Փաստ ինֆո

 

Կառավարության այսօրվա նիստում հավանության է արժանացել Ընտրական նոր օրենսգրքի նախագիծը և դրանից բխող մի շարք օրենքներում փոփոխությունների և լրացումների փաթեթը: 

 

Այն ներկայացրած  կառավարության աշխատակազմի ղեկավար-նախարար Դավիթ Հարությունյանը նշել է, որ նախագիծը մշակվել է Սահմանադրության փոփոխությունների հիման վրա: Ըստ նրա՝ օրենսդրական փաթեթը պետք է մշակվեր բավականին սեղմ ժամկետում, և կար երկընտրանք. քննարկումների հիմնական ժամանակը տրամադրել կառավարությանը՝ ակտիվ քաղաքական քննարկումներ կազմակերպելու և վերջնականին մոտ փաթեթ  ձևավորելու համար, թե տեղափոխել ԱԺ: «Վերջնական արդյունքում եկանք այն եզրակացության, որ հիմնական քննարկումների բեռը պետք է տեղափոխվի քաղաքական դաշտ՝ ԱԺ, որտեղ քաղաքական ամբողջ ներկապնակն է ներկայացված: Եթե այս նախագիծը հիմա հավանության արժանացնենք, ապա այդպիսով կազդարարենք հանրային քննարկումների մեկնարկը ԱԺ-ում»,-ասել է նա:

 

Ի դեպ՝ Դ. Հարությունյանը նշել է, որ ներկայացված նախագիծը տարբերվում է Վենետիկի հանձնաժողով ուղարկվածից՝ պարզաբանելով, թե  ժամանակ չունեին, քանի որ հունիսի մեկին այն պետք է ընդունված լինի: Նաև հայտնել է, որ մարտի կեսերին պետք է ժամանեն միջազգային փորձագետները:

 

ԱԺ աշխատակազմի ղեկավար Հրայր Թովմասյանն էլ առաջարկել է ԱԺ-ում այս նախագծի քննարկումը համարել անհետաձգելի: Ինչին ի պատասխան Դ.Հարությունյանն արձագանքել է, թե կարծում է, որ դա ճիշտ չի ընկալվի պատգամավորների կողմից: «Այն ենթադրում է քննարկումների եռամսյա ժամկետ, սակայն որևէ մեկն արհեստականորեն չի ցանկանում արագացնել գործընթացը»,- ընդգծել է Դավիթ Հարությունյանը:

 

Նշենք, որ Ընտրական նոր օրենսգրքի համաձայն՝ Ազգային ժողովը, տեղական ինքնակառավարման մարմինները, բացառությամբ Երևան, Գյումրի, Վանաձոր համայնքների ղեկավարների, ընտրվում են անմիջականորեն՝ ընտրողների կողմից: ԱԺ-ի և Երևանի, Գյումրու, Վանաձորի ավագանու ընտրություններն իրականացվելու են համամասնական ընտրակարգով:

 

Մասնավորապես, Ազգային ժողովի ընտրություններն անցկացվում են համամասնական ընտրակարգով՝ Հանրապետության ողջ տարածքն ընդգրկող մեկ բազմամանդատ ընտրատարածքից` կուսակցությունների, կուսակցությունների դաշինքի համապետական և տարածքային ընտրական ցուցակներով առաջադրված պատգամավորի թեկնածուների թվից: 

 

Ազգային ժողովի ընտրությունների ժամանակ ՀՀ-ում կազմվում է 13 ընտրական տարածք՝ 4-ը Երևանում, 9-ը՝ մարզերում:

 

Ի դեպ՝ Սյունիքի և Վայոց Ձորի մարզերի տարածքները միասին, Արարատի, Արմավիրի, Արագածոտնի, Գեղարքունիքի, Լոռու, Կոտայքի, Շիրակի, Տավուշի մարզերն առանձին ընտրական տարածքներ են:

 

Ըստ նախագծի՝ Ազգային ժողովի պատգամավորների նվազագույն թիվը 101 է:

 

ԱԺ պատգամավորների 4 մանդատ բաշխվում է ազգային փոքրամասնության ներկայացուցիչների միջև: Մանդատները բաշխվում են արգելապատնեշը հաղթահարած կուսակցությունների, կուսակցությունների դաշինքի միջև՝ ըստ յուրաքանչյուր մանդատի համար ստացված գործակցի, որը հաշվարկվում է սահմանված բանաձևով.

ԱԺ պատգամավոր կարող է ընտրվել քսանհինգ տարին լրացած, վերջին չորս տարում միայն ՀՀ քաղաքացի հանդիսացող, վերջին չորս տարում ՀՀ-ում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք:

 

Հայերենին տիրապետել է համարվում հայերենով միջնակարգ կամ բարձրագույն կրթություն ստացած լինելը: Հայերենով միջնակարգ կամ բարձրագույն կրթություն չստացած անձանց հայերենին տիրապետելու հանգամանքն ստուգվում է ՀՀ կրթության և գիտության նախարարության սահմանած կարգով: