Փաստ ինֆո

Գյումրիում Ավետիսյանների ընտանիքի յոթ անդամների սպանության գործով այսօրվա նիստում Ռուսաստանյան սահմանապահ զորքերի պայմանագրային զինծառայող Ստյոպա Սումբուլյանը պատմել է, թե սպանության  գիշերը ինչպես են  հայտնաբերել սահմանախախտին: Վկան հայտնել է նաև, թե ինչպես են պարզել, որ նա զենքով դասալքության դիմած, ապա նաև սպանություն իրականացրած զինվորն է:

Վկան հայտնել է, որ Բայանդուրի ուղեկալում հերթապահություն ստանձնելուց րոպեներ անց է Վալերի Պերմյակովը հայտնվել  սահմանային գոտում: Ըստ Ս.Սումբուլյանի, Պերմյակովը շփոթված էր, մրսած և հուզված:  Վկան հայտնել է, որ ի պատասխան կապիտան Խաչատրյանի հարցի՝ Պերմյակովն ասել է, որ ինքը ոչ ոքի չի սպանել, իսկ սահմանը խախտելու մտադրության մասին Պերմյակովը սահմանապահներին ոչինչ չի ասել, ձերբակալության ժամանակ դիմադրություն ցույց չի տվել:

ՌԴ սահմանապահ զորքերի զինծառայող հաջորդ վկան՝ Սերգեյ Սլյուսերը, հայտնել է, որ զինվորական կոշիկների հետքերը նրբանցքներից մեկով տարել են ինչ-որ տների բակեր, որտեղ խուզարկություններ են կատարվել, հետո արդեն ոտնահետքերը կորել են:

«Շանթ» հեռուստաընկերությանը տված հարցազրույցում տուժողների իրավահաջորդի ներկայացուցիչ, փաստաբան Միհրան Պողոսյանը նշել է, որ սահմանապահ ջոկատի զինծառայողների կողմից  մինչ այժմ տրված ցուցմունքներում կան հակասություններ, որոնք վերաբերվում են   Պերմյակովին ձերբակալելուց հետո  ընկած ժամանակահատվածին: Բուն ձերբակալության պահը, ըստ Մ.Պողոսյանի, վկաները գրեթե նույն կերպ են նկարագրում: 

Փաստաբանը  շատ կարևորել  է սահմանապահ ջոկատի հրամանատարի ցուցմունքը, ով մինչ այժմ չի հարցաքննվել, քանի որ   ի վերջո Պերմյակովին ռուսական ռազմաբազա հանձնելու որոշում կայացնողը եղել է նա, և Պերմյակովը նրա հետ է հեռացել:     «Կփորձենք հրամանատարի հարցաքննության ժամանակ  այլ անձանց ներգրավվածության մասին, այլ անձանց, այդ թվում՝ մեր հայկական իրավապահ մարմինների,  ներկայանալու մասին տեղեկություններն ամփոփ ստանալ և հասկանալ, թե ովքեր են ներկայացել և ինչ գործողություններ պետք է իրականացնեին, որոնք չեն իրականացրել»,- ասել է  տուժող կողմի ներկայացուցիչը:

Միհրան Պողոսյանը նշել է, որ ըստ գործի տվյալների, Պերմյակովի նպատակը ոչ թե հանձնվելն է եղել, այլ  նրա նպատակն եղել է սահմանի ապօրինի հատումը և Թուրքիայի տարածքով հեռանալը: «Այսինքն՝ հանձնվելու մասին այս պահին խոսելը,  ես կարծում եմ, վաղ է, որովհետև սահմանն ապօրինի հատելու փորձ կատարելու մեղադրանք է առաջադրված, կան այն հիմնավորող ապացույցներ»,- ասել է փաստաբանը՝ պատասխանելով հեռուստաընկերության լրագրողի հարցին:

«Ես ոչ ոքի չեմ սպանել»՝ ձերբակալվելիս Պերմյակովի արած հայտարարության վերաբերյալ  փաստաբանը տեսակետ է հայտնել, որ նա դեռևս այդ պահին հույս է ունեցել, որ սպանությունն իր անձի հետ չի կապվելու: Բայց ընդամենը ժամեր անց, երբ որ արդեն ապացույց է ձեռք բերվել, նա ընդունել է և ներկայացրել է Ավետիսյանների տանը  կատարած իր   գործողությունները:

 Միհրան Պողոսյանը կարևորել է, որ հենց դատաքննության ընթացքում հայտնի է դարձել,   որ Ավետիսյանների հարևանը լույսը վառել է, և Պերմյակովը՝ վախենալով, որ իրեն կարող են նկատել, դրանից հետո իրականացրել է փոքրիկ Սերյոժայի սպանությունը՝  սվին-դանակով՝ թեև զենքը եղել է սարքին, սակայն այլևս կրակոց չի արձակել:  

Մ.Պողոսյանը նշել է նաև, որ ի տարբերություն մինչև դատաքննության սկսվելը դատարանի կաշկանդվածությանը,  ներկայումս որևէ կաշկանդվածություն չի տեսնում տրված հարցերի, դրանք չսահմանափակելու առումով: Այժմ հնարավորինս նորմալ դատական պրոցես է ընթանում, նշել է փաստաբանը: