Փաստ ինֆո

Տավուշի մարզի ընդհանուր իրավասության դատարանը՝ նախագահությամբ Զոյա  Զաքինյանի, այսօր 34-ամյա Արթուր Մելիքբեկյանին  անպարտ է ճանաչել և արդարացրել՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, պահելու մեղադրանքում ՝ հանցադեպի բացակայության հիմքով:

Այդ մասին «Փաստինֆո»-ի թղթակցի հետ զրույցում ասաց  Արթուր Մելիքբեկյանի պաշտպան Ավագ Լալայանը:

Պաշտպանը մեզ հետ զրույցում նշեց, որ մեղադրող դատախազը մեղադրական ճառում միջնորդել էր իր պաշտպանյալին դատապարտել 1 տարի ժամկետով ազատազրկման, հիմք ընդունելով այն, որ Արթուր Մելիքբեկյանը նախաքննության ընթացքում տվել էր խոստովանական ցուցմունք:

Ավագ Լալայանի խոսքով՝ իր պաշտպանյալը խոստովանական ցուցմունք է տվել քննիչի կողմից  բռնությունների և ճնշումների ազդեցության ներքո, որի մասին Արթուր Մելիքբեկյանը  ՀՔԾ-ում հաղորդում է տվել, սակայն գործով վարույթը  կարճվել է:

Պարզվում է՝ Արթուր Մելիքբեկյանի տանը զենքն ու զինամթերքը եղել են նրա որսորդ ընկերներինը: Արթուր Մելիքբեկյանն  իր որսորդ ընկերներին խնդրել է, որպեսզի իր տան մոտակայքում հաճախակի երևացող բորենիներին որսան,  բայց քանի որ այդ օրը չի հաջողվել, որսորդ ընկերները իրենց զենքերը թողել են Արթուրի տանը՝ պահոցում, որի մասին անգամ Արթուրին չեն տեղեկացրել, և միայն  գնալուց ժամեր անց նրանք զանգահարել են և հայտնել, որ իրենց զենքերը թողել են իր տանը, իսկ հաջորդ օրը կգնան և կվերցնեն:

Սակայն ինչպես ասում են՝ շաբաթն ուրբաթից շուտ է եկել. հաջորդ օրն առավոտյան մեկ այլ հանցագործության դեպքով ոստիկանությունը գյուղի տներում, ինչպես նաև Արթուրի տանը խուզարկություն է կատարել և հայտնաբերել այդ զենքերը:

Ըստ մեղադրանքի՝ Արթուր Մելիքբեկյանը ապօրինի ձեռք է բերել և իր` Տավուշի մարզի Աչաջուր գյուղի տանը ապօրինի պահել է որսորդական ակոսափող հրազեն հանդիսացող 5,45 տրամաչափի Սայգա ՄԿ տեսակի կարաբին և որսորդական ակոսափող զենքերից կրակելու համար նախատեսված ռազմամթերք հանդիսացող` 11 հատ 5,45 տրամաչափի փամփուշտներ:

Արթուր Մելիքբեկյանին մեղադրանք էր առաջադրվել ՀՀ քրեական օրենսգրքի 235-րդ հոդվածի 1-ին մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը: