Փաստ ինֆո

Արագածոտնի մարզի ընդհանուր իրավասության դատարանը,  դատավոր Սերգեյ  Մարաբյանի նախագահությամբ, ճանապարհային երթևեկության և տրանսպորտային միջոցների շահագործման կանոնները խախտելու, որն անզգուշությամբ առաջացրել է երկու կամ ավելի մարդու մահ պատճառելու մեջ մեղադրվող 30-ամյա Արտյոմ Գալստյանին արդարացրեց:

Այդ մասին «Փաստինֆո»-ի տեղեկությունը հաստատեց Արտյոմ Գալստյանի պաշտպան Շիրվանզադե Վարդանյանը՝ հավելելով, որ դատարանի գնահատմամբ՝ Արտյոմ Գալստյանին առաջադրված մեղադրանքը  չի հիմնավորվել:

Նշենք, որ մեղադրող դատախազն իր մեղադրական ճառում միջնորդել էր Ա. Գալստյանին դատապարտել 4 տարի ժամկետով ազատազրկման:

Ըստ մեղադրանքի՝ Արտյոմ Գալստյանը 2013 թվականի հոկտեմբերի 24-ին՝ ժամը 17:30-ի սահմաններում, իր անձնական օգտագործման «Վազ 21-07» մակնիշի ավտոմեքենայով իր կին Արմինե Ալաբերքյանի, նրա մայր Ռիտա Հովհաննիսյանի և 3 երեխաների՝ Ա. Գալստյանի, Ն. Գալստյանի և Մ. Գալստյանի, կնոջ քույր Անի Ալաբերքյանի հետ միասին ՀՀ Արագածոտնի մարզի Կարբի գյուղից ուղևորվել են Վանաձոր քաղաք:

Երևան-Վանաձոր ավտոճանապարհով ընթանալով՝ ժամը 19:00-ի սահմաններում անցել է Քուչակ գյուղը, և ավտոմեքենան շուրջ 60կմ/ժ արագությամբ մոտակա լույսերով վարել դեպի Ապարան քաղաք: Այդ պայմաններում Արտյոմ Գալստյանը, ունենալով «ՎԱԶ 21-214» մակնիշի ավտոմեքենայի հետ մինչ այդ տեղի ունեցած բախումից հետո Ապարան քաղաք տանող ուղեմասում կանգնած վիճակում գտնվող «ԳԱԶ 53-12» մակնիշի ավտոմեքենան հայտնաբերելու հնարավորություն, ինչպես նաև տվյալ ավտոմեքենայի եզրաչափային (գաբարիտային) լույսերի միացված, այնպես էլ՝ չմիացված վիճակում լինելու պայմաններում, ժամանակին միջոցներ չի ձեռնարկել իր վարած ավտոմեքենան մինչև ընդհարման տեղին հասնելը կանգնեցնելու, կամ էլ երթևեկության համար անվտանգ կերպով «ԳԱԶ 53-12» մակնիշի ավտոմեքենային շրջանցելու համար և թույլ է տվել ՃԵԿ-ի 67-րդ կետի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի պահանջներին հակասող գործողություններ, որոնցով պայմանավորել ընդհարման առաջացումը՝ ինքն իրեն զրկելով այն կանխելու տեխնիկական հնարավորությունից և իր ավտոմեքենայի առջևի մասով բախվել է երթևեկելի մասում կանգնած «ԳԱԶ 53-12» ավտոմեքենայի հետևի ձախ մասին, վթարի ենթարկվել, որի վարորդ Անդրանիկ Ղազարյանի կողմից թույլ է տրված «Ճանապարհային երթևեկության անվտանգության ապահովման մասին» ՀՀ օրենքի 18-րդ հոդվածի 2-րդ մասի և ՃԵԿ-ի 23-րդ կետի պահանջներին հակասող գործողությունները՝ ավտոմեքենան շահագործելով դրա վթարային լույսերի ազդանշանային համակարգը տեխնիկապես անսարք և անաշխատունակ վիճակում, իսկ «ՎԱԶ 21-214» մակնիշի ավտոմեքենայի հետ ընդհարումից հետո՝ իր վարած ավտոմեքենայի հետ՝ առնվազն 30 մետր հեռավորության վրա չտեղադրելով «Վթարային կանգառ» ճանաչման նշան կամ թարթող կարմիր լապտերիկ, տեխնիկական տեսակետից պատճառական կապի մեջ չեն «ՎԱԶ 21-07» մակնիշի ավտոմեքենայի հետ տվյալ ընդհարման առաջացման հետ:

Ավտովթարի հետևանքով իր ավտոմեքենայի ուղևորներ Անի Աշոտի Ալաբերքյանին, Ռիտա Սերգեյի Հովհաննիսյանին, Արեգ Արտյոմի Գալստյանին և Մանե Արտյոմի Գալստյանին անզգուշությամբ պատճառվել է մահ, իսկ մյուս ուղևորներ՝ Արմինե Աշոտի Ալաբերքյանի և Նարեկ Արտյոմի Գալստյանի առողջությանը անզգուշությամբ պատճառվել է ծանր վնաս՝ կյանքին վտանգ սպառնացող:

Արտյոմ Գալստյանին մեղադրանք էր առաջադրվել ՀՀ քրեական օրենսգրքի 242-րդ հոդվածի 3-րդ մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը: