Փաստ ինֆո

Պետական դավաճանության և նախապատրաստվող առանձնապես ծանր հանցագործության մասին տեղյակ լինելու և չհայտնելու գործով  այսօր սկսվեց ամբաստանյալների հարցաքննությունը:

Պետական դավաճանության մեջ մեղադրվող Կարինե Ղումաշյանը հայտարարեց, որ ինքը չի ընդունում և նախաքննության ընթացքում էլ չի ընդունել մեղադրանքը:  Նա դժգոհություն հայտնեց, որ իրեն ծաղրուծանակի ենթարկած  ազգային անվտանգությունը չի բացահայտել լրտեսներին: Ըստ ամբաստանյալի,  ինքը մինչև վերջ պայքարելու է, որպեսզի նրանք պատասխանատվության ենթարկվեն ու պատասխան տան   իր կանացի արժանապատվության ոտնահարման, քրեակատարողական հիմնարկում թափած արցունքի ամեն կաթիլի համար:  «Ես հանցագործ չեմ, ես չորս երեխայի մայր եմ: Մի՞թե ես  կարող էի դավաճանել իմ Աստծուն, իմ Հայրենիքին, առավել ևս իմ որդուն, ով կյանքը վտանգելով՝ ծառայում է սահմանին»,-   ասաց  նա:  Ի դեպ, ոմն Արմանի ու Սեյրանի վերաբերյալ գործից մաս է անջատվել լրտեսության հատկանիշներով: 

Ամբաստանյալը հայտնեց, որ Արմանի  հետ իրեն ծանոթացրել է գործով ամբաստանյալ Ռաֆիկ Պապոյանը՝ ասելով, որ բարեգործ է, եկած հայերին օգնում է: Արմանը խոսում էր արևմտահայերենով, իր մոտ որևէ կասկած սկզբնապես չի առաջացել, որ նա հայ է,  հակառակը շատ նորմալ, բարեկիրթ մարդու տպավորություն է թողել: «Բարեգործը» հայտարարել է, որ շատ ուրախ է, որ Կարինեի որդին ծառայում է բանակում՝  «մեր ազգին պետք են հերոս զավակներ»: Նա հավելել է, որ «լավ կլիներ, որ երեխաներիդ հետ մոտիկից ծանոթ լինեի»:

Կ.Ղումաշյանը հայտնեց, որ Արմանն իրեն ամուսնության առաջարկ է արել, ինքը չի ընդունել առաջարկը՝ ասելով, որ դրան կանդրադառնան, եթե իրենց հարաբերությունները հետագայում լավ լինեն: Արմանն ասում էր, որ ինքը ամուսնացած չէ, իսկ Կարինեն էլ ցանկանում էր   ամուսնալուծվել:  Ի դեպ, Արմանի հետ հանդիպումների ժամանակ վերջինս ներկայանում էր ակնոցներով, աչքերին կեպին քաշած: Երբ ցանկացել է կեպին գլխից հանել, Արմանի խփել է իր ձեռքին:  

Ինքը ցանկացել է գնալ Արմանի տուն, սակայն վերջինս ասել է, որ Հայաստանից գնալ-գալուց հետո իրենց ամուսնական կապն կօրինականացնեն, այն ժամանակ էլ կգա իր տուն:

Արմանն իրեն առաջարկել է, որպեսզի իր զինծառայող որդին սայթ բացի, որ ինքը՝ Արմանը հնարավորություն ունենա շփվել նրա հետ: Դա ամբաստանյալին տարօրինակ է թվացել, ուստի ինքը որդու անվամբ սայթ է բացել՝  որպեսզի որդու փոխարեն շփվի  նրա հետ ու հասկանա, թե ինչ է ուզում իմանալ իր զինծառայող որդուց, ուզում էր սեփական ուժերով բացահայտել Արմանին: 

Կ.Ղումաշյանը նշեց, որ ինքն Արմանին որդու զորամասի համարն ասել է, որ կասկած չառաջացնի, որ սոցցանցում Արմանի հետ շփվողն ինքն է և ոչ թե որդին: Նամակագրության ընթացքում ուսումնակա՞ն, թե՞  տանկային է  զորամասը հարցից ինքը հասկացել է, որ Արմանը լավ տեղեկացված է: 

Ամբաստանյալին տարօրինակ է թվացել նաև Արմանի արգելքը՝ իր հեռախոսահամարին չզանգել Հայաստանի տարածքից

Զինծառայող որդին նախազգուշացրել է՝ «այդ մարդու հետ չշփվել, ինքը միգուցե շպիոն է, ինչ գիտես, կարող է թուրք լինել», սակայն ինքը նրան չի լսել:  

Արմանի հանդեպ համակրանք ուներ, ամեն ինչ խառնվել էր ուղեղի մեջ: Միաժամանակ նա հավելեց, որ շատ-շատերը կարող էին ընկնել Արմանի ծուղակը: 

Նամակագրության մեջ «ասքյար ջան» բառերով դիմել է  Արմանին հեգնանքով, իր տպավորությամբ այդ բառը նշանակել է թուրք, ոչ թե թուրք զինվոր:  

Ըստ ամբաստանյալի, երբ հասկացել է՝ ով է Արմանը, հայհոյել է, և ասել, որ այլևս չշփվի իր հետ:

Հաջորդ դատական նիստում կշարունակվի ամբաստանյալների հարցաքննությունը: