Փաստ ինֆո

Այսօր Ավան և Նոր-Նորք վարչական շրջանների ընդհանուր իրավասության դատարանում շարունակվեց  ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Կարեն Բաղրամյանի գործի քննությունը, ով կրկին պնդեց իր միջնորդությունը՝ գործն արագացված ընթացակարգով քննելու վերաբերյալ:

Ըստ մեղադրանքի՝ նույն զորամասի 1-ին կուրսանտական գումարտակի 1 մարտկոցի կուրսանտ, շարքային  Կարեն Բաղրամյանը Հայկազ Բարսեղյանի սպանությանը նախորդող օրը՝ հունվարի 28-ին ժամը 07:40-ի սահմաններում ննջարանը մաքրելու հարցի շուրջ վիճաբանել է համածառայող Հայկազ Բարսեղյանի հետ, որի ընթացքում բռնության գործադրմամբ հարվածներ է հասցրել վերջինիս մարմնի տարբեր մասերին:

Բացի այդ, Կարեն Բաղրամյանը նույն օրը, ժամը 13:00-ի սահմաններում, իր հանգիստը խանգարելու հարցի շուրջ, կրկին բռնություն է գործադրել Հայկազ Բարսեղյանի նկատմամբ և կրկին  հարվածներ հասցրել նրա մարմնի տարբեր մասերին:

Կարեն Բաղրամյանին մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասով, իսկ որպես խափանման միջոց է ընտրվել հրամանատարության հսկողության հանձնելը:

Այս գործով որևէ անձ տուժող կամ տուժողի իրավահաջորդ ճանաչված չէ, և դատարանը՝ նախագահությամբ Դավիթ Հարությունյանի, նախորդ նիստում գտել էր, որ մինչև գործով դատաքննությանն անցնելը և ամբաստանյալի կողմից գործն արագացված ընթացակարգով քննելու միջնոդությունը քննարկելն անհրաժեշտ է լսել նաև սպանված Հայկազ Բարսեղյանի հորը՝ Արկադի Բարսեղյանին, որ Հայկազի սպանության գործով տուժողի իրավահաջորդ է ճանաչվել:

Մեղադրող Հայկ Հարոյանն էլ կարծիք էր հայտնել՝ նշելով, որ Հայկազ Բարսեղյանի նկատմամբ քրեական հետապնդում չիրականացնելու վերաբերյալ որոշում է կայացվել մահվան հիմքով, քրեական դատավարության պահանջներից չի բխում նրա մերձավոր ազգականներից մեկին այս գործով որպես տուժողի իրավահաջորդ ներգրավվելը:

Այսօր դատարան ներկայացած սպանված Հայկազ Բարսեղյանի հայրը՝ Արկադի Բարսեղյանը և փաստաբան Գարիկ Գալիկյանը տուժողի իրավահաջորդ ներգրավվելու վերաբերյալ հարցը թողեցին դատարանի հայեցողությանը:

Դատարանի որոշմամբ՝  սպանված Հայկազ Բարսեղյանի հայրը ներգրավվեց գործին  որպես տուժողի իրավահաջորդ, իսկ նրա ներկայացուցիչ ներգարվվեց փաստաբան Գարիկ Գալիկյանը:

Սպանված Հայկազ Բարսեղյանի հայրը նշեց նաև, որ իր որդին և գործով ամբաստանյալը մեկական անգամ են հարվածել միմյանց, սակայն գործի նյութերի մեջ նշվում է, որ ամբաստանյալ Կարեն Բաղրամյանը հարվածներ է հասցրել Հայկազի մարմնի տարբեր մասերին, ինչը տուժողի իրավահաջորդի խոսքով՝ իրականությանը չի համապատասխանում: «Կարենի կողմից հարված է եղել Հայկազի շրթունքին, և մեկ անգամ էլ Հայկազն է հարվածել Կարենին»,-ասաց նա:

Դատարանը գտավ, որ անհրաժեշտություն կա, որպեսզի տուժողի իրավահաջորդը լիարժեք ծանոթանա գործի նյութերին, և այդ իսկ պատճառով  գործի քննությունը հետաձգվեց ու նշանակվեց մարտի 22-ին: