Փաստ ինֆո

Պետական դավաճանության և նախապատրաստվող առանձնապես ծանր հանցագործության մասին տեղյակ լինելու և չհայտնելու գործով այսօր   դատարան էին ներկայացել պետական դավաճանության մեջ մեղադրվող Կարինե Ղումաշյանի երկու որդիները. նրանք գործով վկաներ են:

Երկու որդիներն էլ հրաժարվեցին ցուցմունք տալուց՝  օգտվելով մերձավոր ազգականի վերաբերյալ  ցուցմունք չտալու իրենց սահմանադրական իրավունքից:

Ամբաստանյալի ավագ որդին՝ Տիգրանը, ով  զինծառայող է, հայտարարեց, որ ինքը նախաքննության ընթացքում  երկու անգամ ցուցմունք է տվել, ըստ նրա, առաջին անգամ իրեն չի պարզաբանվել իր այդ իրավունքի մասին, իսկ երկրորդ անգամ ասվել է՝ դու արդեն ցուցմունք տվել ես, իմաստ չունի ցուցմունք չտալ:

Դատարանում հրապարակված հարցաքննության արձանագրության համաձայն, սակայն, նրան պարզաբանվել է մոր վերաբերյալ   ցուցմունք չտալու իրավունքը, այնուհետև նա նախազգուշացվել է նաև սուտ ցուցմունք տալու դեպքում  պատասխանատվության մասին:

Վկան նախաքննական ցուցմունքում հայտնել է, որ մայրը աշխատելու նպատակով երկու անգամ Թուրքիա է մեկնել: Վերադառնալուց հետո մայրը «սկայպ»- ով կապվել է իր հետ և ասել, որ կարևոր խոսակցություն ունի իր հետ: Մայրն իրենից հարցրել է զորամասի համարն ու նաև, թե իր զորամասը հրաձգայի՞ն է, ինքն էլ ասել է՝ տանկային է:

  Մայրը գնացել է ԼՂՀ, որտեղ նա ծառայում էր,  և հայտնել, որ Թուրքիայում իրեն ծանոթացրել են մեծահարուստի հետ, նա ցանկանում է օգնել բանակին, սակայն  ինքը պետք է իմանա, որ գումարները նպատակային են ծախսվում, ուստի նրան պետք են  տեղեկություններ, թե բանակում զինվորներն ինչ են ուտում ու  հագնում:

«Օդնոկլասնիկի»  սոցցանցում բացված էջի միջոցով վկան շփվել է Առո ներկայացած անձի հետ, ով գրել է, որ իրեն մտահոգում է Հայաստանի վիճակը, ցանկանում է, որ «մենք լավ ապրենք»: Շփման ընթացքում Առոն փորձում էր   իր միջոցով տեղեկություններ ստանալ բանակի մասին,  զինծառայողը հասկացել է, որ «բարերարը» հայ չէ, թուրք կամ ադրբեջանցի է: Նա  մորը զգուշացրել է այդ մասին ու ասել, որ կարող են լուրջ խնդիրներ ունենալ:  Իսկ Առոյին հայհոյանքներ է ուղղել, ապա ջնջել իր էջը:  Վկան հայտնել է, որ իր հարաբերությունները մոր հետ  վատացել են այն բանից հետո, որ  իմացել է, որ ծնողներն ամուսնալուծվել են մոր ցանկությամբ:

Ցուցմունքների հրապարակումից հետո էլ վկան պնդեց, որ առաջին անգամ հարցաքննելուց առաջ իրեն չեն պարզաբանել մոր վերաբերյալ  ցուցմունք չտալու  իր իրավունքը, եթե պարզաբանեին, ցուցմունք չէր տա: Իսկ այդ իրավունքի պարզաբանման գրառման տեղում ստորագրել է՝  առանց կարդալու:  Վկան միաժամանակ նշեց, որ տվել է ճիշտ ցուցմունքներ:

Վկայի կրտսեր եղբայր Դավիթը նույնպես հրաժարվեց մոր վերաբերյալ  ցուցմունք տալ և հայտարարեց, որ նախաքննության ընթացքում իրեն չի պարզաբանվել մոր վերաբերյալ ցուցմունք չտալու իրավունքը : 

Թեև հարցաքննության արձանագրության ամեն էջում առկա էր այն ժամանակ անչափահաս վկայի հոր՝ նրա օրինական ներկայացուցչի,  ստորագրությունը, սակայն  վկան պնդեց, որ հայրը ներկա չի եղել հարցաքննությանը:

Վկայի նախաքննական ցուցմունքի համաձայն, Թուրքիայի մի հայ՝ Արման անունով, ով ծանոթ է եղել Ռաֆոյի հետ, իր մորն ասել է, որ ուզում է ֆինանսական օգնություն ցույց տալ իրենց՝ եթե զինծառայող եղբայրը համաձայնի համագործակցել իր հետ, ասի որտեղ է ծառայում, պատմի զինվորական կյանքի մասին: Որդին հայտնել է, որ մոր հետ առաջին հանդիպմանը Արմանը 200 դոլար է տվել,  ամեն  հանդիպմանը՝  100 կամ 200 դոլար: Մայրը ևս 1200 դոլար է ստացել, այդ գումարով վերադարձել  է Հայաստան, իսկ իրեն Արմանը հորդորել է մնալ Թուրքիայում՝ հավաստիացնելով, որ իր համար էլ գործ կգտնի, ինչին ինքը չի համաձայնել: Վկան հայտնել էր, որ  իր եղբայր Տիգրանը մորն ասել էր, որ Արմանը շպիոն է:

Հաջորդ դատական նիստում կսկսվի հինգ հատոր կազմող գործի գրավոր ապացույցների հետազոտումը, ապա ամբաստանյալները կարող են օգտվել ցուցմունք տալու իրենց իրավունքից: