Փաստ ինֆո

Մոր սպանության մեջ մեղադրվող 45-ամյա որդին մեղսունակ է ճանաչվել:

Շենգավիթ վարչական շրջանի ընդհանուր իրավասության դատարանում՝ նախագահությամբ Ալեքսանդր Ազարյանի, այսօր երկարատև ընդմիջումից հետո շարունակվեց գործի քննությունը: Ստացվել էր պաշտպանական կողմի միջնորդությամբ նշանակված դատահոգեբուժական և դատահոգեբանական ստացիոնար համալիր հանձնաժողովային փորձաքննության եզրակացությունը:

Պաշտպանական կողմը փորձագետին առաջադրել էր մի շարք հարցեր՝ Սամվել Դարբինյանը տառապե՞լ է արդյոք մեղսագրվող արարքի ժամանակ կամ մինչ այդ որևէ հոգեկան հիվանդությամբ, հոգեկան գործունեության ժամանակավոր, խրոնիկ խանգարմամբ, տկարամտությամբ, թուլամտությամբ կամ գտնվե՞լ է արդյոք այլ հիվանդագին վիճակում: Ներկայումս ինչպիսի՞ հոգեվիճակում է գտնվում, կարո՞ղ է արդյոք ընկալել քրեական գործի քննության ընթացքը, քննության ընթացքում կարո՞ղ է ընկալել գործի համար կարևոր հանգամանքներ և նրան առաջադրված հարցերին տալ ադեկվատ և ոչ երևակայական պատասխաններ: Արդյոք տառապե՞լ է որևէ հոգեկան հիվանդությամբ, եթե՝ այո, ապա՝ ինչպիսի՞: Արդյոք նա գտնվե՞լ է հոգեկան խիստ հուզմունքի, ֆիզիոլոգիական աֆեկտի վիճակում, կամ գտնվե՞լ է արդյոք հոգեկան այնպիսի հուզական վիճակում, որը կարող էր էապես ազդել նրա գիտակցության կամ անգործունեության վրա, թե՝ ոչ:

Ըստ փորձաքննության եզրակացության՝ Սամվել Դարբինյանը  խրոնիկ հոգեկան հիվանդությամբ չի տառապել և ներկայումս ևս չի տառապում, այլ նրա մոտ հայտնաբերվել է ալկոհոլիզմ «կախվածության համախտանիշ, ալկոհոլիզմ անձի պսիխոպաթիզացիա» ախտորոշմամբ:

Որպես խրոնիկ հոգեկան հիվանդությամբ չտառապող անձ նա իրեն մեղսագրվող արարքը կատարելու ժամանակ կարող էր հաշիվ տալ իրեն՝ իր գործողությունների համար և ղեկավարել դրանք:

Ուստի Ս. Դարբինյանին հարկ է կատարածի նկատմամբ ճանաչել մեղսունակ, քանի որ իրեն մեղսագրվող արարքը կատարելու պահին նա չի գտնվել  որևէ հոգեկան խանգարման վիճակում՝ այլ գտնվել է սովորական հարբածության վիճակում:

Ներկա հոգեկան վիճակում Սամվել Դարբինյանը կարող է մասնակցել քննչական գործողությունների, ընկալել քրեական գործի քննության ընթացքը և տալ  ճիշտ ցուցմունքներ:

Նշենք նաև, որ գործով դատարանն անցավ դատական վիճաբանությունների փուլին, և մեղադրող դատախազը ժամանակ է խնդրել ճառին նախապատրաստվելու համար:

Դատարանում ամբաստանյալը հայտարարել է, որ մեկ ամսից ավելի է, ինչ գտնվում է հացադուլի մեջ:

Սամվել Դարբինյանի պաշտպան՝ Լյուդվիգ Ավետիսյանը մեզ հետ զրույցում նշեց, որ իր պաշտպանյալի այդ որոշմանն ինքը հավանություն չի տվել, ավելին՝ խորհուրդ  է տվել դադարեցնել, ասելով, որ դա ոչինչ չի տալու և որ միայն նրա առողջական վիճակն է վատթարանալու:

Ըստ մեղադրանքի՝ 45-ամյա Սամվել Դարբինյանը բնակվել է մոր հետ նույն բնակարանում և, ցավագին ընդունելով իր խմելու վերաբերյալ մոր դիտողությունները, խմած ժամանակ վիճաբանել է նրա հետ ու դիտավորությամբ բութ, կոշտ առարկաներով բազմաթիվ հարվածներ հասցրել մոր մարմնի տարբեր մասերին՝ պատճառելով կյանքի համար ծանր մարմնական վնասվածքներ, սպանել նրան:

Սամվելին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով: Նրա նկատմամբ որպես խափանման միջոց է ընտրվել կալանքը: