Փաստ ինֆո

Ազգային ժողովի Պետական-իրավական հարցերի մշտական հանձնաժողովն սահմանված ժամկետում՝ մինչև փետրվարի 9-ի ժամը 18-ը, ստացել է Մարդու իրավունքների պաշտպանի թեկնածուի վերաբերյալ երեք առաջարկություն:

Ինչպես «Փաստինֆո»-ի թղթակցին հայտնեց հանձնաժողովի նախագահ, հանրապետական Հովհաննես Սահակյանը, Պետական-իրավական հարցերի մշտական հանձնաժողովի անդամներ՝ անկուսակցական Էդմոն Մարուքյանը և «Օրինաց երկիր» խմբակցության ներկայացուցիչ Հովհաննես Մարգարյանն առաջարկել են «Ժառանգություն» խմբակցության ներկայացուցիչ Զարուհի Փոստանջյանի թեկնածությունը:

ՀՀԿ խմբակցությունն առաջարկել է Արդարադատության փոխնախարար Արման Թաթոյանի թեկնածությունը:

«Բարգավաճ Հայաստան» խմբակցության ղեկավար Նաիրա Զոհրաբյանը փետրվարի 5-ին լրագրողներին հայտնել էր, որ խմբակցությունը նախօրեին քննարկել է ՄԻՊ թեկնածու առաջադրելու հարցը  և որոշել է առաջադրել ԲՀԿ քաղաքական խորհրդի անդամ, «շատ փայլուն իրավաբան» Մակար Եղիազարյանի թեկնածությունը: Այդուհանդերձ, ՄԻՊ թեկնածու առաջադրելու իրավունք ունեցող՝ Պետական-իրավական հարցերի մշտական հանձնաժողովի անդամ Տիգրան Ուրիխանյանը, ով ԲՀԿ խմբակցության անդամ է, սակայն դուրս է եկել ԲՀԿ-ից և հիմնել «Ալյանս» առաջադիմական ցենտրիստական կուսակցությունը, առաջադրել է ոչ թե ԲՀԿ-ի, այլ՝ «Ալյանս»-ի թեկնածուին` իրավաբան Նարեկ Ալոյանին:

Ինչպես հայտնեց հանձնաժողովի նախագահ Հ.Սահակյանը, ԲՀԿ խմբակցության ղեկավարը գրությամբ դիմել է հանձնաժողովին՝ տեղյակ պահելով ստեղծված իրավիճակի մասին, սակայն գրությանն ընթացք տալու ընթացակարգ գոյություն չունի, քանի որ ՄԻՊ-ի թեկնածու առաջադրելու իրավունքը պատկանում է բացառապես հանձնաժողովի անդամներին, այլ ոչ թե խմբակցություններին:

Ի դեպ՝ «Ալյանս» կուսակցության մամուլի խոսնակ Վարդան Քոչարյանը քիչ առաջ հաղորդագրություն է տարածել, որում ասված է. «Պաշտոնապես հայտնում եմ, որ «Բարգավաճ Հայաստան» խմբակցության մեր գործընկերների հետ եղել է քննարկում օմբուդսմենի թեկնածուների առաջադրման հարցի վերաբերյալ: Քննարկումները մինչ օրս շարունակվել են, իսկ պայմանավորվածություն, որ ԲՀԿ-ի թեկնածուին պետք է առաջադրի «Ալյանս»-ի ղեկավար Տիգրան Ուրիխանյանը, չի եղել: Ով պնդում է հակառակը՝ ստում է, ապացույցները պատրաստ ենք ներկայացնել: «Ալյանս»-ն առաջադրել է սեփական թեկնածուին, իսկ ԲՀԿ-ն կարող էր, և դեռ էլի կարող է ներկայացնել լրացուցիչ անդամ պետաիրավական հանձնաժողովում և առաջադրել սեփական թեկնածուին: Ըստ էության այդպիսինն է եղել պայմանավորվածությունը»:

Հանձնաժողովը, ըստ ամենայնի, փետրվարի 12-ի նիստում կքննարկի ներկայացված թեկնածուների թվից Պաշտպանի պաշտոնում ընտրելու համար Ազգային ժողովին թեկնածու առաջարկելու մասին հարցը:

Նշենք, որ հանձնաժողովը կազմավորված է 12 անդամից, որոնցից 6-ը ՀՀԿ խմբակցության անդամներ են, 5-ը՝ ԱԺ մյուս 5 խմբակցությունների ներկայացուցիչներ, ևս մեկը՝ անկախ պատգամավոր:

Ի դեպ՝ ՀԱԿ և ՀՅԴ խմբակցությունները ՄԻՊ-ի թեկնածու չեն առաջադրել: «Ժառանգություն» խմբակցությունը հանձնաժողովում ներկայացնում է հենց Զարուհի Փոստանջյանը: