիշկներին ու ոստիկաններին են պաշտպանել: Պաշտպանական կողմը մեղադրողի  հարցադրումներն  գնահատեց որպես ոչ կոռեկտ, ըստ պաշտպանական կողմի, պատկերն այլ է եղել, վկաները շփոթվել են, չեն կարողացել հստակ ցուցմունքներ տալ ու հիմնավորել քննիչին հայտնած իրենց իսկ ցուցմունքները: Ուստի նման հարց տալիս մեղադրողը պետք է հստակ նշեր կոնկրետ որ վկայի մասին է խոսքը:

Գործով երկրորդ ամբաստանյալը՝ Արգիշտի Գոմցյանը (մեղադրվում է  ՀՀ քրեական օրենսգրքի  316-րդ հոդվածի 1-ին մասով՝ իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը) հայտարարեց, որ երբ ընկերոջը՝ Հարություն Մկրտչյանին,  տեղափոխել են հիվանդանոց, ոչ բժիշկը, ոչ բուժքույրը նորմալ չեն վերաբերվել, ոչ մի օգնություն ցույց չեն տվել, անմարդկային վերաբերմունք են ցույց տվել: Ըստ Ա.Գոմցյանի, ընկերը ոստիկանին չի հարվածել, հրել է ու իջել  պատգարակից, ընդհանրապես չի գիտակցել, թե որտեղ է գտնվում:

 Դատարանում սկսվեց գործի գրավոր ապացույցների հետազոտումը: Ամբաստանյալ Հարություն Մկրտչյանի պաշտպան Վահագն Մանուկյանը դատարանի ուշադրությունը հրավիրեց դեպքի վայրի զննության արձանագրության վրա՝ դրանում ոչ թե արձանագրված են  կոտրված իրերը, թթվածնի բալոնը, այլ դրանցում տեղ են գտել  դեպքի մասնակիցների ցուցմունքները: Պաշտպանն ընդգծեց, որ ցուցմունք տալու համար այլ ընթացակարգ է նախատեսվում,  զննությունը չի համապատասխանում օրենքի տառին, կատարվել  է օրենքով նախատեսված ընթացակարգի կոպիտ խախտմամբ: Մասնավորապես, նշվում է, որ հավաքարարը մաքրել է ապակիները, այդ դեպքում ինչո՞ւ պատշաճորեն չի պահպանվել դեպքի վայրը, նշեց պաշտպանը: Վ.Մանուկյանը հայտնեց նաև, որ փորձաքննություն նշանակելու որոշմանը իր պաշտպանյալին չեն ծանոթացրել: «Քննությունը վազքով է կատարվել, ու ես դա կապացուցեմ»,- ասաց նա:

Հիշեցնենք, որ ըստ մեղադրանքի, Հարություն Մկրտչյանն ու  Արգիշտի Գոմցյանը  Երևանի «Արմենիա» ՀԲԿ-ի վերակենդանացման և սուր թունավորումների բաժանմունքում կատարել են խուլիգանություն` կոպիտ կերպով խախտել են հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով` զուգորդված որպես զենք օգտագործվող առարկաների գործադրմամբ հիվանդանոցի գույքը վնասելով և անվտանգության աշխատակիցների նկատմամբ բռնություն գործադրելով: