Փաստ ինֆո

Դոնի Ռոստովում ավազակության, մարդու առևանգման ու մահվան հանգեցրած ծանր մարմնական վնասվածք հասցնելու գործով այսօրվա դատական նիստում ամբաստանյալ Արմեն Ղազարյանն այսօր հայտարարեց, որ գործը սկզբից մինչև վերջ շինծու է, ստի ու կեղծիքի վրա հիմնված, իսկ ինքն իրականում գործով  տուժող է:  «Չեմ մասնակցել ոչ առևանգմանը, ոչ 60 տարեկան կնոջ ծեծին: Ես որևէ հանցագործություն չեմ կատարել»,- ասաց նա:

Ա.Ղազարյանը հայտնեց, որ 1993թ.-ից մշտապես բնակվել է  Դոնի Ռոստովում, զբաղվել է գործարարությամբ, մասնավորապես, արևածաղկի յուղ է ներկրել Հայաստան, ունեցել է փափուկ կահույքի ու լիմոնադի արտադրամասեր:

Ըստ ամբաստանյալի, ինքը պարտքով 12 հազար դոլար է տվել իր ընկեր Իգոր Մոգիլևսկու ընկերուհուն՝  փաստաթղթով պարտավորեցնելով նրան մեկ տարի հետո պարտքը չվերադարձնելու դեպքում իրեն հանձնել նրա մերձավորներին  պատկանող բնակարանը: Սակայն մեկ տարի անց բնակարանը վաճառվել է այլ անձի, իր իրերը հայտնվել են փողոցում, իրեն հայտարարել են, որ պարտքը չեն վերադարձնելու:

Սակայն դրանով ամեն ինչ չի ավարտվել, հիշյալ  փաստաթուղթն իրենից  «առգրավել է» ոմն Վիտալիկ, որը միլիցիայում էր աշխատում, բայց նաև, ըստ ամբաստանյալի,  սերտաճել էր հանցավոր աշխարհի հետ: Իրեն ծեծի են ենթարկել ու գցել ջուրը, ինքը վնասվածքներով բուժօգնության է դիմել: Եվ Վիտալիկի գոյություն ունենալու և հիվանդանոց դիմելու հայտարարություններն, ըստ մեղադրողի, չեն հաստատվել: Ամբաստանյալը, մասնավորապես,  հայտարարեց, որ  հիվանդանոցում  ինքը չի գրանցվել:

Այդ դեպքում ինչո՞ւ ինքը չի դիմել իրավապահ մարմիններին մեղադրողի հարցին ի պատասխան ամբաստանյալը հայտարարեց, որ 2000թ. Ռոստովում հարցերը դատարանում չէին որոշվում:

Ամբաստանյալը հայտնեց, որ դեպքի օրը գնացել է դեպքի վայր, սակայն այնտեղ ոչ դիակ, ոչ արյան հետքեր չեն եղել, Մոգիլևսկին ասել է՝ ամեն ինչ վերջացել է, նա մահացած է, սկզբից նրան թվացել է, որ խոսքը Մոգիլևսկու ընկերուհու մասին է, սակայն հետո պարզվել է, որ մահացածը վերջինիս մայրն է: Մոգիլևսկին հավելել է՝ չէի ուզում, պատահական ստացվեց:

Ամբաստանյալի հարցաքննությունը կշարունակվի հաջորդ դատական նիստում:

Հիշեցնենք, որ ըստ մեղադրական եզրակացության, Արմեն Ղազարյանը 2000թ. մայիսին, նախնական համաձայնությամբ գործելով Ի. Մոգիլևսկու և քննությամբ չպարզված անձի հետ, առևանգել է Ս. Կրուգլովային և Ե. Տոլստիխին, նրանց պատկանող դրամական միջոցների գտնվելու վայրը պարզելու նպատակով: Խաբեությամբ նրանց տարել են դոնիռոստովյան  բնակարան, որտեղ  պահանջել են ասել տնային տնտեսության վաճառքից ստացված գումարի գտնվելու տեղը: Խոշոր չափի գումար գույքին տիրանալու նպատակով սկսել են նրանց ծեծի ենթարկել, որից Ե. Տոլստիխը գիտակցությունը կորցրել է և գիտակցության գալով,  չդիմանալով հարվածներին ասել է, թե որտեղ են գտնվում իրենց պահանջած գումարները:

Ըստ մեղադրական եզրակացության, այնուհետև Ղազարյանը գործելով ըստ նախնական համաձայնության Մոգիլևսկու և քննությամբ չպարզված հանցագործի հետ ուղևորվել է Տոլստիխի նշած հասցե,  որտեղ այդ պահին գտնվել են Ս. Կրուգլովայի և Ե. Տոլստիխի ծեր բարեկամները Յու. Կրուգլովը, Ա. Կրուգլովան, Ե. Պտուխան:

Ղազարյանը գնալով այդ հասցեով և օգտվելով այն հանգամանքից, որ իրեն նախկինում ծանոթ Կրուգլովը բացել է դուռը, մտել է բնակարան, որտեղ նախնական համաձայնությունը կատարելու նպատակով, քննությամբ չպարզված հանցագործի հետ Ս.Կրուգլովայի գումարին տիրանալու նպատակով սկսել է ծեծի ենթարկել նրանց,  որից հետո հափշտակել է Ս. Կրուգլովային պատկանող 6900 ԱՄՆ դոլար գումարը:

Բացահայտելով, որ Ս. Կրուգլովան ստացված հարվածներից մահացել է,   Ղազարյանը, Մոգիլևսկին և քննությամբ չպարզված հանցագործը Ս. Կրուգլովայի դիակը փաթաթել են փալասի մեջ և այն թողել բնակարանում, իսկ Ե. Տոլստիխին Մոգիլևսկին ստիպողաբար դուրս է բերել բնակարանից և ավտոմեքենայով տարել ք. Դոնի Ռոստովի Մալինովսկու փող, որտեղ  ավտոշուկայի շրջանում նրան բաց է թողել և թաքնվել:

45-ամյա Արմեն Ղազարյանը մեղադրվում է  ՀՀ քրեական օրենսգրքի 175-րդ հոդվածի 3-րդ մասի 3-րդ կետով՝  առողջությանը ծանր վնաս պատճառելով ավազակություն, 131-րդ հոդվածի 2-րդ մասի 1-ին, 6-րդ և 7-րդ կետերով՝ շահադիտական դրդումներով երկու կամ ավելի անձանց  առևանգելը, որը կատարվել է մի խումբ անձանց կողմից նախնական համաձայնությամբ, 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը: