Փաստ ինֆո

Երևանի Մալաթիա-Սեբաստիա վարչական շրջանի դատարանում շարունակվում է Մալաթիայի նախկին թաղապետի որդու՝ Սեդրակ Զատիկյանի սպանության  պատվեր տալու վերաբերյալ գործով քննությունը, որի շրջանակում մեղադրվում է ամբաստանյալ Նարեկ Խաչատրյանը: Նա, ըստ մեղադրանքի,  Ստեփան Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով դրդել՝  պատվիրել են սպանել Սեդրակ Զատիկյանին:

Նույն մեղադրանքով, սակայն այլ գործի շրջանակում  մեղադրվող  Ստեփան Հակոբյանի վերաբերյալ  արդեն իսկ կայացվել է մեղադրական դատավճիռ, որն օրինական ուժի մեջ է մտել:

Այսօրվա դատական նիստում ցուցմունքներ տվեցին երկու վկաներ՝ Ստեփան Հակոբյանի և Նարեկ Խաչատրյանի ընկերները, ովքեր Ստեփան Հակոբյանի գործով ևս դատարանում ցուցմունքներ են տվել:

Մասնավորապես, Արամայիս Սեդրակյանը հայտարարեց, որ  Սեդրակ Զատիկյանի սպանությունից հետո (Ս.Զատիկյանը սպանվել է  2006 թվականի հունիսի 22-ին), իրեն կանչել են ոստիկանության բաժին ու երեք օր այնտեղ պահել, ծեծել են, ստիպել, որպեսզի ինքը Ստեփանի ու Նարեկի անունը տա, սակայն ինքը հրաժարվել է: 

Դատարանում վկան հայտնեց, որ եղել է ժամանակաշրջան, երբ Ստեփանն ու Նարեկը չեն շփվել Սեդրակի հետ՝  տեղի ունեցած մի միջադեպի պատճառով: Որևէ արտառոց բան տեսե՞լ եք Ստեփանի ու Նարեկի գործողություններում հարցին վկան բացասական պատասխան տվեց:  Սեդրակի ու Նարեկի միջև լարված վիճակ եղե՞լ է  հարցին նույնպես վկան բացասական պատասխան տվեց:  Նա հավելեց՝ թշնամություն չկար:  Վկան արտառոց չի համարում նաև, որ Ստեփանը, Նարեկն ու Ահարոնը առանձնացել են, խոսել:

Մինչդեռ նախաքննության ընթացքում վկան հայտնել է, որ  2004թ-ից սկսած Ստեփանն ու Սեդրակը չեն շփվել` կապված նախկինում ունեցած ինչ-որ վիճաբանության հետ: Սեդրակի սպանությունից 2 ամիս առաջ նկատել է, որ Ստեփանը, Նարեկն ու Ահարոնը մշտապես եղել են խառը, անընդհատ առանձնացել ու խոսել են իրենից թաքուն, ինչ-որ զանգեր կատարել: Այդ վիճակը շարունակվել է նաև Սեդրակի սպանությունից հետո: Այդ ամենից հասկացել է, որ նրանք իրենից ինչ-որ գաղտնիք են ունեցել: Վկան հայտարարեց, որ նախաքննական ցուցմունքները չեն համապատասխանում իրականությանը՝ գրել է պարտադրանքի ներքո՝ մտածելով, որ դատարանում կասի՛, որ իրեն պարտադրել են:

Վկա Արմեն Բեկջանյանը հայտնեց, որ Նարեկն իրեն խնդրել է ճանապարհից  «ռաստամոժկայի թղթեր» վերցնել ու հասցնել իրեն: Ւնքը վերցրել է թղթերը, սակայն փաթեթի պարունակությունը չի տեսել: Ապա ավելի ուշ Նարեկի խնդրանքով գործով վկա Ահարոն Հակոբյանի հետ թղթերը տարել են Ջրվեժ՝ վերջինս դրանք տվել է այլ անձի:

Վկա Ահարոն Հակոբյանը, ըստ «ՍԵԿՏ» համակարգի տվյալների, մեկնել է Հայաստանից, այդ պատճառով մեղադրող կողմը միջնորդեց հրապարակել նրա նախաքննական ցուցմունքները:

Նարեկ Խաչատրյանի պաշտպան Վարդուհի Էլբակյանը առարկեց ցուցմունքները հրապարակելու դեմ՝ նշելով, որ այդ դեպքում կխախտվի իր դեմ ցուցմունք տված անձին հարցաքննելու իր պաշտպանյալի կոնվենցիոն իրավունքը:

Դատարանը բավարարեց միջնորդությունը, ինչպես նաև դատարանի նախաձեռնությամբ հրապարակվեցին նաև վկայի՝  Ստեփան Հակոբյանի գործի շրջանակում դատաքննական ցուցմունքները:

Այսպես, վկա Ահարոն Հակոբյանը նախաքննության ընթացքում  ցուցմունք է տվել այն մասին, որ 2004թ. Սեդրակը վեճ է ունեցել Ստեփանի եղբայր Վարդանի և Նարեկի հետ, որից հետո թշնամություն է սկսվել երկու կողմերի միջև և Ստեփանը որոշել է վրեժխնդիր լինել: Սեդրակն այդ մասին բազմիցս արտահայտվել է իրենց նեղ ընկերական շրջապատում:

Ըստ վկայի նախաքննական ցուցմունքի, Ստեփանն ու Նարեկն իրեն կանչել, տվել են ամերիկյան դոլարների կապոց և ասել, որ այն տանի Ջրվեժի օբյեկտների մոտ և տա Ֆելոյի տղա Արսենին: Այնուհետև, նրանց կանչով մոտեցել է իրենց ընկեր Բեկջոն (խոսքը վերոհիշյալ վկա Արմեն Բեկջանյանի մասին է), ում հետ գնացել են Ջրվեժի օբյեկտներից մեկի մոտ և այդ գումարը տվել Արսենին: Այդ ամենից հասկացել է, որ Սեդրակի սպանությունը կազմակերպվել է Նարեկի ու Ստեփանի կողմից` Արսենի միջոցով: Այնուհետև, իր այն հարցին, թե ով կարող էր սպանել Սեդրակին, Նարեկը պատասխանել է, որ ինքն ու Ստեփանն են վրեժ լուծել, Ֆելոյի տղա Արսենին պատվիրել են սպանել Սեդրակին, ինչն էլ Արսենը կատարել է:

Հետագայում Նարեկը պատմել է նաև, որ ինքն է գտել Արսենին` որպես Սեդրակի սպանությունը կատարելու համար հարմար թեկնածու: Ասել է նաև, որ դրա դիմաց Արսենին  «հարմար թիվ են տվել»` չնշելով կոնկրետ գումարի չափը:

Ստեփան Հակոբյանի գործով դատաքննության ժամանակ վկան  հրաժարվել էր իր նախաքննության ընթացքում տված ցուցմունքներից, հայտնել, որ նախկինում նախաքննության ընթացքում իր կողմից տրված ցուցմունքները գրվել են ոստիկանության աշխատակիցների կողմից իր նկատմամբ արժանապատվությունը նվաստացնող վերաբերմունք դրսևորելու ազդեցության տակ:

Մեղադրող Արմեն Մարուխյանը հայտնեց, որ ոստիկանների կողմից խոշտանգումների վերաբերյալ վկաներ Արամայիս Սեդրակյանի ու Ահարոն Հակոբյանի հայտարարությունները ստուգման են ենթարկվել Հատուկ քննչական ծառայության կողմից, որի արդյունքում քրեական գործի հարուցումը մերժվել է հանցադեպի բացակայության հիմքով: