Փաստ ինֆո

«ԱրմենՏել»-ի հաշվարկային համակարգը շրջանցելով միջազգային մուտքային հեռախոսազանգերի  այլընտրանքային կապուղիների գործով այսօր սկսվեց արդեն երկրորդ գործի դատաքննությունը: 

Գործով ամբաստանյալը  «ԱրմենՏել»  ՓԲ ընկերության տեխնիկական բլոկի նախկին տնօրեն Վլադիմիր Սաչկովն  է: Նա, ըստ մեղադրանքի, զբաղեցնելով  հիշյալ պաշտոնը, համաձայնել է  «Վիմպելկոմ» ՓԲ ընկերության ԱՊՀ երկրներում անվտանգության տնօրինության ղեկավար Ալեքսանդր Զուբովի առաջարկությանը ստեղծել միջազգային մուտքային հեռախոսազանգերի համար այլընտրանքային կապուղի և ինքնուրույն մատուցել արտասահմանյան կապի օպերատորների կողմից դեպի «ԱրմենՏել» ՓԲ ընկերության բաժանորդներին ուղղված հեռախոսազանգերի սպասարկման ծառայություններ՝ ՀՀ տարածքում օգտագործելով նաև «Արմենտել» ՓԲ ընկերության ենթակառուցվածքը, սակայն շրջանցելով դրա հաշվարկային համակարգը:

Ըստ մեղադրական եզրակացության, «այդ հանցավոր մտահղացումն  իրագործելու համար Ալեքսանդր Զուբովի կողմից ձևավորվել է կայուն կազմակերպված խումբ, որի մեջ ընդգրկվել են «ԱրմենՏել» ՓԲ ընկերության գլխավոր տնօրեն Իգոր Կլիմկոն, տեխնիկական բլոկի տնօրեն Վլադիմիր Սաչկովը, անվտանգության տնօրինության ղեկավար Աշոտ Պողոսյանը («Փաստինֆո».   նրա վերաբերյալ առանձին քրեական գործը ևս քննվում է դատարանում), ինչպես նաև Ղրղզստանի քաղաքացի Ալեքսեյ Պիսարևը: Դերաբաշխման համաձայն, Ալեքսեյ Զուբովին վերապահվել է արտասահմանյան կապի օպերատորների հետ դեպի «ԱրմենՏել» ՓԲ ընկերության բջջային և ֆիքսված ցանցեր տեղափոխվող ծավալների և դրանց դիմաց վճարումների վերաբերյալ պայմանավորվածություններ կնքելը, միջազգային մուտքային հեռախոսազանգերի ապօրինի ուղղորդումների գործընթացը վերահսկելը, հանցակիցների գործողությունները համակարգելը և իր ազդեցությամբ նրանց արարքների հովանավորելը:

Իգոր Կլիմկոյին և Վլադիմիր Աաչկովին վերապահվել է հեռախոսազանգերի ապօրինի ուղղորդումների համար կապուղիներ ստեղծելը, դրանց աշխատանքն ապահովելը, իսկ Ալեքսեյ Պիսարևին այդ կապուղիների աշխատանքի համար անհրաժեշտ սարքավորումներն ու «ԱրմենՏել»  ՓԲ ընկերության միջազգային կայանը համապատասխան կարգաբերելը:

Աշոտ Պողոսյանին վերապահվել է հեռախոսազանգերի ապօրինի ուղղորդումների նպատակով կապուղիների ստեղծման և անհրաժեշտ սարքավորումների համար տարածք տրամադրելը և այն հսկողության տակ պահելը, այնտեղ կողմնակի անձանց մուտքն արգելելը և Պիսարևի մուտքն ապահովելը, իր ազդեցությամբ այդ կապուղիների աշխատանքով հետաքրքրվող «ԱրմենՏել» ՓԲ ընկերության աշխատակիցներին հանցավոր գործունեությունը դադարեցնելու և դրա մասին իրավասու մարմիններին հայտնելուն ուղղված միջոցներ ձեռնարկելուց   զերծ  պահելը»:

Այսպիսով, ՌԴ քաղաքացի, 41-ամյա  Վլադիմիր Սաչկովին մեղադրանք է առաջադրվել ՀՀ քրեական օրենսգրքի 188-րդ հոդվածի  3-րդ մասի 1-ին և  2-րդ կետերով՝  ապօրինի ձեռնարկատիրություն, որը կատարվել է կազմակերպված խմբի կողմից ու զուգորդվել առանձնապես խոշոր չափի վնաս պատճառելով, 214-րդ հոդվածի  2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ,  252-րդ հոդվածի  2-րդ մասի 3-րդ կետով՝  մի խումբ անձանց կողմից նախնական համաձայնությամբ համակարգչային տեղեկատվությունը փոփոխելը:

Ամբաստանյալը հայտարարեց, որ ինքն առաջադրված մեղադրանքում իրեն մեղավոր չի ճանաչում:

Դատարանի սահմանած ապացույցների հետազոտման կարգի համաձայն, նախ բացատրություններ տվեց   տուժող «ԱրմենՏել»-ի ներկայացուցիչ Հակոբ Գրիգորյանը: Նա, մասնավորապես,  հայտնեց, որ ընկերության կրած վնասի վերաբերյալ կարծիք կհայտնի հետագայում, քաղհայց ներկայացնելու վերաբերյալ ևս որոշում կկայացվի ավելի ուշ:

Այսօր սկսվեց վկաների հարցաքննությունը՝ մեկ վկայի հարցաքննությամբ՝ Սաչկովը վկայի անմիջական ղեկավարն է եղել:  Վկան հայտնեց, որ իրենց աշխատանքային տվյալներով խնդրո առարկա կապուղիները ստեղծվել են ՀՀ ԱԱԾ կարիքների համար, սակայն հետագայում անցկացված ներքին ծառայողական հետաքննության արդյունքներով պարզվել է, որ կապուղիներն ԱԱԾ-ինը չեն:

Վկան հաստատեց իր իսկ նախաքննական ցուցմունքներն առ այն, որ Սաչկովը զանգել է ու խնդրել վերականգնել ԱԱԾ կապուղիները, որոնք կազմալուծվել էին, ապա  զանգել է ու հայտնել, որ այդ հոսքերը ԱԱԾ-ին պետք չեն, պետք է կազմալուծել:

Մինչ դատաքննության սկսվելը պաշտպանական կողմը (Վ.Սաչկովի պաշտպանությունն իրականացնում են փաստաբաններ Նարինե Ռշտունին ու Արմեն Բաղդասարյանը) միջնորդեց փոխել ամբաստանյալի խափանման միջոց  կալանավորումը, ընտրել կալանքի հետ չկապված խափանման միջոց: Միաժամանակ պաշտպանական կողմը միջնորդեց նաև կիրառել գրավ՝ առաջարկելով վճարել 5 մլն ՀՀ դրամի չափով գրավի գումար:    

Պաշտպանական կողմը նշեց, որ գործն արդեն դատարանում է, և ազատության մեջ հայտնվելով ամբաստանյալը չի կարող խոչընդոտել քննությանը, անօրինական ազդեցություն ունենալ վկաների վրա: Ամբաստանյալը չի կարող նաև թաքնվել քննությունից՝  նրա անձնագիրը կցված է գործին, և նա մեծ ցանկության դեպքում անգամ չի կարող հեռանալ Հայաստանից: Պաշտպանական կողմն ընդգծեց նաև, որ ամբաստանյալը չի էլ ցանկանում հեռանալ, որովհետև մտադիր է ապացուցել իր անմեղությունը: 

Մեղադրող Արմեն Փանոսյանը նշեց, որ կալանավորումն ընտրելու  ու կալանավորման ժամկետը երկարացնելու որոշումներն օրինական են ու հիմնավորված, և որ կալանավորման հիմքերը դատաքննության փուլում ևս պահպանվում են: Մեղադրողը նշեց նաև, որ ամբաստանյալը մեղադրվում է ծանր հանցագործության կատարման մեջ, հանցագործությամբ պետությանն ու «ԱրմենՏել»-ին պատճառվել է  ընդհանուր առմամբ երկուսուկես մլրդ դրամի վնաս: Մեղադրողն անթույլատրելի համարեց նաև գրավի կիրառումը:

Դատարանը մերժեց միջնորդությունը: