Փաստ ինֆո

2015թ. նոյեմբերի 19-ին «Շենգավիթ» բժշկական կենտրոնում նորածնի մահվան դեպքով նշանակված դատաբժշկական փորձաքննության եզրակացությունը դեռևս չի ստացվել: Այդ մասին «Փաստինֆո»-ն տեղեկացավ Քննչական կոմիտեից:

Ինչպես ավելի վաղ տեղեկացրել ենք, նախածննդյան փուլում երեխայի մահվան դեպքով հարուցվել է քրեական գործ՝ ՀՀ քրեական օրենսգրքի 130-րդ հոդվածով՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը:

 25-ամյա Լարիսա Շահբազյանը հղիության մինչև 34 շաբաթականը գտնվել է Արմավիր մարզի բժշկի հսկողության ներքո, սակայն կնոջ մոտ նկատվել է պտղաջրերի արտահոսք և  34 շաբաթականում հղին տեղափոխվել է «Շենգավիթ» ԲԿ, որտեղ  12 օր գտնվել է բժիշկների հսկողության ներքո :

«Փաստինֆո»-ի թղթակցի հետ զրույցում  ծննդկանի տեգրը՝ Ա. Քոչարյանը, ով մասնագիտությամբ ևս բժիշկ է, նշեց, որ եղբոր կնոջ առաջին հղիությունն է եղել և հղիության ողջ ընթացքում որևէ խնդիր չի առաջացել, երեխայի քաշը եղել է նորմալ, «Շենգավիթ» ԲԿ ընդունվելիս  երեխայի քաշը եղել է 2կգ 450 գրամ, ծննդաբերության ժամանակ՝  2կգ 750 գրամ:

Հղիին բուժող բժիշկը, ով, ըստ Քոչարյանի,  եղել է  բժշկուհի Անին, 12 օր շարունակ հսկել է հղիին, անհրաժեշտ դեղորայք է նշանակել, իսկ երեխայի ծնվելու օրը՝ նոյեմբերի 19-ին, կնոջ հարազատներին վստահեցրել է, որ երեխայի մոտ խնդիր չկա:

Երեխայի հորեղբայրը նշում է նաև, որ փոքրիկի մահվան օրը հերթապահ բժիշկը եղել է Նարինեն:

Քոչարյանը գտնում է, որ երեխան մահացել է բժշկուհու կողմից  պարտականությունները պատշաճ չկատարելու հետևանքով:  Կասկածի տակ չդնելով  նրա լավ մասնագետ լինելու հանգամանքը` մեր զրուցակիցը կարծիք հայտնեց, որ  տվյալ պարագայում բժշկուհին իր պարտականություններում թերացել է:

Մահացած երեխայի հորեղբայրը նշում է, որ հղիին ծնդալուծելուց  մեկ ժամ առաջ բժշկուհի Նարինեն հարազատներին վստահեցրել է, որ ամեն ինչ նորմալ է և կինը բնական ճանապարհով կունենա փոքրիկին, սակայն քիչ անց բժիշկը մոտեցել է հղիին, ով արդեն պատրաստվում էր գնալ ծնարան և ասել, որ երեխայի սրտի բաբախը չեն լսում՝  նա արդեն մահացած է:

Հղին բնական ճանապարհով ծննդալուծվել է,  սակայն արդեն տեղյակ են եղել, որ երեխան մահացած է, «պորտալարն ամբողջությամբ փաթաթված էր երեխայի պարանոցին, տվյալ հատվածում երեխայի պարանոցի մաշկն ամբողջությամբ վնասված էր»,- ասաց մահացած երեխայի հորեղբայրը:

Ըստ նրա՝ բժիշկների անուշադրության հետևանքով իրենք կորցրեցին իրենց առողջ երեխային: «Ես նորմալ առողջ երեխա եմ տվել իրենց, հղին ծայրահեղ վիճակում չի բերվել հիվանդանոց, ավելին, շուրջ 12 օր իրենց հսկողության տակ է եղել, և եթե կար խնդիր, ապա թող նախապես կանխեին»,-ասաց Քոչարյանը` հավելելով, որ բժիշկները մեկը մյուսի վրա են գցել, որի հետևանքով տեղի է ունեցել այս ողբերգական դեպքը: Նրա կարծիքով, եթե կեսարյան հատում կատարեին, ապա փոքրիկին կփրկեին:

«Թող իրենք ապացուցեն, ինչ  է նշանակում այս մահը, կաթվածային մահ տեղի չի ունեցել, ես տեսել եմ խեղդոց, այն դեպքում, երբ արագ կեսարյան հատում կատարվեր՝ երեխան ողջ կմնար», -ասաց Քոչարյանը` հավելելով, որ բժիշկը հայտարարել է, թե կեսարյան հատման ցուցում չկար:

Մեր զրուցակցի ներկայացմամբ` ողբերգական դեպքից հետո բուժանձնակազմից որևէ մեկը չի ներկայացել հղիի հարազատներին և չի հայտնել, թե ի վերջո որն է եղել երեխայի մահանալու  պատճառը:

«Նարինեն խոստովանել է, որ եթե կեսարյան հատում կատարվեր ժամանակին, ապա այդ ողբերգական դեպքը կկանխվեր»,- ասաց Քոչարյանը` հավելելով, որ բժշկուհին խնդրել է չբողոքել` ասելով, որ հիվանդանոցի թույլ օղակն ինքն է, իրեն գործից կհեռացնեն, «ոչինչ, դեպքն եղել է, դուք էլի երեխա կունենաք»:

Չցանկանալով տվյալ ԲԿ-ում որևէ բժշկի առանձնացնել, թե ում մեղավորությամբ  է երեխան մահացել` ծննդկանի հարազատը նշեց. «Խնդիրը տիրող իրավիճակն է, ոչ մարդկային վերաբերմունքը հղիի նկատմամբ, ինչը բացարձակապես չի մտահոգում ԲԿ-ի տնօրեն՝ Երևանի գլխավոր մանկաբարձ-գինեկոլոգին»:

«Իրենք ոչ մի արդարացում չունեն, մարդասպան են, այդ հիվանդանոցում սնկի պես աճում է մարդասպանությունը տարբեր բժիշկների ձեռքով»,- ասաց մեր զրուցակիցը:

Տուժող կողմը բողոք է ներկայացրել երկու բժշկուհիների և հիվանդանոցի տնօրենի դեմ:

Նշենք, որ ամիսներ առաջ նորածնին կորցրած Լարիսան այսօր կրկին փոքրիկի է սպասում: