Փաստ ինֆո

Ազգային ժողովի էթիկայի հանձնաժողովը փետրվարի 15-ի նիստում նախատեսում է լսել իր վարույթում գտնվող երկու դիմումների վերաբերյալ պարզաբանումները: Այս մասին տեղեկանում ենք հանձնաժողովի կայքէջից:

Դիմումներից մեկը լրագրող Լիլիթ Լալայանինն է՝ ընդդեմ ԱԺ նախորդ տարեվերջին կայացած արտահերթ նստաշրջանի նիստերում բացակա պատգամավորների փոխարեն քվեարկած ՀՀԿ խմբակցության 5 պատգամավորների՝ Սպարտակ Մելիքյանի, Համլետ Հարությունյանի, Կարեն Սարիբեկյանի, Սեյրան Սարոյանի, Առաքել Մովսիսյանի, և ԲՀԿ խմբակցության 2 անդամի՝ Արշակ Մխիթարյանի ու Բազմասեր Առաքելյանի:

Լ.Լալայանը խնդրել է քննել հիշյալ պատգամավորների կողմից ԱԺ կանոնակարգ-օրենքի 6.1 հոդվածով նախատեսված էթիկայի կանոնները խախտելու հարցը և համապատասխան որոշում կայացնել:

Լրագրողը դիմումին որպես ապացույց կցել է քվեարկությունների պահն արձանագրած տեսագրությունը:

Մյուսը Հելսինկյան քաղաքացիական ասամբլեայի Վանաձորի գրասենյակի դիմումն է ընդդեմ ՀՀԿ խմբակցության անդամ Շուշան Պետրոսյանի:

ՀՔԱ Վանաձորի գրասենյակը դիմել է Շուշան Պետրոսյանի կողմից ՀՀ Ազգային ժողովի կանոնակարգ-օրենքով սահմանված էթիկայի նորմերը խախտելու, մասնավորապես՝ ֆեյսբուքյան իգական սեռի օգտատերերից մեկի հասցեին հնչեցրած սպառնալիքի ու վիրավորական արտահայտությունների վերաբերյալ որոշում կայացնելու հարցով:

Հանրապետական պատգամավորին, մասնավորապես, դուր չէր եկել ՀՀ պաշտպանության նախարարի հասցեին օգտատերի թողած քննադատական գրառումը, և նա օգտատերին սպառնացել էր, թե «լսի, այ լակոտ, աչքերդ կհանեմ»:

Թեև վերոհիշյալ 8 պատգամավորները, որոնց վարքագծին հանձնաժողովը պետք է գնահատական տա, պաշտոնապես ծանուցվել են, սակայն, դատելով նախկինում հանձնաժողովին ուղղված դիմումների կապակցությամբ պատգամավորներին հրավիրելու փորձից, խիստ կասկածելի է, որ նրանք բոլորը ներկայանան հանձնաժողովին բացատրություններ տալու համար:

Ի դեպ՝ փետրվարի 15-ի նիստն ընթացիկ նստաշրջանի համար կազմավորված հանձնաժողովի առաջին նիստն է: Այն, ինչպես արդեն հայտնել ենք, ղեկավարելու է ՀՀԿ խմբակցության անդամ Խոսրով Հարությունյանը:

Միակ խմբակցությունը, որը փոխել է իր ներկայացուցչին, ՀՅԴ-ն է. Աղվան Վարդանյանին փոխարինել է Արմեն Բաբայանը:

ՀՀԿ խմբակցությունը ներկայացնում են Սուքիաս Ավետիսյանը և Խոսրով Հարությունյանը, «Բարգավաճ Հայաստան»-ին՝ Վահան Բաբայանը, «Օրինաց երկրին»՝ Հովհաննես Մարգարյանը, «Ժառանգությանը»՝ Թևան Պողոսյանը: Ինչպես և նախկինում, «Հայ ազգային կոնգրես»-ի անդամի տեղը թափուր է: Խմբակցությունը բոյկոտում է հանձնաժողովի աշխատանքները և հրաժարվել է անդամ նշանակելուց: