Փաստ ինֆո

Երևի առաջին անգամ պարզ դարձավ, որ առաջին պահից սկսած, երբ որ Պերմյակովը ձերբակալվել է, Հայաստանի Հանրապետության ոստիկանության ներկայացուցիչները տեղեկացված են եղել այդ մասին: Այս մասին «Շանթ» հեռուստաընկերության հետ հարցազրույցում նշել է  Գյումրիում  Ավետիսյանների ընտանիքի անդամների սպանության գործով  տուժողների իրավահաջորդի ներկայացուցիչ, փաստաբան Երվանդ Վարոսյանը՝  մեկնաբանելով այսօրվա դատական նիստում ռուսական սահմանապահ զորամասի հրամանատարի տեղակալ, գնդապետ  Սերգեյ Մերզլիկինի ցուցմունքը: 

Ավելին, ընդգծել է Ե.Վարոսյանը, նախքան այն պահը, երբ Պերմյակովը տեղափոխվել է սահմանային ջոկատ, ՀՀ ոստիկանության  ներկայացուցիչներից ինչ-որ գնդապետ, որը հավանաբար, ըստ Մերզլիկինի,  Շիրակի   մարզային ոստիկանության աշխատակից է  եղել, արդեն իսկ գտնվել է իր աշխատասենյակում և սկզբից մինչև վերջ Պերմյակովի հետ կատարվող բոլոր  գործողություններին ներկա է գտնվել: Դրանից հետո Պերմյակովը սահմանային ջոկատից ՌԴ  102-րդ ռազմաբազա  է տեղափոխվել հայ ոստիկանների ուղեկցությամբ, «ինչը տուժող կողմի համար խիստ անակնկալ էր»: 

Տուժող կողմի ներկայացուցիչն ընդգծել է, որ ըստ վկայի ցուցմունքի, ոստիկանության ներկայացուցիչը որևէ դիմում, պահանջ, խնդանք չի ներկայացրել Պերմյակովին հայկական կողմին հանձնելու հետ կապված:

«Անկեղծ ասած, մենք այսօրվա հարցաքննությունից ուզում էինք պարզել, թե ինչպե՞ս  է անձը՝ Պերմյակովը, սահմանային ջոկատից տեղափոխվել Գյումրու տարածք՝ շրջանցելով Հայաստանի ոստիկանության համապատասխան կետերը, բայց պարզվեց  հակառակը՝ դեռ մի բան էլ հայ ոստիկաններն են օգնել ու ուղեկցել, որպեսզի նա տեղափոխվի ռազմաբազա»,- ասել է Երվանդ Վարոսյանը:

Փաստաբանը նշել է, որ այս վկայի  ցուցմունքը հիմք է տալու տուժող կողմին դատավարության համապատասխան փուլում նոր միջնորդություններով հանդես գալ, մասնավորապես, միջնորդություն ներկայացնել  դատարան հրավիրել որոշ, նաև՝   առնվազն մարզային վարչության մակարդակով բարձրաստիճան հայ ոստիկանների: Նրանք պետք է ցուցմունք տան, թե իրոք ի՞նչ է կատարվել, իրենք իրո՞ք Պերմյակովին հայկական կողմին հանձնելու որևէ պահանջ,  խնդրանք չե՞ն ներկայացրել, թե՞ սա ընդամենը ռուս գնդապետի դիրքորոշումն է:

Ե.Վարոսյանը նշել է նաև, որ գնդապետ Մերզլիկինը սկզբում  թերի է  ներկայացրել իր ցուցմունքը, փորձում էր անընդհատ շեշտը դնել նրա վրա, որ Պերմյակովին ձերբակալելու պահին իրենք չեն իմացել, որ նա կասկածվում է սպանություն կատարելու մեջ, և որ  իմացել են միայն, որ նա դասալիք է: Դա  հիմնական հակասությունն էր նրա նախաքննական ցուցմունքի հետ: Սակայն հատկապես  հարցաքննության վերջում վկան ընդունել է, որ Պերմյակովի անձի մասին իմանալուց հետո առաջին հարցը, որ ինքը տվել է նրան, եղել է՝ ինչո՞ւ սպանեցիր այդ մարդկանց:  «Ակնհայտ է, որ ձերբակալման պահին գնդապետը, ում իրավազորության ներքո գտնվել է Պերմյակովը, ամբողջությամբ հասկացել է, որ սա այն անձն է, ով Գյումրի քաղաքում  ոճրագործություն  կատարելու մեջ է կասկածվում»,- հավելել է Երվանդ Վարոսյանը:

Փաստաբանը նշել է, որ սկզբնական շրջանում վկաները, հատկապես՝  ռուս զինծառայողները,  որոշակի ուղղվածության ցուցմունքներ էին տալիս, դրանք որոշակիորեն փոփոխվել են: Ձերբակալման պահին նրանք  նկարագրում էին, որ ձերբակալման վայրում գտնվել են նաև ՀՀ ԱԱԾ աշխատակիցները, հետագա՝    հաջորդ օրերի ցուցմունքներում դրանք փոփոխվել են,  ու ԱԱԾ աշխատողները դարձել են ոստիկաններ և պարզվել է, որ նրանք մոտ չեն եղել ձերբակալման վայրին, այլ գտնվել են մոտ 100 մ հեռավորության վրա:

«Ես կարծում եմ, որ,  այնուամենայնիվ,  կան որոշակի խնդիրներ, որոնք բացահայտման ենթակա են, հատկապես Պերմյակովին ձերբակալելուց հետո տեղի ունեցած զարգացումներում: Պերմյակովի՝ ռուսական ռազմաբազայում  հայտնվելը մինչ այսօր լիարժեք մեզ համար պարզաբանված չէր, թե ինչո՞ւ և ինչպե՞ս է դա տեղի ունեցել»,- նշել է Ե.Վարոսյանը: