Փաստ ինֆո

Ազգային ժողով-Կառավարություն հարցուպատասխանի ընթացքում այսօր բարձրացվել է տեսախցիկների ու արագաչափերի տեղադրումից առաջ և հետո ՃՏՊ-ների  վիճակագրության հարցը: Հարցը բարձրացրած պատգամավոր Նիկոլ Փաշինյանն ու ՀՀ արդարադատության նախարար Արփինե Հովհաննիսյանը հակառակ դիտակետեր ունեին հարցի վերաբերյալ, թե   արագաչափերի տեղադրումից հետո աճե՞լ, թե՞ նվազել են ՃՏՊ-ները:

Այսպես,  Նիկոլ Փաշինյանը հայտարարել է, որ 2012-ից ի վեր, երբ տեսախցիկներն ու արագաչափերը տեղադրվեցին, 2015 թվականին ճանապարհային երթևեկության կանոնների խախտումները աճել են, մասնավորապես, 2015-ին 2012-ի համեմատ 123 տոկոսով աճ է եղել:

«Սրա արդյունքում ավելանում են ճանապարհատրանսպորտային պատահարները, դրանցից տուժած քաղաքացիները: Ըստ որում, 2015-ին ունեցել ենք 5084 տուժող, որը 2012թ. այսինքն` արագաչափերի տեղադրման տարվա նախորդ տարվա համեմատ աճել է 71 տոկոսով»,–  ասել է պատգամավորը:

Ի պատասխան՝ ՀՀ արդարադատության նախարար Արփինե Հովհաննիսյանը նշել է, որ Փաշինյանի կատարած ընդհանրացումները մի փոքր ճշգրտման կարիք ունեն:

«Օրինակ՝ 2015-ին ընթացքում զոհերի և վիրավորների թիվ բերեցիք՝   346 զոհ և 4338 մարմնական վնասվածք ստացած անձ։ Երբ նշում էիք այդ սարքերի ավելացումը, Ձեզ տրամադրվել են այս սարքերի բաշխվածությանը ՀՀ ողջ տարածքի համար, մինչդեռ համադրումները կատարվում են Երևանի համար»,- ըստ tert.am-ի` ասել  է  Արփինե Հովհաննիսյանը եւ նշել, որ սարքերի տեղադրումից հետո ՀՀ-ում գրանցվել է  ՃՏՊ-ների կտրուկ նվազում, իսկ այժմ ՃՏՊ-ների մի փոքր աճ կա, բայց կա նաև զոհերի նվազում:

Մինչդեռ վիճակագրության վրա հիմնված՝   իրավապահ մարմինների գնահատականը այլ է: Ըստ դրանց, շարունակում է մտահոգիչ մնալ մահվան ելքով ճանապարհատրանսպորտային պատահարների թիվը. 2015 թ. ՃՏՊ-ների հետևանքով զոհվել է 227 մարդ, իսկ 2014 թ.՝ 181։

Ըստ ոստիկանության ամփոփումների, 2015թ. Հանրապետության տարածքում արձանագրվել է 3399 (նախորդ տարի դրանք եղել են 3156-ը) ճանապարհատրանսպորտային պատահար:

Ասել է թե` գոնե մահվան դեպքերը 2015 թվականին աճել են, հետեւապես նախարարը  ԱԺ-ում հնչեցրել է սխալ տվյալներ. կամ նրան մատուցվել է սխալ վիճակագրություն, կամ էլ նա պարզապես պատրաստ չէ եղել նման քննարկման: