Փաստ ինֆո

Պարզվում է՝ «Շենգավիթ» ԲԿ-ի մանկաբարձ-գինեկոլոգ Շուշանիկ Բախշյանի նկատմամբ ապօրինի ոտնձգություններ են կատարվել: Այդ մասին քիչ առաջ ֆեյսբուք սոցիալական ցանցում գրառում է կատարել Շուշանիկ Բախշյանի պաշտպան Ալեքսանդր Սիրունյանը:

Գրառման մեջ նշվում է, որ շուրջ 250 հիվանդներ և հղի կանայք դիմել են Գլխավոր դատախազին և Քննչական կոմիտե՝ Շ.Բախշյանի նկատմամբ ապօրինի ոտնձգումները դադարեցնելու պահանջով:

Փաստաբանը հրապարակել է այդ դիմումը և ստորագրությունների մի մասը:

Հիշեցնենք, որ Շուշանիկ Բախշյանը մեղադրվում է 2015թ. հուլիսի 27-ին կեսարյան հատումից հետո «Էրեբունի» ԲԿ տեղափոխված և երկու օր անց մահացած Մերի Մարգարյանի մահվան գործով՝ ՀՀ քրեական օրենսգրքի 130-րդ հոդվածի 2-րդ մասով:

Քրեական գործով նշանակված դատաբժշկական փորձաքննության եզրակացության համաձայն՝ 2015թ. հուլիսի 24-ին և 25-ին հիվանդանոցում Մ.Մարգարյանի զննությունից հետո` ջերմության առկայության պայմաններում, (նաև անամեզում ջերմության առկայությունը բարձր թվերի  վրա) հիվանդին չհոսպիտալացնելը չի եղել հիմնավորված:

Ինչ վերաբերում է Մերի Մարգարյանի բուժօգնության և հետազոտությունների ընթացքում թույլ տրված բացթողումների և Մերի Մարգարյանի ու նորածնի մահվան պատճառական կապին, ապա հանձնաժողովը նշել է, որ 27.07.2015թ. ժամը՝ 09:00-ին, հիմք ընդունելով արյան բիոքիմիական և մնացած հետազոտությունների արդյունքները (որոնց զարգացման պատճառները եղել են հղիության հետ կապված), և որ նշված փոփոխություններն ընթացել են արագընթաց՝ պետք է հնարվորինս ավելի շուտ կատարվեր ծննդալուծում, այդ թվում՝ կեսարյան հատման միջոցով:

Դատարանը բժշկուհու նկատմամբ կիրառել է գրավ։

Նշենք նաև, որ Շուշանիկ Բախշյանը գործողությունների վերաբերյալ այլ բողոքողներ ևս կան, որոնց վերաբերյալ մամուլի հրապարակումը  Շենգավիթ վարչական շրջանի դատախազությունն ուղարկել է Ոստիկանության բաժին՝  նյութեր նախապատրաստելու համար։