Փաստ ինֆո

ՀՀ ազգային ժողովի պատգամավոր Էդմոն Մարուքյանը դիմում է հղել ՀՀ վերաքննիչ քրեական դատարանի նախագահ Վազգեն Ռշտունուն՝ խնդրելով  բեկանել Երևանի Շենգավիթ վարչական շրջանի առաջին ատյանի  դատարանի 2016 թվականի փետրվարի 19-ի որոշումը ամբաստանյալ Վարդգես Գասպարիին կալանավորելու մասին և  անհապաղ նրան կալանքից ազատել:

Պատգամավորը նշում է, որ Հայաստանի Հանրապետությունը հռչակվել է իրավական պետություն, այնուհետև միացել Մարդու իրավունքների և հիմնարար ազատությունների պաշտպանության մասին եվրոպական կոնվենցիային՝ որդեգրել Մարդու իրավունքների, ժողովրդավարության և օրենքի գերակայության արժեքները: Ուստի, Է.Մարուքյանը նշում է, որ   չի  կարող անտարբեր մնալ ակտիվ քաղաքացի Վարդգես Գասպարիի նկատմամբ դատարանի կողմից կիրառված անհիմն և որևէ կերպ չպատճառաբանված որոշման նկատմամբ: Պատգամավորը Վերաքննիչ դատարանի նախագահին ներկայացնում է փաստաթուղթ՝ մի շարք կարևոր հանգամանքներներով, որոնք, ըստ պատգամավորի, Վերաքննիչ քրեական դատարանը պետք է հաշվի առնի հիշյալ կալանավորման որոշման դեմ բերված բողոքը քննության առնելիս:

Ընթացիկ տարվա փետրվարի 19-ին Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանը`  նախագահությամբ դատավոր Նելլի Բաղդասարյանի,  Վարդգես  Գասպարիի նկատմամբ կայացրել է  կալանավորման որոշում:   Դատարանը պատճառաբանել է, որ քրեական գործի դատական քննության ընթացքում ամբաստանյալ Վ. Գասպարիի դրսևորած վարքագիծը՝ այն, որ նա բազմիցս դատարանի կանչով չի ներկայացել դատական նիստերին, ինչի արդյունքում դատական նիստերը ձախողվել են: Դատարանը գտել   է, որ գործի քննության ընթացքում ամբաստանյալ Վ. Գասպարիի մասնակցությունը հնարավոր է ապահովել միայն նրա նկատմամբ կալանավորումը որպես խափանման միջոց ընտրելու պայմաններում:

Է.Մարուքյանը  պարզաբանում է, որ  այն հանցագործությունը, որի կատարումը մեղսագրվում է Գասպարիին, նախատեսում է կալանավորում՝ առավելագույնը 3 ամիս ժամկետով (Հայաստանի Հանրապետության քրեական օրենսգրքի 343-րդ հոդվածի 2-րդ և 3-րդ մասեր՝  Դատարանի նկատմամբ անհարգալից վերաբերմունք):  Ուստի նման որոշում կայացնելիս դատարանը պետք է հիմնավորեր, որ բավարար հիմքեր կան ենթադրելու, որ մեղադրյալը կարող է   թաքնվել քրեական վարույթն իրականացնող մարմնից. խոչընդոտել մինչդատական վարույթում կամ դատարանում գործի քննությանը` քրեական դատավարությանը մասնակցող անձանց վրա անօրինական ազդեցություն գործադրելու, գործի համար նշանակություն ունեցող նյութերը թաքցնելու կամ կեղծելու, քրեական վարույթն իրականացնող մարմնի կանչով առանց հարգելի պատճառների չներկայանալու կամ այլ ճանապարհով, կատարել քրեական օրենքով չթույլատրված արարք, խուսափել քրեական պատասխանատվությունից և նշանակված պատիժը կրելուց,  խոչընդոտել դատարանի դատավճռի կատարմանը:

Պատգամավորը փաստում է, որ  մինչ այդ Գասպարիի ներկայությունը դատական նիստերին հնարավոր է եղել ապահովել նրան բերման ենթարկելու միջոցով: Ընդ որում, Դատարանը, ինչպես և ամբողջ հասարակությունը, քաջատեղյակ է, թե գործով ամբաստանյալը որտեղ է մշտապես գտնվում: Ավելին, դատարանը  խափանման միջոց ընտրելու հարցը լուծելիս, ի թիվս այլնի, պարտավոր էր հաշվի առնել ամբաստանյալի տարիքն ու առողջական վիճակը: Մինչդեռ անտեսվել է Գասպարիի 59 տարեկան և վատառողջ լինելու հանգամանքը:

Պատգամավորն ընդգծել է նաև, որ դատարանը կալանավորման որոշումը կայացրել է առանց Գասպարիի ներկայությունն ապահովելու՝ խախտելով նրա լսված լինելու իրավունքը, որն ամրագրված է Մարդու իրավունքների եվրոպական կոնվենցիայի 6-րդ հոդվածով, Եվրոպական դատարանի նախադեպային որոշումներով և արդար դատաքննության իրավունքի կարևոր բաղադրիչներից է, մինչդեռ ոչինչ չէր խոչընդոտում ամբաստանյալին, ինչպես նախկինում, բերման ենթարկելով ապահովել նրա մասնակցությունն իր կալանավորման հարցի վերաբերյալ քննարկմանը: