Փաստ ինֆո

Առանձնապես խոշոր չափերի փողերի լվացման ու խարդախության գործով այսօրվա դատական նիստում սկսվեց գործի գրավոր ապացույցների հետազոտումը:

«Հայբիզնեսբանկ» ՓԲ ընկերության վարչության նախկին  նախագահ,  ամբաստանյալ Արա Կիրակոսյանի պաշտպան Հակոբ Ճարոյանը հայտարարություններ արեց, որ չկա որևէ ապացույց, որ Հայաստանում Իրանի Իսլամական Հանրապետության դեսպանությունից գրություն է ուղարկվել ՀՀ ազգային անվտանգության խորհուրդ:  Այդ մասին են վկայում, ըստ պաշտպանի,  ԱԱԽ և իրանական դեսպանությանն  իր ուղղած հարցումները՝ որևէ գրության մուտք-ելք դեսպանությունից ԱԱԽ չկա: Թեև նշվում է, որ նյութեր են նախապատրաստվել, սակայն որևէ մեկը  չի կանչվել ու չի հարցաքննվել:

Պաշտպանը դժգոհություն հայտնեց նաև, որ հրապարակված փաստաթղթերից մի քանիսը օտար լեզվով են՝ պարսկերեն ու անգլերեն: Հ.Ճարոյանը հիշեցրեց, Հայաստանում դատավարության լեզուն հայերենն է, ապա ինքն իրեն հարց ուղղեց ու պատասխանեց. ո՞ւր է թարգմանությունը, չկա: Պաշտպանը հայտարարեց, որ օրենքի խախտմամբ ձեռք բերված փաստաթղթերը   չեն կարող դրվել մեղադրանքի հիմքում:

Մեղադրող Արմեն Փանոսյանը նկատեց, որ դեռևս հետազոտվել է գործի մի չնչին մասը, դրանով չի կարելի եզրակացություններ անել ամբողջ գործի մասին:  Թարգմանությունները, անհրաժեշտ նյութերն ու հիմնավորումները մնացած 33 հատորներում են:

Ըստ մեղադրանքի՝ 2006 թվականի օգոստոսի 21-ից մինչև 2013 թվականի հոկտեմբերի 01-ը ներառյալ ժամանակահատվածում «Հայբիզնեսբանկ» ՓԲ ընկերության Վարչության նախագահ աշխատած Արա Կիրակոսյանը բանկի վարչության նախագահի տեղակալ-Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք   Եսայանի, ԻԻՀ և ԱՄՆ քաղաքացի Մաջիդ Ռ Նազիֆի, ԻԻՀ և ԱՄՆ քաղաքացի, ՀՀ-ում գրանցված «Ալֆա Զեներալ Թրեյդինգ» ՍՊ ընկերության հիմնադիր-տնօրեն Բեհրուզ Բեհնամի, ԻԻՀ և ՀՀ քաղաքացի Վահիկ Մանուկյանսի, Շվեյցարիայի Համադաշնության ժնև քաղաքում գրանցված, «Կոսմոս Տրադինգ» ընկերության հիմնադիր, ՀՀ քաղաքացի Անդրանիկ Դոների, վերջինիս կողմից լիազորված անձ՝ Սուրեն Դաբրիելյանի և ՀՀ-ում գրանցված «Դավ Տրանս Ստրոյ» ՍՊ հիմնադիր տնօրեն, ՀՀ քաղաքացի Դավիթ  Դերզյանի հետ, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ամիսը ներառյալ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն  փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000  եվրոն նախատեսված է եղել գումարի իրական շահառու, Բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա Է եղել վերադարձման ուղարկող «Միր Բիզնես Բանկ» ՓԲ ընկերությանը, ինչի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերությունները իրավունք են ձեռք բերել նույն չափով գումարներ ստանալու հայցապահանջ երկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն է ստանձնել։

Արա Կիրակոսյանին մեղադրանք է առաջադրվել ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ,  325-րդ հոդվածի  2-րդ մասով՝ մի խումբ անձանց կողմից նախնական համաձայնությամբ փաստաթղթեր կեղծելը, իրացնելը կամ օգտագործելը, 178-րդ հոդվածի  3-րդ մասի 1-ին կետով՝ առանձնապես խոշոր չափերի խարդախություն, 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում:

 Նշենք, որ գործում  նույնաբովանդակ մեղադրանքով ևս մեկ ամբաստանյալ էր անցնում՝  Մելիք Եսայանը, նրա մասով գործն առանձնացվել է ու կասեցվել՝ մինչև ամբաստանյալի առողջանալը: