Փաստ ինֆո

Նախկին փեսայի դեմքին ծծմբական թթու լցնելու միջոցով  նրա առողջությանը ծանր, կյանքին վտանգ սպառնացող  վնաս հասցնելու վերաբերյալ գործով այսօր ամբաստանյալ Աշոտ Սուքիասյանը պնդեց, որ ջրի փոխարեն սխալմամբ, շփոթելով,  ծծմբաթթու է շփել նախկին փեսայի դեմքին: Նա  պարզաբանեց, որ  ծծմբաթթվի ու ջրով տարաները կողք-կողքի դրված էին սեղանին:

Ի դեպ, ամբաստանյալի  պաշտպան Վահե Մնացականյանն այսօր հրապարակեց մի շարք գրավոր նյութեր.   մասնավորապես, դեպքի մասին ոստիկանի  զեկուցագրում նշվում էր, որ «ջրի փոխարեն  պատահաբար քիմիական նյութով լվացվել են»: Իսկ Կրիմինալ դեպքերի  մատյանը զննելու արձանագրության մեջ նշվել է, որ «շփոթմամբ  քիմիական նյութը շփել է փեսայի վրա»:

Մինչդեռ, ըստ մեղադրական եզրակացության, Աշոտ Սուքիասյանը 2015թ. հուլիսի 6-ին` ժամը 17.30-ի սահմաններում, իրեն պատկանող տանը հանդիպել է երեխային տեսակցելու նպատակով իր տուն այցելած դստեր   նախկին ամուսնուն՝ Արտակին: Երեխայի քնած լինելու պատճառով առաջարկել է նրան իջնել նկուղային հարկում գտնվող իր արհեստանոցը, որտեղ միասին սրճել են և զրուցել նրանց ամուսնաընտանեկան հարցերի շուրջ: Ելնելով Արտակի դրսևորած վարքագծից ու նրա պահվածքի արդյունքում առաջացած ընթացիկ կոնֆլիկտներից՝ Աշոտ Սուքիասյանը արգելել է նրան  այցելել իր բնակարան, տեսակցել երեխային, ինչին հակադրվելով նախկին փեսան  վիրավորական խոսքեր է ասել, որը վրդովեցրել է Ա.Սուքիասյանին: Վերջինս էլ,  ըստ մեղադրական եզրակացության, նախկին փեսայի առողջությանը ծանր վնաս պատճառելու դիտավորությամբ՝ վերցրել է սեղանին դրված ծծմբական թթվով լի տարան և այն լցրել նրա  դեմքին՝  նրան պատճառելով առողջության ծանր վնաս՝ կյանքին վտանգ սպառնացող:

Ամբաստանյալն իր ցուցմունքում մանրամասն անդրադարձավ դստեր ընտանեկան կյանքի հանգամանքներին՝  փեսան մշտապես խանդի տեսարաններ էր սարքում, պահանջում, որ անգամ հաց գնելու գնալու ու հարևանուհիների հետ սրճելու համար իրենից թույլտվություն ստանա, մանրակրկիտ ստուգում էր, թե կինն ում հետ և ինչի մասին է խոսել հեռախոսով: Դուստրը պարբերաբար դժգոհում էր, որ այլևս չի դիմանում և որ այնտեղ աղջիկ երեխա դաստիարակել չի կարող»: Ամբաստանյալն էլ  ասում էր՝  «ես հո քեզ կալանավոր չեմ ուղարկել», անգամ կալանավորը պատժի իր ժամկետը կրելուց հետո ազատ է արձակվում, ստացվում է, որ իր դուստրը ցմա՞հ կալանավոր է: 

Նախկին աները նշեց, որ ինքը չէր տեսնում, որ դստեր ամուսինը  կատարում է իր պարտականությունները, մասնավորապես,  նյութապես ապահովում է դստերը ու պաշտպանում իր կնոջը. դուստրը  ամուսնուց կրկնակի ավելի աշխատավարձ էր ստանում  և  պաշտպանված չէր  ամուսնու տանը: Մասնավորապես,  ամբաստանյալը հիշեց, որ փեսայի տատը հարվածել է իր հղի դստեր փորին այն դեպքում, որ արդեն մեկ երեխա կորցրել էին:  Դստեր ամուսնու տանը իր՝ ամբաստանյալի, ներկայությամբ փեսան ու նրա մայրը պրովոկացիա էին սարքել՝ այդ կերպ փորձելով խանգարել իրերով դստեր և երեխայի հեռանալուն: Դստեր սկեսուրը վարկաբեկում, փնովում ու հայհոյում էր հարսին, դստեր մազերից էին քաշում:

Ամբաստանյալը դեմ էր ընտանիքի քայքայմանը՝  «բաժանություն մեր ազգի մեջ չի եղել», գիտակցելով հանդերձ, որ ամեն ինչ 99 տոկոսով վերջացած է, միշտ փեսայի «խաթրով էր շարժվում», սակայն ոչինչ չէր փոխվում: Երեխային տեսնելու  նպատակով իրենց տուն փեսայի այցերն ևս երբեմն նախկին ամուսինների միջև քաշքշուկի էին վերածվում,  դրա հետևանքով ամբաստանյալի կնոջ մատի ոսկրը կոտրվել էր, վնասվել էր նաև նոր գնված սառնարանը, որին փեսան ոտքով հարվածել էր:

Ի վերջո աները հանգել է եզրակացության՝  «ոչ թե ուշ թե շուտ բաժանվելու եք, այլ ինչքան շուտ, այնքան լավ»: Փեսան ի պատասխան դստերը մեղադրում էր իր իսկ խոսքերով անբարոյականության մեջ, հայտարարելով, որ ձայնագրություն ունի, սակայն այդպես էլ ձայնագրությունը ի հայտ չեկավ:

Ա.Սուքիասյանը նշեց, որ սխալմամբ ջրի փոխարեն քիմիական լուծույթ է շփել  նախկին փեսայի վրա, իր դեմքին էլ է  ստացել  բոցի հպում, այրվածքներ ստացել: Երբ լսել  է  Արտակի բացականչությունը՝ այս ի՞նչ լցրեցիք իմ վրա, հասկացել է, որ լցրածը ջուրը չէր:  Ամբաստանյալը նշեց, որ ինքը գոռում էր՝  շտապօգնություն կանչեք, Արտակին բերեք, ապա իմացել էր, որ վերջինիս շտապօգնությունը տարել է:

Ամբաստանյալը դատավարության կողմերի ու դատարանի հարցերին կպատասխանի արդեն հաջորդ դատական նիստում:

Իսկ այսօր դատարանն ավարտեց նաև գործի գրավոր ապացույցների հետազոտումը: Դրանցից պարզ դարձավ, որ ամբաստանյալը ազատամարտիկ է եղել, 1990-94թթ. մասնակցել է Հայաստանի սահմանների պաշտպանության և Արցախի ինքնապաշտպանական մարտերին, ունի կապիտանի զինվորական աստիճան, հետախույզ վետերանների  միավորման անդամ է, ՀՀ նախագահի հրամանագրով պարգևատրվել է մարտական ծառայության, իսկ պաշտպանության նախարարի հրամաններով՝  «Վազգեն Սարգսյան», «Գարեգին Նժդեհ»  մեդալներով, արժանացել պատվոգրերի: