Փաստ ինֆո

Գյումրիի նախկին քաղաքապետի ու նրա որդու հետ իր վիճաբանության մասին տեղեկություններ տարածելու համար բռնցքամարտիկը մեղադրում է մամուլին, այն դեպքում, երբ ոստիկանությունն ավելի շուտ էր ահազանգ ստացել, քան մամուլն էր գրել այդ մասին:

Բռնցքամարտի մարզիչ Գարիկ Բաղդասարյանը հայտարարություն է տարածել, որտեղ հերքում է իր և Գյումրիի նախկին քաղաքապետ Վարդան Ղուկասյանի ու վերջինիս որդու միջև տեղի ունեցած ծեծկռտուքի մասին տեղեկությունները` դրանք որակելով «ստահոդ լուրեր»:

«Ղուկասյանների ընտանիքը ինձ համար հարազատ օջախ է, օջախ, որտեղ ես աղ ու հաց եմ կիսում: Սպարտակ Ղուկասյանը իմ մանկության ընկերն է, իմ եղբայրը: Վարդան Ղուկասյանը այն մարդն է, ով, հոր նման, կանգնած է իմ թիկունքին: Նա իմ մարզական ու մարզչական առաջընթացի հովանավորն է և աջակիցը»,- իր հայտարարության մեջ նշում է մարզիչն ու այդ պատմության տարածման համար ամբողջ մեղքը բարդում լրատվամիջոցների վրա:

«Իմ ու Ղուկասյանների միջև չկա և չի կարող լինել որևէ լարվածություն, առավել ևս` վիճաբանություն: Դա անգամ ծիծաղելի է»,-նշում է Գարիկ Բաղդասարյանը` իր հետ կատարվածի համար կրկին վիրավորական խոսքեր ասելով լրագրողների հասցեին: «Կոչ եմ անում ձեր առօրյա «լրատվական լվացքից» զերծ պահել իմ անունը, չվարկաբեկել իմ ու իմ  կողմից հարգված մարդկանց բարի համբավը»,- գրում է նա ու հիշեցնում, որ «զրպարտությունը պատժվում է օրենքով»:

Ի դեպ, հիշեցնենք, որ այս միջադեպի մասին մեր հրապարակմանը հաջորդեց նաև ոստիկանության պաշտոնական հաղորդագրույունը, որտեղ ասվում էր, որ փետրվարի 12-ին, ժամը 23.30-ին, ոստիկանության Կումայրիի բաժնում օպերատիվ տեղեկություն է ստացվել, որ փետրվարի 11-ին` կեսօրին, Գյումրիի Ռուսթավելու փողոցում գտնվող մանկական սրճարանում, վիճաբանության ժամանակ,  1983 թ. ծնված, նախկինում դատապարտված Սպարտակ Ղուկասյանն իր ընկերոջ` 1986 թ. ծնված Պատվական Մ.-ի հետ մահակներով ծեծի են ենթարկել 1979 թ. ծնված Նորայր Ս.-ին և 1979 թ. ծնված Գարիկ Բ.-ին: Վերջինը հենց բռնցքամարտի մարզիչ Գարիկ Բաղդասարյանն է:

Ասել է թե` եթե լրատվմիջոցներին այս դեպքի մասին հայտնի է դարձել փետրվարի 17-ին, ապա ոստիկանությունը դրանից 5 օր առաջ է օպերատիվ տեղեկություն ունեցել, ուստի մարզիչի մեղադրանքները լրագրողների հասցեին, մեղմ ասած, անհիմն են:

Նշենք, որ փետրվարի 12-ին դեպքի մասին տեղեկություն ստանալով, ոստիկանությունը միայն 4 օր անց է բացատրություններ ստացել տուժողներից: «Փետրվարի 16-ին նյութերի նախապատրաստման ընթացքում Պատվական Մ.-ն, Արթուր Թ.-ն, Նորայր Ս.-ն և Գարիկ Բ.-ն բացատրությաններ են տվել, որ փետրվարի 11-ին իրենք որևէ մեկի հետ չեն վիճաբանել, իրենց ոչ ոք չի հարվածել կամ հրել»,-ասված էր ոստիկանության հաղորդագրության մեջ: Այդուհանդերձ, նրանց դատաբժշկի ուղեգիր է տրվել, Ոստիկանությունը շարունակում է նյութերի նախապատրաստումը: