Փաստ ինֆո

«Հայկական վերածնունդ» կուսակցությունը «Հայ ազգային կոնգրես» կուսակցությունից օրերս ստացել է Ընտրական նոր օրենսգրքի հետ կապված վերջիններիս կողմից առաջարկվող 4 սկզբունքային կետերը:

«Հայկական վերածնունդ» կուսակցությունից հայտնում են, որ քննարկել են ՀԱԿԿ  առաջարկները և, հաշվի առնելով այն հանգամանքը, որ դրանց վերաբերյալ կուսակցությունը հրապարակայնորեն բազմիցս բարձրաձայնել է, ուստի հայտարարում են, որ պաշտպանում են «Հայ ազգային կոնգրես» կուսակցության առաջ քաշած 4 կետերը: Ավելին՝ «Հայկական վերածնունդ» կուսակցությունը առաջարկում  է մի շարք լրացուցիչ սկզբունքային դրույթներ, որոնք անհրաժեշտ են հնարավորինս կատարյալ ընտրական օրենսգիրք ունենալու համար:

Ստորև ներկայացվում են «Հայկական վերածնունդ» կուսակցության առաջարկությունները.

1. Տեղից տեղ քվեարկության արգելում (քվեարկություն ըստ հաշվառման վայրերի):

2. Ընտրական արդյունքների ամփոփում ընտրատարածքային ընտրական հանձնաժողովում (մարզային ընտրական հանձնաժողովներ):

3. Քվեարկության մասնակիցների թվի հրապարակում, ժամ 20:30-ին՝ ըստ ընտրատարածքների և 21:30-ին՝ ըստ տեղամասերի:

4. Քվեարկության օրվանից 10 օր առաջ վերջնական ցուցակները փակցվում են ընտրատեղամասերում և փոփոխման ենթակա չեն:

5. Մինչ քվեաթերթիկները տրամադրելը տեղի է ունենում ընտրողի անձի նույնականացում` մատնահետքով և լուսանկարով:

6. Մասնակիցների թվի ավտոմատ հաշվարկում (ծրարը քվեատուփ գցելուց) օնլայն դիտարկման եղանակով: