Փաստ ինֆո

Բանդիտիզմի, սպանության, ավազակության, հափշտակությունների, այսպես կոչված՝  նոր բանդայի գործից անջատված՝  համակարգչային տեխնիկայի օգտագործմամբ  «Հայբիզնեսբանկ»-ից առանձնապես խոշոր չափերի հափշտակության  մասով  այսօր հրապարակվեց մեղադրական դատավճիռը:

Դատարանն  ամբաստանյալ Տիգրան Հովհաննիսյանին մեղավոր ճանաչեց ՀՀ քրեական օրենսգրքի 181-րդ հոդվածի 3-րդ մասի 1-ին կետով, այն է՝  համակարգչային տեխնիկայի օգտագործմամբ կատարված առանձնապես խոշոր չափերի հափշտակություն, և դատապարտեց  6 տարվա ազատազրկման:  Ընդ որում, հինգուկես տարվա ազատազրկմանը դատարանը գումարեց նախորդ դատավածության շրջանակում նշանակված պատժի չկրած մասի վեց ամիսը:

Ամբաստանյալ Էդիտա Ալիխանյանը մեղավոր ճանաչվեց ՀՀ քրեական օրենսգրքի 214-րդ հոդվածի  2-րդ մասով՝   բանկի ծառայողի կողմից լիազորությունները չարաշահելը, որն առաջացրել է ծանր հետևանքներ, և 181-րդ հոդվածի 3-րդ մասի 1-ին կետով և դատապարտվեց հինգ տարվա ազատազրկման: Դատարանը՝ հաշվի առնելով, որ ամբաստանյալն արդեն կրել է պատժի 2 տարի  9 ամիս 17 օրը և մնացել է կրելու  2 տարի 2 ամիս 13 օրը,  նրա նկատմամբ  պատիժը պայմանականորեն չկիրառեց՝ սահմանելով երեք տարվա փորձաշրջան, և ամբաստանյալն անհապաղ ազատ արձակվեց կալանքից՝ հենց դատարանի դահլիճում:

Ամբաստանյալ Գոհար Գաբրիելյանը մեղավոր ճանաչվեց ՀՀ քրեական օրենսգրքի 38-181-րդ հոդվածի 3-րդ մասի 1-ին կետով, այն է՝  համակարգչային տեխնիկայի օգտագործմամբ կատարված առանձնապես խոշոր չափերի հափշտակությանն օժանդակելը,  և դատապարտվեց 4 տարվա պայմանական ազատազրկման՝   երեք տարվա փորձաշրջանով,  ապա կիրառեց համաներման մասին որոշումն, ու նա ազատվեց պատժից: Ամբաստանյալի նկատմամբ ընտրված «ստորագրություն չհեռանալու մասին» խափանման միջոցը մնաց անփոփոխ՝ մինչև դատավճռի օրինական ուժի մեջ մտնելը:

Ամբաստանյալ Մնացական Սարգսյանը մեղավոր ճանաչվեց   ՀՀ քրեական օրենսգրքի 38-181-րդ հոդվածի 3-րդ մասի 1-ին կետով՝ համակարգչային տեխնիկայի օգտագործմամբ կատարված առանձնապես խոշոր չափերի հափշտակությանն օժանդակելը, 235-րդ հոդվածի 1-ին մասով՝ ապօրինի կերպով զենք ու ռազմամթերք ձեռք բերելը, պահելը, իրացնելը,  և դատապարտվեց հինգ տարվա ազատազրկման:

Ամբաստանյալ Մառլեն Մուրադյանը մեղավոր ճանաչվեց   ՀՀ քրեական օրենսգրքի 38-181-րդ հոդվածի 3-րդ մասի 1-ին  կետով,  ու դատապարտվեց 4 տարվա   պայմանական ազատազրկման՝ երեք տարվա փորձաշրջանով, նա համաներման որոշման կիրառմամբ ազատվեց պատժից:

Ամբաստանյալ Վահե Ստեփանյանը մեղավոր ճանաչվեց  ՀՀ քրեական օրենսգրքի 38-181-րդ հոդվածի 3-րդ մասի 1-ին  կետով  և դատապարտվեց 4 տարվա ազատազրկման: Նրա նկատմամբ ընտրված «ստորագրություն չհեռանալու մասին» խափանման միջոցը մնաց անփոփոխ՝ մինչև դատավճռի օրինական ուժի մեջ մտնելը: Ի դեպ, նա իր վերջին խոսքում նշել էր, որ բանկին պատճառված վնասի իր մասը կմարի, սակայն այժմ այն մարելու հնարավորություն չունի:

Դատավճռով  «Հայբիզնեսբանկ»-ի քաղհայցը  չմարված գումարի մասով  թողնվեց առանց քննության՝ բանկը կարող է քաղհայց ներկայացնել քաղաքացիական դատավարության կարգով: 

Դատավճիռն ընդմիջվեց  դահլիճից մի խումբ երիտասարդների կողմից հայհոյանքներով ուղեկցված քաշքշուկի պատճառով: Դատական կարգադրիչները թույլ չտվեցին, որպեսզի նրանք ճեղքեն ու անցնեն դեպի կալանքի մեջ գտնվող տղամարդ ամբաստանյալները, ըստ ամենայնի, նրանց «ընդվզումը» նրանցից մեկի դեմ էր ուղղված, ապա դատական կարգադրիչները նրանց դահլիճից դուրս մղեցին:

Սակայն դրանով միջադեպը չսպառվեց՝ դատարանի շենքից դուրս նրանք ագրեսիվ պահվածք դրսևորեցին նաև դատական նիստը լուսաբանող լրագրողուհիների հանդեպ՝ նրանց ուղղությամբ շպրտելով ջրով լիքը պլաստիկե շշեր: