Փաստ ինֆո

«Փաստինֆո»-ն արդեն տեղեկացրել է, որ ՀՀ Նախագահ Սերժ Սարգսյանն այսօր հրամանագիր է ստորագրել՝ սահմանադրական բարեփոխումների իրավական ապահովման գործընթացի կազմակերպման վերաբերյալ:

Հրամանագրով, մասնավորապես, 

-  հաստատվում է 2015 թվականի դեկտեմբերի 6-ի հանրաքվեով ընդունված Հայաստանի Հանրապետության Սահմանադրության փոփոխություններով անվանականորեն սահմանված և ընդունման, փոփոխման կամ լրացման ենթակա օրենքների ցանկը:

- ստեղծվում է  Հայաստանի Հանրապետության Նախագահին առընթեր սահմանադրական բարեփոխումների իրավական ապահովմանն աջակցող մասնագիտական խորհրդակցական խորհուրդ,  հաստատել Հայաստանի Հանրապետության Նախագահին առընթեր սահմանադրական բարեփոխումների իրավական ապահովմանն աջակցող մասնագիտական խորհրդակցական խորհրդի անհատական կազմը:

- հաստատվում է  Հայաստանի Հանրապետության Նախագահին առընթեր սահմանադրական բարեփոխումների իրավական ապահովմանն աջակցող մասնագիտական խորհրդակցական խորհրդի գործունեության կարգը:

Հրամանագրով  Հայաստանի Հանրապետության կառավարությանը հանձնարարվում է, մասնավորապես,  ապահովել համապատասխան   օրենքների նախագծերի մշակումը և դրանք սահմանված կարգով և ժամկետներում ներկայացնել Հայաստանի Հանրապետության Ազգային ժողովի քննարկմանը,  քննարկել և մեկամսյա ժամկետում հաստատել Սահմանադրության փոփոխությունների՝ օրենքով կարգավորման պահանջ ուղղակիորեն նախատեսող դրույթների հիման վրա ընդունման, փոփոխման կամ լրացման ենթակա օրենքների ցանկը, ապահովել դրանց նախագծերի մշակումը և դրանք սահմանված կարգով և ժամկետներում ներկայացնել Հայաստանի Հանրապետության Ազգային ժողովի քննարկմանը,  քննարկել և երկամսյա ժամկետում հաստատել Սահմանադրության փոփոխություններով պայմանավորված՝ ընդունման, փոփոխման կամ լրացման ենթակա՝ սույն հրամանագրի մեջ չնշված այլ օրենքների ցանկը, ապահովել դրանց նախագծերի մշակումը և դրանք սահմանված կարգով և ժամկետներում ներկայացնել Հայաստանի Հանրապետության Ազգային ժողովի քննարկմանը, կազմակերպել և ապահովել ենթաօրենսդրական նորմատիվ իրավական ակտերի համապատասխանեցումը Սահմանադրության փոփոխություններին և դրանց հիման վրա ընդունված օրենքներին: 

Ինչպես տեղեկանում ենք ՀՀ նախագահի կայքէջից,  հրամանագրի հավելվածով սահմանված են   Սահմանադրության փոփոխություններով նախանշված   օրենքների ընդունման, փոփոխման կամ լրացման վերջնաժամկետները:

Այսպես,  Ընտրական օրենսգրքի (սահմանադրական օրենք)՝  Ազգային ժողովի քննարկմանը ներկայացնելու վերջնաժամակետը 2016թ. մարտի 1-ն է,  Մարդու իրավունքերի պաշտպանի մասին օրենքինը (սահմանադրական օրենք)՝   մայիսի 1-ը, Տեղական ինքնակառավարման մարմինների մասին օրենքինը՝ սեպտեմբերի 1-ն է: Մինչև  հոկտեմբերի մեկը ԱԺ քննարկմանը պետք է ներկայացվի Կուսակցությունների մասին օրենքը (սահմանադրական օրենք) և մինչև նոյեմբերի մեկը՝ Ազգային ժողովի կանոնակարգը (սահմանադրական օրենք):

Մինչև 2017թ. փետրվարի մեկը ԱԺ քննարկմանը պետք է ներկայացվի Սահմանադրական դատարանի մասին օրենքը (սահմանադրական օրենք),  մինչև մարտի մեկը՝ Դատական օրենսգիրքը (սահմանադրական օրենք), մինչև ապրիլի մեկը՝  դատախազության մասին օրենքը, մինչև մայիսի մեկը՝ Կենտրոնական բանկի մասին օրենքը, մինչև հունիսի մեկը՝  Հեռուստատեսության ու ռադիոյի մասին օրենքը,  մինչև սեպտեմբերի մեկը՝  Հանրաքվեի մասին օրենքը (սահմանադրական օրենք) և մինչև 2017 թ. հոկտեմբերի մեկը՝  Հաշվեքննիչ  պալատի մասին օրենքը:

ՀՀ նախագահին առընթեր սահմանադրական բարեփոխումների իրավական ապահովմանն աջակցող մասնագիտական խորհրդակցական խորհրդի անհատական կազմում ընդգրկված են՝   ՀՀ սահմանադրական դատարանի նախագահ Գագիկ Հարությունյանը   (խորհրդի նախագահ),  Հայաստանի Հանրապետության կառավարության աշխատակազմի ղեկավար-նախարար

Դավիթ Հարությունյանը,  Հայաստանի Հանրապետության Ազգային ժողովի աշխատակազմի ղեկավար  Հրայր Թովմասյանը,  Մարդու իրավունքների եվրոպական դատարանում Հայաստանի Հանրապետության կառավարության լիազոր ներկայացուցիչ, Հայաստանի Հանրապետության գլխավոր դատախազ Գևորգ Կոստանյանը, Հայաստանի Հանրապետության Նախագահի օգնական Հրայր Ղուկասյանը, Բարձրաստիճան պաշտոնատար անձանց էթիկայի հանձնաժողովի նախագահ Սիրանուշ Սահակյանը,  Հայաստանի Հանրապետության Նախագահի աշխատակազմի իրավաբանական վարչության պետ Գրիգոր Մուրադյանը,  «Հայաստանի Հանրապետության իրավաբանների ասոցիացիա» հասարակական կազմակերպության նախագահ  Գագիկ Ղազինյանը,  «Սահմանադրական իրավունքի կենտրոն» հասարակական կազմակերպության խորհրդի նախագահ Գևորգ Դանիելյանը,  Գերմանիայի միջազգային համագործակցության ընկերության (GIZ) «Հարավային Կովկասում իրավական և դատական բարեփոխումների համար խորհրդատվություն» ծրագրի ղեկավար Հայաստանում Վարդան Պողոսյանը: