Փաստ ինֆո

Միևնույն է, թեկուզ 12  տարի անց ճշմարտությունն ի հայտ է գալիս և արդարությունն էլ՝  վերականգնվում: Այս մասին «Փաստինֆո»-ի լրագրողի հետ զրույցում հայտարարեց  աղմկահարույց «Մատաղիսի գործով» արդարացվածներ Ռազմիկ Սարգսյանի, Մուսա Սերոբյանի ու Արայիկ Զալյանի փաստաբան Հայկ Ալումյանը:

Ինչպես հայտնել ենք, Մարդու իրավունքների եվրոպական դատարանն այսօր հրապարակել է «Մատաղիսի գործով»  իր վճիռը, որով ճանաչվել են Մարդու իրավունքների եվրոպական կոնվենցիայի երրորդ և հինգերորդ հոդվածներով՝  Խոշտանգումների արգելում և Ազատության ու անձնական անձեռնմխելիության իրավունք, երաշխավորված իրավունքների խախտումները: ՄԻԵԴ վճռով Հայաստանը ընդհանուր առմամբ 50 հազար եվրո պետք է վճարի արդարացվածներին որպես փոխհատուցում՝ 15 հազարական  եվրո Ռազմիկ Սարգսյանին և Մուսա Սերոբյանին,  20 հազար եվրո՝ Արայիկ Զալյանին:   

Հայկ Ալումյանը կոչ է անում բոլորին հետևություններ անել այս վճռից: Հետևություններ նախևառաջ  պետք է անեն քաղաքացիները՝  սեփական իրավունքի համար պետք է  պայքարել, հետևողական լինելու դեպքում  շուտ թե ուշ պայքարը հաջողության է   հասցնելու: 

Փաստաբանն իր գործընկերներին կոչ է անում չհանձնվել, մինչև վերջ պայքարել իրենց վստահորդների իրավունքների համար՝ ընդհուպ մինչև ՄԻԵԴ:  «Ես կոչ եմ անում իմ կոլեգաներին օգտագործել այդ ատյանը: ՄԻԵԴ-ն իրոք արդյունավետ դատարան է՝  թեկուզև երկար ժամանակ է պահանջվում արդյունքի հասնելու համար»,- ասաց Հ.Ալումյանը՝ հավելելով, որ Հայաստանի դատական համակարգը ոչ բարվոք վիճակում է այն պատճառով, որ «մենք ավելի քիչ ենք դիմում ՄԻԵԴ, քան պետք է դիմել»:

Հետևությունների պետք է հանգեն նաև իշխանությունները՝  այն, ինչ որ տեղի է ունեցել կամ տեղի է ունենում, չպետք է կրկնվի, մեղավորները պետք է անպայման պատասխանատվության ենթարկվեն:

Հայկ Ալումյանը հայտարարեց, որ «Մատաղիսի գործով» վճիռը զանգի պես նախազգուշացում պետք է լինի նաև Բուդաղյանների  աղմկահարույց գործերի շրջանակում:  «Թող իմանան, եթե պետք լինի 12 տարի կպայքարենք նաև Բուդաղյանների գործերով արդարության վերականգնման համար,    մի օր բոլոր մեղավորները պատասխան են տալու»,- ասաց Հայկ Ալումյանը: