Փաստ ինֆո

Գյումրիում Ավետիսյանների ընտանիքի սպանության գործով դեռևս չհարցաքննված, Ռուսաստանում գտնվող յոթ վկաների հարցը դեռևս առկախ է, դեռևս վերջնականապես չի որոշվել, որ նրանք չեն հարցաքննվելու: Այս մասին «Շանթ» հեռուստաընկերությանը տված հարցազրույցում այսօր նշել է Ավետիսյանների իրավահաջորդի ներկայացուցիչ, փաստաբան Երվանդ Վարոսյանը:

«Այսօր դատական նիստի ընթացքում ըստ էության պայմանավորվածություն ձեռք բերվեց նաև դատարանի հետ, որ հնարավոր բոլոր միջոցները կձեռնարկվեն: Դատարանը պատրաստակամություն հայտնեց մեր կողմից ներկայացվելիք միջնորդությանը անդրադառնալ՝ դրական առումով, թե ինչ միջոցներ է հնարավոր ձեռնարկել վկաների ներկայությունն ապահովելու համար»,- ասել է փաստաբանը: 

Ե.Վարոսյանը նշել է, որ հիշյալ վկաները հիմնականում Պերմյակովի ծառայակիցներն են, ովքեր ոճրագործությանը նախորդած ժամանակահատվածում նրա հետ միասին ծառայել են ռուսաստանյան  ռազմաբազայում և Պերմյակովի անմիջական նախկին հրամանատարը: Հատկապես վերջինիս ցուցմունքները տուժող կողմը  շատ  է  կարևորում, քանի որ նրա հարցաքննությամբ   ավելի շատ  հարցեր կպարզաբանվեին: Հենց այդ սպան է եղել այն անձնավորությունն, ով Հայաստանում ծառայելու համար Չիտայում  ընտրել է Պերմյակովին և  տեղափոխել նրան  Հայաստան:  Նա նաև եղել է սպանության օրվա վերակարգի հրամանատարը, երբ դիրքից փախուստի էր  դիմել Պերմյակովը:

Ե.Վարոսյանն ընդգծել է, որ ռուս սպաների  հարցաքննությունից հետո ակնհայտ է դարձել, որ  անհրաժեշտ է լինելու լրացուցիչ վկաներ ներգրավել գործում և այդ ուղղությամբ դատաքննության ավարտական փուլում տուժող կողմը  միջնորդություններ է ներկայացնելու:

Այսօրվա դատական նիստում  դատաքննությունը  նոր փուլ մտավ՝  քրեական գործում առկա գրավոր նյութերի հետազոտման փուլ: Ըստ փաստաբանի,   հենց այդ նյութերում են գտնվում այն ապացույցները, որոնք ուղղակիորեն մատնանշում են Պերմյակովի կապը կատարված ոճրագործությանը և հիմնավորում, որ հենց նա է սպանություն կատարած անձը:

Իսկ այս փուլին նախորդած փուլում՝   մինչև  այժմ հարցաքննված վկաների ցուցմունքները հիմնականում վերաբերվում էին Պերմյակովի ծառայության ընթացքին, նրա փախուստին և ոճրագործությունը կատարելուց հետո  նրա ձերբակալության ու ռուսական ռազմաբազա տեղափոխման գործընթացին, ինչը նույնպես տուժող կողմը կարևորում է: «Շատ ու շատ նախկինում փակ  հարցեր մեր համար պարզաբանվեցին,  մասնավորապես, ինչպե՞ս է փախուստի դիմել, դրանից հետո ի՞նչ գործողություններ է կատարել, ինչպե՞ս է ձերբակալվել և ինչպե՞ս է հայտնվել ոչ թե հայ իրավապահների իրավազորության ներքո, այլ ռուսական ռազմաբազայում»:

Ե.Վարոսյանը նշել է նաև, որ վկաների ցուցմունքներում առկա հակասությունները ստիպում են տուժող կողմին այս պահից սկսած մտածել նոր վկաների ներգրավման մասին, դրա օգնությամբ կողմը  փորձելու է այդ հակասությունները  շտկել ու հասկանալ, թե  ինչ է տեղի ունեցել:  Փաստաբանը պարզաբանել է, որ ռուս սպաների մի մասը նկարագրում է, որ Պերմյակովի ձերբակալության վայրում գտնվել են նաև ՀՀ  ԱԱԾ աշխատակիցներ, ընդ որում, եկել էին ձերբակալվելուց հինգ րոպե անց: Մի ուրիշ խումբ խոսում էր, որ չեն եղել ԱԱԾ աշխատակիցներ,  այլ եղել են ոստիկաններ և եկել են ոչ թե հինգ, այլ քառասունհինգ րոպե անց:  «Կարծում եմ, որ անհրաժեշտ կլինի հարցաքննել նաև ՀՀ ոստիկանության համապատասխան ներկայացուցիչներին՝  ի վերջո պարզելու, թե ի՞նչ է տեղի ունեցել, Պերմյակովի որոնողական աշխատանքները ինչպե՞ս են կատարվել, ինչպե՞ս է տեղի ունեցել նրա ձերբակալությունը և ինչպե՞ս է նա հայտնվել ռուսական ռազմաբազայում»,- ասել է Ե.Վարոսյանը: